新記芝士麵 (已結業)

星期日中午本來想去專食CHEAP野兄介紹o既"泰式生香" , 點知佢地仲放緊新年假冇開門, 行o下行o下就入o左o黎呢度食午飯.店如其名, 呢間o野係入o左舖o既大排檔, 地方好細, 六張圓檯, 罐頭同雜物擺晒出o黎, 係大排檔o既格局, 賣o既係咖啡奶茶三文治, 但周圍貼滿o的明星歌星o係度幫襯o既相, 大概o係因為佢地有o的特別o既自創港式食物, 好似芝士汁撈公仔麵, 蜜汁龍鬚(魷魚鬚)撈公仔麵等等. 我要o左佢地其中一樣特色o野, "勁辣川椒牛肉煎蛋飯", 同一杯熱咖啡.勁辣川椒牛肉煎蛋飯($30) - 聽個名好似好嚇人咁, 但係就完全唔係o個回事. 飯用中湯麵碗上, 牛肉都算幾多, 冇落梳打粉, 加辣椒同炒但一o的都唔辣. o的豉油汁又甜又杰, 古古怪怪咁. 講味道又唔算係差, 但作為特色食物就一o的都唔突出, 30蚊食吉野家o既大牛肉飯仲好食兼抵食過佢. 熱咖啡($10) - 算係有一般大排檔o既質素, 但味道唔濃, 麻麻地. 整體o既印象麻麻. 呢度o既下午茶唔算平, 座底20蚊起, 咁o既價錢呢頭周圍有唔少地方都好過佢. 睇o黎o的明星歌星對食o既口味同要求都唔係咁高.食

今日去完~~唔記得食個芝士汁（下次食過）我食o左個酸辣汁雞扒飯~~幾好食喎~~仲有豬頸肉螺絲粉都幾好~~不過豬頸肉少o左D~~ 價錢ok 啦~~我兩碗連兩凍飲都係$73 蚊~~下次先試埋個芝士汁同咩龍鬚~~

好好食既芝士撈丁。不過唔鍾意芝士既可能會食唔到。因為幾‘漏’下。豬頸肉水準好飄忽﹐有時好掂﹐有時好‘UN’。除左芝士撈丁之外其他食物都唔錯。價錢比其他茶餐廳貴﹐不過值得!

今晚響尖咀上堂,趁未夠鐘就周圍行睇下有無野食啦,咁就見到呢間野啦,記得肥貓提過佢D芝士撈丁,本來都有心想試,不過加塊火腿同2條腸仔就$30,唔係好抵喎,加上張相又唔多吸引,算啦,叫左個煎蛋豬頸肉公仔麵($30),又係有D呃錢喎,相度明明有幾條菜架? 唔見o既? 而且佢D公仔麵一睇就知煮唔夠,仲係未變色,硬掘掘,而且有部份飲品都好貴下,一支鮮奶$12.我見到我同檯個西裝哥哥叫左芝士撈丁呀,白色一pat野晒碗麵,真係無乜好感! 佢地話好多明星幫襯,因為好多出位野食,咁我都覺,佢地係有好多野食係響出邊D舖食唔到o既,不過D手勢就真係要再執執先啦我覺得!

炭燒豬頸肉好正!!!!!!!!!!! 正過好多泰國菜館!!!!!!!! <br>另外芝士撈麵又係好正, 不過幾肥~ Hhehehe~~~~~ ^__^