民華餐廳

营业中

休息中

今日中午黎到柴灣呢一間茶記民華餐廳，星期六既中午唔駛等岩岩仲有一台卡位，呢間茶記既特別之處係佢有埋點心同埋蒸飯食，點左呢個廿幾蚊既鳳爪排骨飯，飯不會蒸到太林，配上檯面上提供既蒸飯豉油幾好食，排骨都做到肥瘦適中，不錯👍🏻。另外點左一個咖哩牛筋腩飯，響飯上面會比多一隻煎蛋，一試佢既咖哩竟然有彩蛋，味道濃郁既咖喱，有一種特別既咖哩香，而且係一般人可以接收到既辣度，撈飯食好開胃！牛腩都炆得幾林，唔加野飲46蚊。所以中意食咖喱既朋友值得一試！

午餐時間兩個人去到民華，估唔到出面甘多人排隊。😂 好在都好快有位。由於唔係好餓，兩個人叫左個茶餐同西多士share食! 😚先講一下個茶餐。只係$41 有個沙嗲牛肉麵，又火腿炒蛋跟多士，非常豐富😂 份量都幾多，食物有質素，絕對唔hea。另外，一定要講下西多士! 😍 超超超好食 (純屬個人意見🤭)個多士嚟到嘅時候仲好熱好香， 見到都流曬口水。再加上牛油同蜜糖，簡直冇得頂。🤭 個多士都幾厚，又冇番整ge感覺。😋 力推👍👍

早兩星期喺附近做嘢先來呢間茶餐廳食完，一直好印象深刻個西多士非常之正今日咁啱同成班同事過嚟青年廣場開會，一於再encore食西多西多西多 西多上面塊牛油真係好鬼大舊又邪惡 ，但咁抵食又好食西多一定要食 食完西多即時叫返碟菜心 ，彌補番食咗咁邪惡嘅食物 菜心都ok wor 10幾蚊算大碟之後就梗係例牌叫埋個常餐，叉燒麵同叉燒飯 叉燒份量十足，麵身夠爽唔會太淋，流心蛋非常流心，真係好夾個飯 呢間真係糧尾欣物 ，又抵食又好咪又夠晒平

1.沙嗲牛肉通粉味道ok，幾濃郁2.個腸仔同炒蛋係完全唔熱，直頭係攤到凍哂嗰種3.啲嘢到左，但係完全冇餐具，諗住叫戴眼鏡個男仔拎，佢望都唔望下，就咁講: 等等，服務十分唔掂係40幾蚊一個常餐，唔應該要求勁好服務，但係基本嘅態度都要有囉，好心將心比己啦，食嘢冇餐具，仲要啲侍應扮忙走黎走去其實根本都冇嘢做，成班係度傾計，送餐又亂咁送，問都唔問就咁放落黎，唔怪得咁少人食，最基本應有嘅服務水平都冇，唔知呢間公司點訓練啲同事!

中午想吃一些簡單的食物，便想到道間民華餐廳。點了沙爹牛肉通粉，餐肉炒蛋，多士，凍㗎啡。其實這個餐性價比高。沙爹好好味，只是不知為何今次的通粉比較硬，炒蛋好滑嫩，多士外脆內軟，㗎啡味澴。看似不多食物，但其實吃完是很足夠。整體性價比高。

黎到柴灣呢到搵朋友，又黎到我最近好中意既茶記食野，餐廳姐姐有禮貌，又溫馨提示我仲有幾分鐘到下午茶會平啲，問我等唔等，今次叫左個鵪鶉蛋燒賣做頭盤先，3粒燒賣都大大粒，而且好夠料，有蝦仲有大舊豬肉，都只係17蚊，仲有叫左個常餐，蕃茄火腿通粉配火腿炒蛋牛油方包，方包好軟身多牛油，又係金黃色既炒滑蛋，好味！蕃茄湯好稠身重味，仲有紅豆冰係我每次既必叫飲品，跟餐都只係加7蚊，超級多紅豆，食完好飽肚，推薦大家試！

今日去左柴灣等男朋友放工，等到好肚餓去左民華食個tea。5點幾人客都有好多，我見到有個常餐好吸引，即刻叫左黎試下。蕃茄叉燒公仔麵，配多士炒蛋和午餐肉。蕃茄湯底好濃郁，入口酸甜，蕃茄蓉好足料。叉燒份量好多，入口肉嫩唔乾身，燒得剛剛好。公仔麵吸哂蕃茄湯底，好正啊！多士加左牛油，入口好惹味，烘到脆卜卜。炒蛋好滑溜，蛋味極重。我唔夠飽叫多左一客西多士，即叫即製，加左原塊牛油，外脆內軟。西多士非常鬆軟，麵包入口唔會好油膩。

又到咗星期日 ，可以輕輕鬆鬆hea返日😊😊😁 。好耐冇食民華餐廳， 好掛住佢哋個西多士， 瞓到自然醒 跟住同家人一齊去嘆早餐。太耐冇喺度食早餐， 搞到樣樣都想叫來食😂😂😂今日都幾多人 ， 花咗少少時間等位😆😆。不過唔緊要啦 ，最緊要可以食個靚早餐我哋嗌咗 西多士、 糯米雞 、 同埋幾個常餐😋😋😋首先嚟咗隻糯米雞， 同以前一樣 大大隻熱辣辣， 裏面超多餡😋😋😋熱檸茶🍋🍋🍋沙爹牛肉米粉， 沙嗲味香濃牛肉淋滑， 不過米粉淋少少唔夠爽口😅叉燒清湯米粉， 叉燒份量頗多， 味道香濃。唔知點解今日啲奶粉煮到好淋😅😅😅招牌多士， 炒滑蛋餐肉火腿招牌厚多士十分香脆， 炒滑蛋有好香嘅牛油味 ， 一向都係我嘅最愛。萬眾期待嘅 煉奶西多士終於出場， 真係太掛住呢個西多士，要特登過嚟呢邊食嘢。😍😍😍 麵包非常香脆 ，配搭甜美嘅煉奶，令人 完全停唔到口😝😝

最近一星期喺柴灣附近做嘢，走得都已經成7點，好肚餓所以搵埋同事一齊食晚餐是但搵左一間茶餐廳叫民華🙌🏻 好耐之前都係旺角分店食過，知道呢間野都幾多人排隊同埋常餐好出名今次我哋叫咗兩個餐，分別係常餐ge番茄叉燒麵配炒蛋多士（$41），常餐超值同埋真係好好食，特別想讚下個炒蛋好滑，感覺似加咗牛奶同鴨蛋落去炒 另外多士好脆。份量好足 。之後就叫咗個叉燒煎蛋飯加時菜（$43+$10），估唔到茶餐廳嘅叉燒都咁有質素，但略嫌份量少左啲，不過咁嘅價錢都收貨嘅食完兩個餐都唔夠飽，見到西多士好抵食（$17）, 炸得very good , 奶油加牛油勁多雖然係邪惡 但真係好手yummy .

幫襯民華餐廳已有一段時間，至愛依度新鮮出爐既面包，價錢經濟實惠，絕對不是空氣包的質素.11點起身，過左早餐時間，食晏又太早，即刻諗起民華餐廳，依度全日賣既食物都一樣，不過價錢係十一點後會貴少少.糯米雞絕對係本人至愛，份量岩岩好，不多亦不少，完全岩晒唔湯唔水既早餐或午餐之間依段時間醫肚，價錢亦實惠，$26一隻，要野飲就要加多$10.糯米雞入面既料非常之充足，有雞翼、叉燒、冬菇、馬蹄等等，一揭開快荷葉已聞到好香，真係一啖接一啖食到停唔到口.

今日一個人放工有啲肚餓，走左去食個tea。公司附近商場有間茶餐廳，經過見到大排長龍，我就入去食個常餐。沙爹牛肉通粉、香腸炒蛋配多士、另外再加點一個西多士。沙爹牛肉好重沙爹香味，湯底唔算太濃太膩，通粉好彈牙。牛肉好軟腍，份量都算好多啊！多士加上牛油烘得好香口，牛油半溶加上熱辣辣多士，超滋味。炒蛋好嫩滑好重蛋香，香腸即煎，水準幾好啊！西多士即叫即做，加上牛油和煉奶，麵包炸得好香脆，中間又軟熟，牛油重味好滿足。

星期日瞓晏咗就去附近間民華餐廳食brunch。好少見茶餐廳有得食點心，叫咗三籠試吓。燒賣賣相同傳統唔一樣，少咗隻蝦，變咗粒杞子，味道算唔錯。山竹牛肉幾好食，但太少喼汁。雞扎大大舊好足料，入面有豬肚、豬皮、芋頭、同雞肉，味道合格有餘。叫咗個常餐，鮮茄牛肉通粉湯底蕃茄味濃，牛肉幾滑，通粉夠彈牙。炒蛋好滑，撈埋通粉一齊食好味。多士烘底外脆內有牛油，火腿輕輕煎過，簡單又好味。西多士金黃色外脆內軟，淋上煉奶同牛油雖然熱量爆燈但好好食！紅豆冰好重淡奶味，唔錯。豐富嘅brunch！

我同家人經常嚟民華食下午茶， 鍾意佢近近地又扺食，常餐仲任你配搭。今日我地叫左兩個常餐加一份西多士，3個人share 食。🥢常餐（鮮茄叉燒通 + 香腸炒蛋 + 牛油多士（底））$41 + 凍檸檬茶 $3老豆最愛鮮茄通， 鍾意佢湯底酸甜好醒胃， 蜜味叉燒， 夠惹味。🥢常餐 （沙嗲牛肉通 + 火腿炒蛋 + 牛油多士（底））$41 + 凍檸檬茶 $3常餐夠大份， 兩母女share食都得，沙嗲牛夠味唔失禮， 火腿炒蛋夾多士， 滋味大滿足。🥢西多士 $17黃金西多士，外脆內軟， 搽滿牛油好香口。

今日去左柴灣接男朋友收工，點知佢要ot，我唯有搵間餐廳食個tea啦！我經過民華餐廳，見到佢地有個常餐好吸引，人流又非常多，就排隊試試啦！餐廳先送上多士配炒蛋、餐肉。多士先用牛油焗熱，入口非常香脆香口，入口陣陣牛油香，中間仲夾上奶油，夠哂滋味，半溶牛油非常香口。炒蛋好滑溜，陣陣蛋香入口好正啊！金黃炒蛋蛋味極重。餐肉煎得微微脆邊！主食叫左沙爹牛肉通粉，通粉彈牙，沙爹牛肉味濃夠嫩口，入口好咬口添，味道高水準。

民華餐廳-性價比高常餐一聽到民華餐廳應該不陌生，主打港式常餐、新鮮出爐麵包還有盅飯點心，最重要是價錢經濟，每當經過的時候，總會進去叫一叫一個常餐，食件多士。民華必食常餐多款配料、湯底、麵身選擇的常餐，鮮茄叉燒公仔麵，厚切餐肉配炒蛋，再加烘底多士。西多士茶記必點西多士，炸得金黃色香脆的方包，配上糖漿、煉奶和牛油，又香又甜。咖喱牛筋腩飯除了中式盎頭飯和糯米雞，還有咖喱牛筋腩飯，咖哩汁香濃微辣，當中牛腩入味，牛筋腍身。鵪鶉蛋燒賣酒樓都少見的鵪鶉蛋燒賣，小時候必叫，鵪鶉蛋會留在最後才吃的，燒賣餡料非常多，整粒燒賣很飽滿。