微辣大排檔 (已結業)

朋友係微辣嘅忠實fans，差唔多條條片都會睇！所以知道咗微辣喺香港開大排檔之後就不停叫我同佢一齊嚟試吓，呢間大排檔有別於我哋平時所認知嘅大排檔，開設於人來人往嘅商場入邊，衛生環境較街邊嘅大排檔感覺良好啲。可能大排檔嘅選址比較高級，租金相對貴啲，所以食物嘅價錢都相對冇咁親民。大排檔嘅環境同食物都唔錯，入到去見到好多以前香港嘅裝飾，好有懷舊嘅感覺。同埋食物嘅名都好有趣，我哋見到都忍唔住笑咗出嚟，例如：食豪dee十全大補車仔麵、Rachel愛豬手、大文煲燶咖啡等，呢啲名都係同微辣嘅成員有關嘅，相信佢哋嘅fans見到都覺得好親切嘅感覺！咁多款食物入邊，我哋最推介就係瑞士汁雞翼同埋十全大補車仔麵，因為啲瑞士雞翼滷得好入味同埋十全大補車仔麵嘅鮑魚都好正，彈牙得來又夠味，如果嫌十全大補車仔麵貴嘅話可以叫普通嘅自選車仔麵再揀鮑魚做餸都得👍🏻

未試過叫一個煲，要等一粒鐘，追單追咗兩鑊，等到飯都凍曬，都仲未整到。侍應西口西面，廚房做唔切。永久blacklist建議趕時間或者肚餓嘅人千祈唔好食，喺麻雀枱上麵食嘢，唔知係咩玩法，啲枱同啲凳完全唔match，落去完全唔舒服

本身抱住新開一試 但冇諗過會差到咁 已經唔講價錢貴呢個問題 如果好食就冇所謂 坐低點了車仔麵三餸 魚皮餃 豬紅 牛肚 油麵 真心好耐未食過咁難食嘅嘢 仲有點了格仔餅 一杯又係好耐冇飲過咁難飲嘅茶走 唔知係水吧冇經驗定係點 本身個茶已經係劣質 仲要茶走都唔識 因為冇落煉奶 同啲年青樓面講又係唔知咩叫茶走 老實講 即時比番煉奶我落又點 已經唔係嗰回事 杯嘢又唔夠熱 算啦 橫掂冇下次 睇番個餐牌早餐要四十幾五十幾一個 真係笑 一個廿幾蚊嘅早餐都一定會完勝佢 睇怕呢間嘢都做唔倒幾耐

微辣就睇得多，唔知竟然開左茶記，仲要係沙田撞見，更係入去試下啦。 想唔到地方好大，仲可以分到場景既裝修。 有船既，舊式酒樓，舊式茶記，仲要係有澳門feel既。真係好得意。我全左去船個邊，好靚呀，好想坐船過大海。。。佢有好多正野，大利記豬扒包果然冇失禮人，保持到水準。 個包我擺左一陣先食都冇硬，仲好軟屬，豬扒又好啱味。車仔麵更係不少，我叫左三寶牛麵加紅豆冰。 好啱味，唔會太咸，好大碗仲好呎料，啲牛勁靚，最緊要有個麻辣醬超正。而紅豆冰佢有少少沙冰既質感，但又唔係沙冰。 有少少碎冰之餘又唔會溶冰整淡晒。 勁多紅豆蓉，好好飲。朋友叫左花膠三寶麵：花膠，豬皮魚蛋，雞亦加奶茶。個魚蛋好好奇佢係單丁上，原來真係舊時個隻魚蛋味，真係唔落得湯。然後就係一眾小食：辣雞腎，辣牛肚，蓮藕片，甜齋，通菜。 果然思鄉得離譜，唔知幾時有得係澳門食...真係食得好開心。

微辣開餐廳我諗大家同我一樣一早就知，微辣自己嘅名氣加上鋪天蓋地嘅宣傳令佢地嘅餐廳人氣非常高，排隊人流都多得誇張，今次咁啱lunch經過無人，咪諗住入去試下囉點知道🚁價錢進取就預左架啦，但佢價錢進取之外仲份量細，坐得迫，有啲食物質素仲要差到一個點，所以話星爺喺華人社會嘅影響力幾強🤣先講奶茶，正常過正常一街都係中上水平，完。車仔麵係我最滿意嘅柚皮無根，唔苦唔澀但蝦子就真係搵唔到啦1碗79蚊嘅車仔麵只有2細舊加埋大概有半張10蚊紙。牛腩有啲粗鞋，但咬得開嘅味道都ok，會鞋嘅就唔洗諗係啲咩腩啦。🚁🚁🚁豬扒包菠蘿皮淋，豬扒乾，咸，包肉浸滿油入口即化，分唔到係求其搽上去嘅牛油定係炸豬扒嘅油。總括而言🚁🚁🚁🚁唔怪之得咁快唔洗排隊啦

因為名氣關係嘗試左微辣嘅車仔麵，入到去環境都幾有味道，不過播放過嘅音樂聲太大.入邊食小菜同車仔麵係分開位坐。於是我選擇叫車仔麵，但用手機定單略嫌繁複，不過上麵好快，仲快過上一杯20蚊嘅咖啡☕️（但我覺得咖啡冇乜特色完全唔值$20）同埋呢度既車仔麵嘅衛生程度有待改善，食食下居然有鼻毛

環境係懷舊港式風格，分開兩區，一邊食茶記食物，有港式同澳門出名菜；另一邊食大排檔小菜叫左兩款小食作為前菜：瑞士雞翼&青瓜鹹牛肉芝士豬仔包 鹹牛肉炒蛋多到滿瀉，麵包鬆軟唔會乾曾曾芝士薯條超多芝士醬😍，確保每條都食到啲醬，薯條鬆脆，就算凍左都唔會變腍微辣10全大寶車仔麵 有唔同麵底揀，想健康啲揀菜底都得。材料好豐富多元，有幾件花膠、鮑魚、豬手、餃子等…淨係食餸都夠飽😙鴨屎香珍珠奶茶近期有唔少茶飲店同餐廳都開始出現尼款茶，鴨屎香係烏龍茶，同鴨屎無關係🤣😂，茶味帶有花香。瓦煲咖啡咖啡味道特別，飲落有啲焦香味

見佢之前圍板裝修咗咁耐 今日入咗去試佢個小菜區 簡直係伏中之伏1. 張凳勁頂腳 身高高過150嘅人根本唔適合坐2.嗌兩個餸等成個鐘先上齊 仲要已經唔係全院滿座 如果坐滿晒嘅話 真係要等3個鐘 以為食緊法國餐廳3.侍應態度禮貌一般 感覺培訓不足 基本落單 企到冇雷公咁遠 點樣聽到個客講嘢？ 佢聽唔到個客講嘢但俾人感覺係個客錯 仲大大聲:下！ 4.重點：d餸菜油到可以用碟中既油煎番十條銀咖喱香腸 d油好似唔洗錢咁 令人作嘔 水準欠奉一句講晒永冇下次

由微辣開設嘅微辣大牌檔，裝修同餐牌均秉承一貫風格，玩味十足！餐廳分小菜區同埋車仔麵區，仲特別聯乘咗兩間港澳小食名店，出品水準有保證！鹹牛肉芝士菠蘿包 $38澳門名店大利來記出品嘅菠蘿包，菠蘿包做到酥香甜美，炒蛋夠滑，真係唔錯！格你餅 $22香港名店北角雞蛋仔出品，即叫即製，就算落滿醬料，格仔餅仍然保持香脆嘅口感，超正！大排檔啤酒 $58/支 $150/3支微辣 X 少爺啤出嘅Classic Pale Ale，香氣芬芳，入口爽甜，唔覺唔覺就飲咗3支！跟埋專用嘅公道杯同埋杯墊，想養金魚？no way！食豪Dee十全大寶車仔麵 $138微辣車仔麵區嘅頂點，內含鮑汁鮑魚、上湯花膠、瑞士雞Wing、秘製沙嗲魷魚、Rachel愛豬手、滷水大腸、白菜發記豬肉餃、微辣香腸、梅菜發記豬肉丸、清甜Roberto，湯底清甜，配烏冬同埋微辣辣汁真係好夾，而且每款配料都有兩舊或以上，兩個人Share都好夠食！香脆炸魚皮 $18Hugo絕對木偶 $22麻辣牛肚 $38小食都幾大碗，疊到好滿！魚皮香脆、蓮藕爽口、牛肚軟腍入味，同車仔麵好夾！

上星期到沙田新城市廣場返工，放飯去咗呢間微辣大排檔，下午茶時間諗住試下車仔麵，叫咗幾個餸, 睇落價錢唔多平，賣相唔太差，不過食落湯底好淡，加小辣得個辣字，完全唔係果回事。早知道過永年吃，起碼湯底有味，餸菜都入味，呢間試過一次不了。另外叫了一杯凍檸檬茶同樣咁差，仲有成$24，茶味淡到一個點，唔明點解連檸檬茶咁無難度都可以咁差，非常失望。

一心來試一試，選了下午茶時段。環境有特色，餐具也是。有點小心思在內。點了豬扒菠蘿包套餐：豬扒菠蘿包＋芝士炸薯條＋凍奶茶包：個包淋得滯，皮唔脆，餐送來時個包都唔熱。塊豬扒一整塊有骨，又薄又偏乾，因有骨食時見麻煩，未有細心考慮食客的體驗，一直都要好小心唔好咬到骨，終要拎塊豬扒出嚟分開食。塊扒冇特別味，亦冇其他配料或醬汁，只係將兩樣嘢放在一齊。芝士薯條：有半碟薯條係炸燶，入口割咀。芝士偏淡，因人而已，個人還可接受。奶茶：普通，正常，冇特別。另外點了一客豬腸蘿蔔豬紅：真心唔夠味，蘿蔔超多渣，相當一般。可以感受一下環境，但食物水準有待改進。

本身有睇開微辣，最近知道佢喺沙田開咗間微辣大排檔，所以諗住同男朋友一齊去試下，點知真係伏😗首先，有個好似大粒嘢嘅大粒嘢企喺門口，勁串咁既，帶位帶到一半就走鬼左嫁啦😑 都幾好服務播一坐到落張枱度，咁啲侍應就會幫你斟茶。跟住有個男侍應高高地嘅，一邊幫我哋斟茶，一邊個口就喺度唔知up乜咁，唔知喺度做乜勁lol，我諗係佢係諗住介紹呢隻係咩茶掛🤔 但係又唔大聲啲，喺度口噏噏，唔知噏乜😆跟住我哋就嗌咗幾個菜啦，4碟野，佢地係逐樣逐樣上，啲野食係唔熱既，應該係攤咗一陣，咁都冇所謂嘅😀 重點係，果隻米酒雞！等咗成粒鐘都唔黎喎，咁我哋咪催佢地單囉。咁有個後生嘅男仔侍應應咗我哋嘅，同佢講咗我哋隻雞好耐，可唔可以幫我哋跟下咁啦。跟住個侍應同我哋講，「哦，雞呀，佢好大隻㗎，你咁樣應該擺唔落，幫你執下枱呀。」我哋即刻黑人問號，其實我都係想叫你幫我跟下隻雞姐⋯ 咁執嘢都好嘅，咁張枱真係放唔落嘅，但係我哋嘅目的係隻雞，想你幫我跟下lol 叫完佢之後，唔知佢有冇幫我地跟啦，再等咗一段時間之後，我哋就諗住取消。咁我哋之前試咗嗰三款，都知道呢間嘢食麻麻哋，就諗住既然佢唔上比我地，咁我哋就叫買單叫佢順便取消埋隻雞佢啦。點知

平時睇微辣就睇得多，近排係沙田終於開咗佢哋嘅大排檔，入面有得食冰廳又或者有大排檔小炒。今日亦都同fd嚟試吓，呢到嘅位都唔少，環境好濶落！我哋點咗佢哋嘅車仔麵，呢到多到幾十款配料比你揀，面嘅種類應有盡有，湯底嘅選擇都多，我哋都揀咗好多餸嚟試。其中鮮蝦廚皮卷真係好特別，食落好彈牙，微辣香腸真係少少辣，但好有肉香，隻鮑汁鮑魚真係夠曬彈牙，其他配料都不過不失，我哋揀咗薯粉，好彈牙，湯底味道岩岩好！之後我哋仲點咗啲小食，有呢麻辣牛肚同麻辣雞腎，呢兩樣小食真係夠曬麻香，越食越開胃，停唔到口，我哋都有叫左份生菜嚟送返個面，份量夠曬大份！嚟到呢度真係要必試佢哋嘅招牌豬扒豬仔包，個包嘅質感真係一流，好有面包香味，食落好軟熟，而件豬扒煎到好香，腌得好入味，個包絕對有驚喜！我哋見個包咁正，又特登叫左個奶油豬，用同樣嘅包嚟整，今次就係甜食，好脆，配埋啲牛油鍊奶食簡直一流！野飲方面我哋叫左杯懷舊紅豆冰同鴨屎香珍珠奶茶，紅豆冰真係整沙冰咁，食到啖啖紅豆🫘！珍奶茶都好滑口，珍珠都好彈牙。仲有個豆腐味超重嘅豆腐花埋尾！

見到好多朋友都去左新開張既微辣大排檔作為多年微辣粉絲既我當然都即刻要去打個卡～餐廳雖然算係澳門KOL名義開但裝修上有好多港式既風格 eg霓虹燈 麻雀 地鐵景 等等我哋就坐左係入門口左邊既天星小輪景 都幾得意 而且自成一角無出面咁嘈Menu設計同平時微辣大排檔啲片既style一樣 好有親切感😂 啲餸菜名都好抵死首先叫左碗車仔麵 本身想揀辣到入醫院湯底 可惜賣晒 就轉戰Yelo咖喱汁 配埋招牌玻璃辣魷魚又幾夾牛孖筋易咬彈牙 牛栢葉份量夠多 Roberto冇筋，好淋又清甜 豬大腸佢比哂最扁身少肥膏既部位我 好驚喜！大利來記豬扒包好耐無食過豬扒包 豬扒薄脆 一定要趁熱食芝士炸薯條咁大碟都只係$22 好抵食 芝士份量都毫不客氣 每條薯條都沾到芝士Rachel豬手整得好入味 而且有肉 唔會淨係lun骨

好耐冇去澳門🇲🇴好掛住豬扒包。而家喺香港都可以食到😍微辣大排檔有大利來記豬扒包、利強記雞蛋仔及車仔麵等，真係好多平民美食！餐廳裝修幾得意，有少少懷舊風味。有啲位置仲係彷香港天星小輪場景，幾有特色！▶️菠蘿豬扒包$38可以跟套餐配薯條及汽水～但係由於我叫咗車仔麵，所以散叫～菠蘿豬扒包好好食😋菠蘿夠香脆，豬扒夠腍！真係好正！▶️生菜魚肉湯$28份量都幾多，魚肉加埋胡椒粉食。▶️車仔麵有好多唔同嘅配料選擇，見到十大推介就揀咗一個。-食豪Dee十全大寶車仔麵有上湯花膠、鮑汁鮑魚、瑞士雞WING、秘製沙嗲魷魚、Rachel愛豬手(南乳豬手）、鹵水大腸、白菜發記豬肉餃(自家製)、微辣香腸、梅菜發記豬肉丸、清甜蘿蔔頭Roberto！非常足料☺️鮑魚夠入味、我鍾意食沙嗲魷魚🦑夠香，豬手都好食，非常腍！揀咗沙嗲汁夠味夠香！▶️ 鴨屎香珍珠奶茶🧋港式奶茶配上珍珠揀咗少奶，茶味香濃！▶️自選車仔麵揀咗五個餸：五香牛肚、蝦籽柚皮、手打墨魚丸、豬紅、墨魚腐皮卷。牛肚同豬紅都幾入味，墨魚腐皮卷大條又彈牙！有辣菜脯更惹味！▶️鹹檸檬雪碧食車仔麵好飲又夠爽！