上一次幫襯「方榮記」最少是十幾年前，之後一直沒有幫襯，主要也是因為室內環境太過麻甩，只適合一大班朋友一邊隊啤、一邊烚下烚下；加上枱與枱之間很擠迫、員工服務態度又唔係太好，更加不太適合一家大細。難得今晚約齊朋友，當然不能放過這個機會。
「方榮記」屹立九龍城幾十年，創店老闆是典型上一代生意人，賺了錢就自己買舖，但唔係炒舖炒地產；而是只求穩定長做生意、不需要擔心搬舖加租。也僥倖因為這種老派思想，老店才不會受到近年地舖租金飈升的影響，可以一直在原址經營。雖然已經由第二代接手，但仍然秉承上一代老闆（老豆）的脾氣；所以，不要奢望什麼優質服務，員工態度好不到哪裏去，總之，感覺似幾十年前的路邊大排檔打邊爐。雖然是自置舖位，但老字號就是有種脾氣：地方逼夾；裝修甚至有啲地踎、比普通街坊小菜館還要街坊；堅持唔翻新、唔花錢搞靚裝修。雖然用餐環境唔理想，又人多嘈吵；但仍然座無虛席，左右兩間並不相連的舖位全部坐滿了人！反觀附近其他餐廳及火鍋店就客人稀疏 ⋯⋯ 果然是老字號！
火鍋料點單紙共有兩張。一張是海鮮、飲品及粉麵；另一張就是牛肉及其他火鍋配料。撇除海鮮一定貴之外，其他火鍋配料的價錢非常相宜，相比其他高級海鮮火鍋店的索價，竟然只是一半左右！可以說是難以置信。至於「方榮記」賴以成名的牛肉，定價也同外邊其他火鍋店差不多，甚至乎還要便宜一些。
去「方榮記」，當然要叫齊兩個經典湯底。雙拼鴛鴦湯底的火鍋太細，決定分開叫齊兩款：清湯底（$50）及「方榮記」另外一個成名之作沙爹湯底（$60）。清湯底（$50）色澤奶白，以大地魚、牛骨、黃豆等熬製，再以花生醬等吊味，湯底味道濃郁而清甜。
手切金錢𦟌（$208）同樣是國產黃牛新鮮貨源，咬落爽口、一樣鮮甜，但肉味稍遜於頂級手切牛肉。
牛脷（$58）也來自國產黃牛。切薄片。淥熟後軟身帶少少爽韌。味道及不上頂級手切牛肉或手切金錢𦟌。
牛肉以外的配料都被視作配角，絕大部分只是現成來貨，炸魚皮（$40）是例外。一般火鍋店用現成貨，薄薄一片，但「方榮記」每日用九棍、牙帶魚皮，自家新鮮炸製，炸時連骨帶肉，每件魚皮分外香脆可口。雖然落了單，但遲遲沒有送上來 ⋯⋯ 原來已經沽清，但侍應阿姐竟然沒有通知。炸魚皮以外，雲吞（$30）及水餃（$30）是少數自家制作的火鍋配料。餡料只有少量蝦肉，大部份是免治豬肉；蝦肉唔夠爽口鮮甜、亦欠缺大地魚蓉及蝦籽的鹹鮮甘香；味道非常一般。不過，一碟八粒，坊間隨便一間平價廣東雲吞麵店的凈雲吞 / 淨水餃都不只這個價錢，抵食到接近難以置信。如果不是自置物業，這個定價連租金都不能夠應付。
影片
