松記糖水店

营业中

休息中

今天我去了松記吃甜品聽朋友說這麼的甜品是很有名的果然我到店門口已知道要排隊才能進去排了大約20分鐘終於可以進去 – 搭台吃有時真不明白為什麼連吃個甜品想消磨時間也要和別人迫呢不要緊最緊要是東西好吃我點了一個芒果班戟配芒果雪糕就是一個已經要$36元上到桌我真的不禁哇了一聲因為他的SIZE連半隻手掌也不到味道方面我覺得班戟是有水準的吃落入面軟綿綿的, 充滿著芒果的香味和果肉味道可惜的是沒有兩三啖便吃完了但雪糕就比較普通一吃便知是普通的雪糕而已

是日放工得閒無野做，去左深水埗揾舊同事吹水，唔想食得太HEAVY，所以只食個糖水算，但都估唔到咁多人，排晒長龍。等左約20分鐘先有位。一坐低有你無你叫食先，我點左個雜果涼粉，份量好爆，啲汁流出黎咁濟，有蜜瓜西瓜哈蜜瓜，有芒果汁及椰奶係面。朋友點相同的，但佢加多左2球雪糕，大大球，望落去好足料，好抵食。另一個朋友點左心太軟，係新鮮即焗的，呢係好有水準，朱古力蛋糕唔太甜，一切開入面啲朱古力醬咇晒出黎，好好食。最鍾意佢配一球雪糕，又冷又熱，雙重口感，十分之正的配搭。

本人從小便住附近，小時候很喜歡一大班朋友到松記吃個糖水。雖然現已長大，不過依舊愛吃這家糖水店。比起外來新建的糖水鋪，我更喜歡松記的招牌summer，每次都叫曲奇及綠茶雪糕，再配上兩條好吃的朱古力條。為我一天畫上完美句號。

飯後甜品唔知食邊間好？深水埗附近趆開越多間糖水舖，新開糖水店又唔知好唔好食，最後都係揀返光顧多年既松記，次次都係食幻彩明珠，依然甘好味！8點去到仲唔洗等位，但就食完會即刻比店員收起個碗，坐多陣都唔得⋯

喺附近食完晚飯後，好想食糖水，所以Mr.J就帶咗我去食松記喇。今次食咗1)檸檬芝士脆脆木布拼雪糕(2)腐竹雞蛋糖水拼湯圓（熱）檸檬芝士脆脆木布拼雪糕感覺好得意，外貌係木糠布甸，但食落係檸檬芝士蛋糕，唔太甜，幾好食。不過依個唔一定有，因為Mr.J好想食，所以就算店員提醒會好硬都照要，好彩Mr.J都接受到。腐竹雞蛋糖水拼兩粒湯圓（熱），唔會好甜，裡面有少許嘅白果同薏米，所以有咬口，幾好食。湯圓方面，我揀咗花生同芝麻，兩款都係好好味，會食到花生餡或芝麻餡嘅一粒粒，而且唔會死甜，好滿意。不過我認為如果糖水再熱啲比較好。(之前我同Mr.J一齊食過附近一間差唔多名嘅，都痾到九彩..........怕怕了)

遠遠見店舖人頭擁擁，點知兩個人又唔駛等位，店內都係好多客迫迫果種，想傾計就未必適合。我自己就麻麻地甜品，叫左個比較傳統的雪耳燉木瓜，清甜又夠凍；朋友就食彩虹明珠，材料豐富，認真價錢平，比起其他4/50蚊一個甜品的糖水鋪，松記絕對貨真價實。

收工之後有啲想食宵夜，所以就去左附近既松記糖水尋食，但又唔想咁夜番屋企，就決定外賣番去，順便買埋比屋企人食。松記一到夜晚就好多人，等左大約10分鐘外賣先到，拎走既時候建議大家先睇下碗糖水黎得岩唔岩，原本我嗌左雜果明珠，最後拎到番屋企先知佢地比錯左，去換番又廢事，唯有照啃。明珠同小紫蘇既口感始終差好遠，我偏好明珠果種煙韌既口感，而小紫蘇則係直接落肚，雖然咬落去爽口，但較難命中目標。水果食落都鮮甜，奶同芒果汁既份量比例還好，如果係明珠就好喇～而芒果布甸名副其實真係有兩大舊芒果，而且布甸入面依然有果肉，味道香甜好食，芒果亦甜度十足唔會酸，唯獨奶落得未夠多，更多的話就更好喇

每次去到松記都會即刻點返個哈囉黎食～ 呢次突然間榴蓮癮起，就試下新野，就點左呢個榴蓮雪糕刨冰不過....都真係幾伏下。開頭以為面頭既雪糕會係榴蓮味，但係個味道十分奇怪，食落好似煉奶味，仲要膠膠地咁。個刨冰直情咩味都無，而且非常粗糙，一啲都唔滑，隔離有D紅豆和椰果，但味道不太配合，好夾硬嚟，而且紅豆好硬，好似唔熟咁！唯一正常少少得返d榴蓮蓉，但整體真係好災難性。下次去松記都係唔好試新野，食返招牌嘅哈囉穩陣啲

松記長沙灣店經常排長龍，路過便一試。等候五分鐘。小弟點的是榴連刨冰（正名閣下自行校對）。有榴連雪榚、榴連肉。雪糕榴連味道，亦帶清新。再試榴連肉，味道更濃郁。整體不錯，榴連甜品較貴，其他價錢亦合理。

大家有冇試過打online game 呢？ 好多色扮演嘅遊戲都有公會戰， 就是工會的成員一齊對抗其他公會 的會戰。 我男友就是每晚公會戰不甩我的人(>﹏<) 話說其中一個公會成員由台灣來香港玩， 我男友就帶他出來吃晚飯順便也過來吃糖水， 不是這樣的話長沙灣這間松記離我這麼近卻一次也沒幫襯過呢？！就這樣我們一人唔行連埋小朋友 浩浩蕩蕩的向松記出發！ 出奇地今晚竟然唔使排隊！ 可能是下雨天的關係吧？原來這裡食糖水也不是想像般貴， 像我選擇的這碗紅豆沙加芝麻湯圓， 也不過是十多塊錢。 其他如棉花冰雜果等等的就會貴一點， 也都是三十多塊錢。紅豆沙也做得幾出色， 紅豆煮得很淋，而且有沙起， 甜度亦適中。 果皮味很香很重不過好似濃咗少少。 芝麻湯圓皮做得夠薄， 食出煙煙韌韌的口感！ 芝麻餡亦做得夠幼細 同時有流心的效果！

松記係我最愛糖水店之一，一個月都食幾次，次次都好專一食幻彩明珠，今日一花心改食西瓜明珠就出事，因為西瓜明珠真係得西瓜同明珠（大西米）水都無滴，係乾撈！問番d侍應，佢就話唔要奶就乜都無，糖水落左少少，再多會好甜，如果我要就俾糖水我。可能我真係見識少，不過hea到咁的糖水竟然係老字號出現，都係怪我唔食人地熱買果幾款。最後食晒d西瓜，真係無法乾爭爭吞d明珠，盛惠$25。

每次食完飯,仲想搵地方坐下吹下水,都會選松記,每次入去都係叫椰汁西米露,d椰汁味夠濃唔會話加左好多水,西米夠滑碗埋椰汁,飲落口感更滑!入面雪糕夠大份,每次食完都好飽,仲有好多味道選擇!值得一試!

今晚去深水埗等朋友，一定要去松記食榴蓮班戟，距環境好好，乾淨，舒適，榴蓮班戟嘅皮好厚薄始終，忌廉好滑，重點系好多肉嘅榴蓮，好香好好食，每一口都食到忌廉嘅滑同榴蓮肉嘅脆，好味到不得了，下次過黎都會再幫襯。

食完晚飯，仲未夠喉，想搵啲小食，糖水系另一個胃口，想起附近有間出名又材料十足的糖水鋪，每逢晚飯後，就出現人龍，雖然地方唔大，流量快，都介意排隊入去食返碗糖水。呢款甜品個名叫（哈囉），看似一碗芒果黑糯米，但材料十足，食一啖，口裏充滿不同材料，不同的口感。大西米滑口、雞心豆腍甜，紅腰豆和眉豆好有豆味，講到爽滑口，不得不提透心涼的涼粉，仲有椰汁榚，有濃濃椰汁香味，上面有芒果蓉加上花奶。令甜品口感更豐富，想唔到，一碗糖水就有咁多配料，值得一試。

夏日熱辣辣，食返個甜品最好不過平時食開summer, 但呢幾日有點熱氣，所以就叫左個涼粉+紅豆外賣回家食。份量剛好，涼粉同紅豆各佔一半。紅豆煮開左 不會硬掘掘。每一粒都綿綿的配搭埋爽彈既涼粉 絕配價錢公道甜度適中。暑氣盡消