御八築地 (已結業)

香辣海鮮手打烏冬，居然會係烏冬第一個衝線，廚房梗係好悠閒呢，一開始就比我地先食個熱辣辣烏冬做頭盤打打底，真係想得周到呢。必食手打烏冬，雖然甘味贊岐只不過係一般貨色，但總比即食烏冬好。滑溜中帶嚥韌，中度索湯力，煮耐左又唔會過腍，好味啊 ﹗大蝦、蟹柳、日式魚蛋、昆布、粟米使到濃郁辣湯泛著海鮮味道，微辣帶甜。配料明顯比以前少好多，不過湯底同手打烏冬質量仍保持水準，食得過 ﹗三文魚腩刺生，始終同滿腹超肥美三文魚腩有段距離 ﹗幸好今次已比以往好，暫時係最好既一次。半邊係筋、半邊係香甜肥美既魚脂，美味香甜、魚脂飄香，捲住青瓜絲沾上 wasabi 豉油同吃特別好食，味道特別清新 ﹗而另一邊廂，魚筋當然是又淡又韌啦 ﹗鱆紅魚刺生，超水準十分肥美油潤，質感結實彈牙，嚥嚥韌韌有咬口。白肉滲出鮮魚味道，鮮味突出，配上邊位紅色魚脂，香氣撲鼻，甜到不得了 ﹗跟火鍋店食到既瘦猛猛鱆紅魚有天淵之別，天與地既質數。海膽軍艦，築地喜歡叫佢做海膽壽司，搵死人咩 ﹗每瓣海膽都完整無缺，肥美又鮮甜，沒半點腥嗅。肥嘟嘟，質感滑溜，好味道 ﹗築地樣樣都好，係壽司飯咁多年都強差人意，煮極都無進步過，可能根本無打算改善 ﹗飯粒硬實又黏口，口感濕爛 ﹗而且每粒緊扣完全密不透風。淡而無味，無飯香亦無甜醋香，非常失敗 ﹗只係靠靚食材、靚魚生瞞混過去 ﹗日式燒原條茄子，熱燙燙送到，但完全無味勁搞笑 ﹗茄子無加任何調味，只鋪滿木魚片，淡淡魚乾味道夾雜住咸香。茄子肉非常軟棉棉，跟木魚片味道都非常配合，幾好食喎 ﹗如果仍覺得太清淡，可以跟淡豉油同吃都不錯。網燒澳洲殼飼牛扒，我平時都唔會食大蒜，但依個一定要卷住食，份外香口清爽，又可以減低油膩感覺 ﹗牛扒雖則牛味略淡，不采質地鬆軟，調味得宜，沾上燒烤汁都可口滿意。鹽燒大秋刀，我仲幻想到有幾巨形添，standard medium size 之麻，嚇得我呢。如果有行開街市、超市都會對急凍秋刀魚咩價位架喇。比我想像中細條好多，秋刀天生油脂澎湃，如果明火燒就要非常小心，因為搶火得十分利害，隨時燶晒都未燒熟呢。師傅燒得外脆內嫩，魚皮香脆鎖得肉汁緊緊在內，秋刀魚肉味重而香濃，簡單的調味再噴上少許鮮檸汁已好好食，最緊要小心魚骨呀 ﹗一個烏冬、一客壽司、兩客刺生、一件牛扒、一條魚、一隻茄子，先夠我地兩個飽乍，實在太大食喇 ﹗兩口子晚上十點幾先食晚飯，緊緊急得切 last call 前就坐，幾乎最後一檯離開呢，阻住收工，sorry sorry。…查看更多

全場唯一的臉壁思過單邊卡位，又窄又細又對正大門口。如果我一早知道比依張檯我的話，我絕對寧願唔食，轉場走左喇 ﹗您地張檯勁細，想食客快快埋單咩？還是想食客唔好食太多呀？三文魚腩刺生，溫度似乎過低，入口太冰凍，好難試到味道，要攤一陣先食。口感較結實，未算肥美魚腩，魚脂甘香清甜，都好食既，還可以啦。係大埔黎講算合格喇，味道都香甜，不過不夠肥美、不夠油潤，口感爽而帶筋，只有薄過紙既一層肪係表面。帶子刺生，呎碼滿意，唔算好細。味道鮮甜，口感滑溜，如果連同咸咸的魚籽一齊食，幾好味，依個配搭唔錯。帶子壽司，帶子珍寶 size，大大件好抵食，溫度過低，太冰凍影響味道，只食到非常淡口既甜味。驚嚇壽司飯 ﹗多年來都無進步過 ﹗四四方方機製硬實飯團，size 又太大、口感糜爛，飯粒黏到漿住個嘴，味道帶苦澀，不香不甜，情況嚴重，慘不忍睹 ﹗海膽壽司，我一坐低已經不停搵海膽軍艦，但搵極都無，最後發現有海膽壽司，退而求其次，照殺。海膽送到，依個咪係軍艦囉，點解要寫壽司，令人混淆不清呢，其實叫做軍艦好好多，會比較易明白一點。海膽軟棉泛著迷人光澤，味鮮甘甜，齒夾留香，油潤多汁，溫度又夠凍，超好食好味道，混上青瓜絲更添清新氣味 ﹗不過配上驚嚇破膽壽司飯真係好唔掂，比壽司飯拉低晒分數，硬實無味又黏口，劣 ﹗之前個帶子壽司都己詳細解釋過，簡單再重複一次，飯團機制硬實，size 太大舊、爛飯黏口、味帶苦澀。如果有機會再幫襯，我係絕對唔會再叫壽司，淨食刺生更好 ﹗安康魚肝壽司，依度將軍艦歸類為壽司，分開好好嗎？突然掛住山林道味一番超好味既安康魚肝，所以一見到就即刻叫黎試下。不幸地口感乾硬，沒半點油潤感覺 ﹗淡而無味，食落漿住個嘴，食左一件已經好滯。壽司飯依舊略得可怕，硬實、黏口、太大舊、無甜醋味 ﹗都係淨食刺生好喇 ﹗燒鯖魚，皮香肉嫩又魚味濃郁，魚油豐富，加點點鮮檸汁更清新，很喜歡，好味道。燒原隻魷魚，個人覺得唔夠熱囉，點解只係暖暖地既，翻熱的嗎？個醬汁太甜，太膩，有種食兩舊就唔想繼續既感覺。魷魚口感嚥韌，不是爽口那隻。網燒澳洲牛扒，雖然牛肉味道微弱，濃郁欠棒，幸好質地嫩滑，肉汁豐富不乾涸，沾上醬汁都好滿意，可以一試。照燒餃子釀雞中翼，第一次食，我一直係度估究竟點樣釀隻餃子入去雞翼裡面呢？都比我估中左，只係釀餃子既豬肉餡之麻。雞中翼燒得皮香肉嫩，醃味香甜好好食 ﹗但個餡就麻麻地，缺乏肉汁、硬實乾鞋、豬肉味淡。炸軟殼蟹，形狀奇特好可愛 ﹗炸粉硬得出奇，重裝甲 ﹗睇返我早前御八既食評，係天婦羅炸醬黎架喎，改左？軟殼蟹本身口感軟棉棉，肉鮮帶甘香幼滑蟹膏，非常美味 ﹗口感比個硬掘掘又刮口既炸粉搞衰左，論賣相就非常好喇。鮮蝦奶湯，奶味濃而帶淡淡海魚味道，合格。豬骨湯手打烏冬，一食便知係真正手打，質感滑溜，咬落嚥韌彈牙。豬骨濃湯香甜，雖然只係簡單什菜配搭，但都好味好滿足 ﹗蕃茄海鮮手打烏冬，新嘗試 ﹗好濃郁既茄膏味道，好滯呢，蓋過所有味道，都係豬骨或清湯好好多。手打烏冬依舊好好味，口感滑溜又嚥靭。中蝦、蟹柳、青口都不錯，滿意。…查看更多

以往幫襯開大埔間御八築地，上月尾見佢地門外搭棚，最初以為裝修，後來知道佢地改了名及轉了老板，不過壽司及廚房班底聽講話不變，但當然要親身試試先知。因為怕等位，所以大概6:30己去到，一入到去己見有幾枱客食緊，入面格局同以往一樣，所以感覺同無乜分別。同行友人早己餓透，所以急不及待叫嘢食。嚟到呢度，當然會叫佢地的三文魚壽司，因為貪佢大大條好好食；講開份量，其實佢地啲份量不嬲都好大份，不論壽司、刺身、飯、麵、小食等都好鬼抵食。入反正題，除了三文魚壽司外，我地另叫了一個壽司拼盤及致愛的甜蝦和鰻魚壽司，海胆夠新鮮, 三文魚籽鮮甜, 赤貝亦夠彈牙, 值得推介, 另外甜蝦食落爽口新鮮, 鰻魚大大件好抵食, 這兩個都是我每次必叫的心水食品。另我們亦又叫了一口雞及雞翼, 2樣都係熱氣嘢, 但男友鍾意食, 無法, 嚟到時香噴噴, 搞到我都忍唔到口食咗2件, 食落口夠外脆內嫩, 肉裡頭還有肉汁滲出, 值得推介。我們最後還來了蝦天婦羅及天婦羅拉麵, 蝦天婦羅炸得剛好, 食落香口鮮甜, 拉麵這個還不錯, 湯底夠濃, 而且啲麵唔會太霖, 整體都幾好食。總結今次食評, 改了名的御八仍保留到以往食物質素及種類選擇多, 故期望下次再來光顧:)。…查看更多

今日同爸爸提早慶祝父親節! 今次食咩由媽咪話事~佢話之前食過呢間覺得唔錯，所以今次同我地食下喎!其實大埔都有幾間呢類o既日本餐廳，我個雖然鐘意野日本野，但對於街坊式o既日本餐廳一向冇咩好感~今日4個人食，要o左d壽司同小食~打開餐牌都算幾多選擇，可惜爸爸想試蟹粥但冇晒~蟹子栗米沙律 - 推介呢個沙律! :) 好多好大碟，好似食麵咁! d菜食落都新鮮~海膽三文魚卷 - 一般，海膽唔夠新鮮~花之戀 - 好巨型，好多蟹子!  三文魚有3層，可以多番少少沙律醬~雙色刺身 - 夠大件，三文魚略嫌唔夠肥美香芒蟹肉pizza - 推介! 好特別o既配搭! 以為係一般pizza，但佢用o左酥皮做底，同芒果好合襯! 唔鐘意芒果都好似仲有另一個料可以揀!芝士焗蠔 - 個汁係龍蝦湯，$30兩隻價錢唔算貴! 但味道唔夠濃，冇芝士味，可以加多少少芝士o係面焗一焗會香口好多~九州拉麵 - 冇咩特別，但好大碗!豬軟骨石鍋飯 - 好香，一拎出黎已經好大陣味! 飯蕉唔多，有d辣味會好食d~炸蝦三文魚卷 - ok，但唔算特別~4個人食o左$390，價錢中等，但老實講比想像中好味! 不過佢限時一個半鐘，舖佢細細好似有d趕o既感覺! 但野食黎得算快，服務都唔錯，侍應都好有禮貌~…查看更多

同一個月內光顧了兩次第一次是6/5,,第二次是20/56/5與老公到此用餐點了帆立貝拉麵﹑牛油鮮魷﹑三文魚壽司﹑花之戀還有半板海膽刺身老公最欣賞長長的三文魚及海膽刺身花之戀也很好吃,,但吃起來有點論盡!!因為有滿滿的蟹籽在頂!!正!!20/5就與爸媽妹到此用餐今回點了黑蜘蛛卷﹑雜錦刺身﹑海膽炒飯還有鐵板牛油帶子黑蜘蛛卷加有七味粉不算難吃,,但不太吃得慣加了七味粉的壽司XD海膽炒飯的海膽沒有很多~~不過爸覺得炒飯炒得好香,,挺好吃鐵板牛油帶子是滾熱辣的上桌!!又超香牛油味!!正！！最讚的是雜錦刺身!!新鮮又大件~~大埔好吃的日本菜第一家想到的就是它!!!…查看更多

鄭先生今日興起 一起身就話今晚帶鄭太太食japanese food原來係去一間鄭先生以前成日去御八築地鄭先生印象中既御八築地係一個幾好食幾值得去既日本餐廳 鄭先生同鄭太太都係喜歡食日本菜既人所以都對依間咁多好評既餐廳抱有期望但今次一行 感覺反而冇想像中咁好因為怕冇位 晚上六點幾就到 都已經要等好幾張枱餐廳隔離係間機鋪 鄭先生同鄭太太都係喜歡打機之人 反正都要等 就入去玩兩轉出黎岩岩好嗌到我地果張 大約半個鐘就有位坐環境係相當不錯 兩人位係邊邊 單獨兩個 鄭太太非常滿意餐牌既野食價錢唔算平 而刺身得一款雜錦 份量太多 唔適合2-3人食搞到想試多幾款都唔得於是我地叫左 胡麻汁魚生沙律 三文魚壽司 彩虹卷物 同辣蟹炒飯鄭太太好鐘意食魚生沙律 依間既味道唔錯 夠fresh 特別係車厘茄 而且魚生份量都多 夠二人份量 都算抵食睇過其他食評都知 三文魚壽司係必食推介 特別在三文魚夠晒長 夠肥美而彩虹卷物就包括海贍三文魚 芝麻芒果 魚子甜蝦 同魚子吞拿魚海贍三文魚果塊三文魚味道 明顯同散叫既三文魚壽司有分別  無咁肥美芒果非常甜 鄭太太表示仲甜過許留山 而甜蝦本身味道就好輕 但潵上面既芝麻炒過 咬落去只食到芝麻味 晒料!吞拿魚就一般 魚面加左葱 搶左吞拿魚應該有ge鮮味最不滿意就係個咖喱辣蟹炒飯原來所謂既蟹 除左飯上面嗰兩隻蟹腳 竟然係蟹柳 而且其他用料其少 蛋白成碟只係得兩三小塊 唯一可取係個飯炒得都幾乾身 一粒粒分開 唔會痴埋一齊簡單黎講 依味只係一個香料炒白飯 失望總而言之  短期內都唔會再去住啦  反正附近都仲有好多日本餐廳…查看更多

七點到， 八點多先有位兩個人用餐時間限1.5小時兩個人點了帶子刺身 （八塊） - 勁鮮甜， 正！三文魚壽司 - 長到可以包住舊飯當花之卷食甜蝦壽司 - 係大甜蝦 （即係牡丹蝦？）， 都好鮮甜特辣虎蝦鍋燒湯烏冬 - 我平時食唔到辣都覺得好好味， 叫罐可樂飲就無咁辣啦。一定無水煮魚/牛咁辣！ 至於份量……正常的一人份量左右。兩個人叫一碗就剛剛好可以試埋其他野食。火龍卷 （規定八件） - 初時擔心兩個人食唔晒以上既食物， 但望住火龍卷上既蟹籽真係好吸引， 結果加單叫埋！ 火龍卷係觀感上比到驚喜， 食落去都係咁， 無話特別好味。（我個人就覺得啖啖蟹籽好好味）佢既價錢都算中上但如果計埋佢提供既食物款式/質素/味道我覺得個價錢就非常合理…查看更多

以「全大埔最旺的日本菜」來作為標題，可能有點誇張，但相信離事實也不遠這間「御八築地」在大埔要開了一段長的時間，但小弟從來未曾光顧原因是每一次經過的時候，店外總是堆滿了一大群等候入座的人我心想，「是否真的如此好食呀？」今晚，我終於鼓起勇氣去試食為了避開擠迫的人群，我和女友二人準時18:00入座想不到當時店內已經坐滿了約七至八成的人店內空間不大，座位也頗為擠迫但佈置和裝潢也很不錯，整體環境尚算舒適當拿起菜單細看，我馬上被價錢嚇壞了因為對比之下，「御八築地」的價錢是幾貴的細看之下，全店免收加一，這樣算來，價錢還算可以接受，但絕對不會是「抵食」收費貴沒關係，最重要是食物的質素是否相符好，先上來的是『三文魚壽司』和『玉子壽司』『三文魚壽司』真的很長、很大件！吃下去三文魚十分鮮味，絕對值得一試而『玉子壽司』更是令我喜出望外，我從未見過如此「厚」的玉子！好味道再上來的是『鐵板牛油帶子』，牛油味不算重，配以蒜蓉香味，在鐵板上煎得甘好。帶子煎得剛好，很彈牙『芝麻鰻魚反卷』是隨意點的，但卻帶來驚喜外層是芝麻，中層紫菜，中間有鰻魚、蛋和生菜生菜令整個反卷十分清新(Fresh)再配上鰻魚汁，整個也甜甜的，十分好味『雜錦鍋燒烏冬』的配料有冬菇、嗚門卷、蟹柳、雞肉、炸蝦天婦羅、海苔、菜和半生熟雞蛋湯底非常清甜，烏冬的口感和味道也好好比某些「烏冬專門店」更勝一籌『三文魚蟹子炒飯」是全晚最令人失望的一碟，雖然整體也算OK蟹子令整個炒飯更有層次感但可惜，三文魚沒有味道總結：這間食店的食物整體質素頗高，而且很有特色雖然收費頗貴，但也絕不影響客人對它的熱愛有這麼多捧場客，真的有理由…查看更多

已有幾個月冇嚟食御八築地啦！今次都係嚟食佢嘅午餐，份量十足嘅角切魚生飯實在太好味，:) 今次三個人嚟食，兩個係都要叫角切魚生飯，唔肯轉其他，咁唯有我叫拉麵餐囉！今次個角切魚生飯仲多到滿瀉，大量嘅新鮮三文魚，八爪魚，吞拿魚，立魚, 北寄貝，甜蛋、青瓜，魷魚絲等等，再加埋飯素，好香嘅炸脆粒，仲有一大堆蟹子。嘩！ 一上檯已流哂口水啦！ (*仲有麵鼓湯送架！)d脆脆粒嘅炸槳，應該係同炸天婦羅嘅粉槳一樣，但好夾d飯，每次上檯時仲有少少熱架！將所有魚生配料等撈勻嚟食，味道口感一流！$68/套餐十$6(凍飲)東京拉麵：包一小碟前菜+2件三文魚太卷。味道雖然比魚生飯拉低咗，但豬骨湯底唔差，雖然佢用豬頸肉伴麵，但一d都唔會覺得肥膩，仲整得好好味架！唯一係個拉麵差咗少少，應該係一般超市貨色，煙韌欠奉啦。$49/套餐 *大家都食得好開心好滿足呀\^o^/ …查看更多

以前每次經過御八築地, 都唔會望一眼, 更加冇想過入去食, 因佢嘅舖面完全唔吸引。 但自從兩個月前第一次喺上水店食過後 (因嗰時至發覺原來佢係好好味㗎!) , 之後就多次都去幫襯。 因本人住大埔, 於是順理成章就去大埔呢間啦。 今個星期日中午又到嚟食午餐啦, 今次已經係第五次嚟大埔店。 呢間店星期一至日都有特價午餐, 所以好抵食。 加上間店嘅員工態度好好, 特別著淺藍色裇衫嗰位經理, 食得好開心呀!我哋兩個人好鍾意個角切魚生飯午餐($68+凍飲$3), 所以今次都冇例外。 雜錦魚生又多又新鮮, 灑上飯素同脆粒, 整碗份量都唔少, 真係好好食呀!過往我哋都會叫多個烏冬或拉面餐, 但今次再試火龍卷啦。 佢哋嘅火龍卷依然保持水準, 正!順帶一提, 上水店嘅火龍卷賣$58, 三文魚壽司賣$26, 但大埔店就賣分別$50同$23, 奇怪!…查看更多

由於怕等位，二人6:45PM 已到達，不用等位真好~叫了名物 1) 火龍卷 ($50) 2)豬軟骨炒飯 ($52)火龍卷 ($50)見到都開心，有一大堆蟹子放在炸蝦壽司上，炸蝦熱辣辣，好正，每次都必點~豬軟骨炒飯 ($52)見到隔離枱點，覺得好似好正咁，我們又點，不過原來因為用豬軟骨，所以炒飯入面有好多肥膏，當肥膏出哂油，成碟飯都油淋淋，好肥，好唔健康，仲食到好膩添~下次都係唔好再點豬軟骨類既食物了~這裡雖然客人很多，但侍應添茶很密，值得一贊:)…查看更多

事隔一個月，又來到御八築地，由於上次覺得食物質數不俗，而且價合理，生日就決定到這裡吃~由於怕等位，於是6:45PM 己到達攞位，只餘下一張四人枱，真是好彩極了，若來遲一步，都不知要等多久了~叫了5款食物:1)火龍卷 ($50)之前食評已寫過，不再評了，賣相與味道都很好~2)牛油果鰻魚反卷($55)反卷以牛油果包着，內裡有少量鰻魚，加上芝麻及黑魚子，食落有芝麻的香味與及鰻魚的甜美，很好吃~3)魚生沙律配芝麻汁($48)賣相相當吸引，大量的蟹子及魚生舖在生菜絲上，配以車厘茄及粟米，很清新又健康~4)炸雜菜天婦羅 6件 ($28)這個就比較差，炸粉相當厚，而且炸物很油，我還把炸粉除開，只吃內裡的蔬菜~5)三文魚壽司2件 ($23)這是長壽司，三文魚相當肥美，$23兩件好抵吃啊~總共叫了5款食物，只是$204，真是物超所值呢…查看更多

住係大埔廿幾年，一直都知道有呢間SUSHI，但就係無嚟個食，食SUSHI通常去左元朗間酒泉，今次終於的起心肝去<御八築地>試一試虛實先~平日的日子(星期四)，七點鐘去到，已經滿坐了，取了飛也要等5張，心想應該不會等太耐掛~點知，等啊等，等啊等，等到有D想走，又不憤氣等了咁耐，決定等下去~當日天氣非常悶熱，係條街等到身心身汗，食件SUSHI啫，搞咩要等咁耐WOR~最終7:30 入坐，內裡很細，我們三人坐四人枱，可惜不是卡位啊，而且位與位之間的通道很狹窄~由於第一次去，不知份量如何，三人行叫了6款食物~1. 豬軟骨石煱飯 (約 $60)太餓了，沒有影相，味道不錯，飯很入味，可惜沒有太多飯焦，每人也分到2碗，吃完有D飽了。2. 火龍卷 ($50)名物，個個都叫，賣相很吸引，內裡的炸蝦即炸，好好味啊!3. 加洲卷 ($45)當加洲卷到來時，大家呆了，乜D蟹子咁少既，由於食完火龍卷再見到依碟加洲卷，搞到唔想食添，只係比火龍卷平$5, 但質數差咁多架4. 軟殼蟹不好吃，好多炸粉。5. 黑魚子曼魚卷賣相又幾靚，食味都不錯啊~6. 大的蟹子沙律嘩，一來時份量大到呢，早知叫個細，味道同平常的沒有大分別，但沙律醬太多了總括來記，味道不錯，價錢合理，可以再來吃的，不過我不會再點加洲卷囉!…查看更多

好味!!!!因為 genki 好似又貴左, 而我地又喜歡食日本嘢, 所以去左呢度食!!!你睇下, 佢地d sushi 真係又大件大新鮮囉!!!! 三文魚壽司足足有6吋長, 蟹子又多, 個花之戀好好味!!!不過係多人d, 要等位, 好在我朋友早左到等位先, 唔係就慘喇!!!…查看更多

平時間唔中都會去食下....個日玩完之後都成9點幾...去到好彩唔係好多人,唔使等位....叫了幾樣野,,..呢餐飯3百多完…查看更多