宜家家居餐廳及咖啡室

营业中

休息中

上次lunch time選了摰愛燒牛肉，朋友挑了炸豬手。兩個主菜都十分不俗。今天過了午飯時間光顧，人少了。選擇亦然。要了三文魚，之前的配菜由雜菌變成薏仁。。但有凍蝦喎。可惜今日無論食物和服務態度都比上次遜色。

去沙田做嘢，又未夠鐘決定去宜家食個早餐。平時夜晚想喺宜家食個飯都可能要等好耐先有位。早餐就少人好多。排完隊買完早餐先再慢慢搵位都得。食個份量十足既早餐精選有德國豬肉腸、烤蕃茄、茄汁焗豆、煙肉，蛋加少少錢加多塊薯餅，熱辣辣的。依個價錢有依個快餐的質素，都算係咁啦。係個蛋怪怪地，蒸蛋唔似蒸蛋，炒蛋唔似炒蛋🧐咖啡(無限添加)

我好欣賞 ikea 提供早餐，不過我到呢一刻都唔係好明，點解 ikea 會有供應糯米雞呢樣野，到底係瑞典式糯米雞係點樣一回事呢？本來一場來到係唔應該叫呢種野既，不過賣餐姐姐話：“你都唔知，糯米雞係每日最快賣晒呀！”好，我就信佢一次，即管試下呢隻糯米雞點解可以打動 ikea 管理層，進駐到宜家餐廳，就成左今日早餐地獄之路........呢隻糯米雞，首先，唔夠熱係最伏中之伏，呢種天時，外層微溫既糯米雞，亦即係表示，內層只屬涼涼地，無論雞翼，火腿， 臘腸都係涼涼的.......汁又因為唔夠熱而一 pat 野咁， 臘腸（見圖）肥肉既比例係 9：1，即係難以搵到瘦肉既級別，大伏呀喂～臨走時，又真係俾我見到呢個糯米雞賣完落架喎，阿姐無水我，但同場食緊糯米雞既人都同樣流露一個頗伏既眼神，現在食其他餐既人係唔會明白呢種共嗚的。*現場搵極都唔見有筷子供應，於是就搵匙羹+叉代替住先啦，成件事完全係錯晒

黎開沙田，有時間都會黎行下宜家傢俬既。宜家傢俬咁大，當然行之前就梗係要去個小食部，食飽飽先出發啦~每次黎親必食 $10 熱狗汽水餐鬼叫熱狗包條腸又長又好味，堅抵食，出面包店賣個熱狗都要咁既價錢，但呢度有埋杯任斟任飲既汽水，平民之選啊～瑞士肉丸不過不失啦～無咩特別既，勝在係個肉丸配搭既蘑菇汁，香濃個人喜歡將個蘑菇汁放埋落去個熱狗度食，另一番風味 宜家傢俬d小食真心抵食，雖然味道好一般，但勝在夠貼地，夠平民化

終於有時間去沙田行下街去得沙田 冇理由唔去ikea 行下 睇下家私，係時候換一換新去得ikea 當然要食ikea 餐廳嘅野啦！係呢個黃昏下午茶時間，第一次呢段時間食ikea 野 小弟貪得意叫左個兒童餐，好平然後比錢時原來仲有野飲送有粟米 有薯容 有豬肉丸 份量當然唔多，話明兒童餐，但平價有咁多野食真係好正，仲有埋水果食味道又唔差，好味！再叫左個藍梅cake 好多藍梅容，口感亦好濃芝士味 好好食 除左呢啲，仲叫左雞翼同埋薯塊 唔係講笑！ 薯塊好大碗 同某餐廳比真係正好多！又熱辣辣 又脆口 可惜唔係住沙田 唔可以成日黎啦！

本來打算只到宜家傢私買一點東西誰知道一邊走就傳來美食的香氣原來我還未吃午餐然後就被香氣俘虜了宜家傢俬只有名的是肉丸我們兩個人點了10粒在配上紅莓醬其實剛剛好牛仔柳的生熟程度剛好只是脂肪好像太多雞翼看上去就知到太乾了薯格炸得非常香口

中秋放假去去沙田行街再逛下宜家，睇下梳化，去到宜家順便食佢d平靚正嘅晚餐啦，都預左勁多人，等左好耐先有位咋試左佢地新出嘅.....個名巧長...香烤三文魚柳伴小麥抓飯配雜菜清湯，係好平不過食到我抓頭！有香草油醋汁伴三文魚加小麥抓飯仲有一堆雜菜 ，檻欖味重，食左一啖冇食好彩煙三文魚沙律正常，煙三文魚仲大大件好抵食，不過d沙律菜都正常，不過個醬汁唔夠至正係7蚊汽水任飲，點都好，宜家環境光猛簡約，又扺食，冇乜要求黎係0k

今日去到沙田， 又想食個下午茶又唔知去邊間， 朋友就話不如去宜家食，因為好耐都冇去過 ，去到都差唔多爆滿好利害。因為仲以為五六點時間應該未必會咁多人，嘢食方面都有幾乎唔同嘅新選擇，不過最後我哋都係揀咗比較保險啲嘅嘢食嚟食 。第一次係度食 豬手 $63 好抵食，皮都脆而肉都入味同嫩，反而配菜就失望，酸菜冇咩味而薯仔食落口感怪怪。 豬肉丸 都同之前差不多但乾身左少少。凍蝦 梅左少少……但這價錢叫晒再加 #西瓜汁 都 $130都不用，算ok 啦。

陪朋友去IKEA 走一圈，她的女兒突然想食這裡的肉丸同雞翼，於是分頭行事，買東西及等位。IKEA 餐廳向來人頭湧湧，等位是件不容易的事啊！單看餐牌上的價格是吸引之一，價格非別的地方可以比較，再看簡約時尚的裝橫的確吸引一眾廣大市民，服務當然沒有，一切送餐也是自助型式，大家學會自律是好事，最後是食物質素，今次食物水準比起兩年前的差很多⋯⋯瑞典肉丸($20/10@)Size比以前細了，肉丸很乾沒有肉汁，咬下去口感相當硬，每人食了一粒便放下酥炸豬手($69)伴酸椰菜及薯仔配茴香蒜蓉汁份量很多肉也很多還有一些肥膏，皮燒得卜卜脆夠入味，但肉非常"鞋"同硬脆炸黃金雞翼($29/8@)一看就知道炸過了，非常燶⋯⋯雞翼沒有什麼味道，食落依然只有一個字"硬"食到特別口喝，自斟了4杯可樂(註：平時不怎麼飲凍野，最多半杯便飲熱水）這裡比一次飲料費便可無限次添加

每次去到沙田，都經常諗起ikea。唔係想買傢私，而係想食佢啲野食。一黎方便我地揸車之人，二黎真係平靚正之首選。閒日去所以都唔洗點等位就有位。前菜當然唔少得我既至愛蔬菜餅加肉丸。首先蔬菜餅配粟米腸仔雞肉，味道始終都係咁正。而肉丸唔洗多講，係信心既保証。主菜有大大隻火雞，價錢合理，但口感就一般真係，肉質係十分差。相反個三文魚意粉配西蘭花就真係有驚喜，整體來講算係唔錯。

放假同屋企人去IKEA行街添置家居物品，當然要去食肉丸啦假日中午時段一定多人，不過等左一陣就有位喇！每次黎到都一定會食肉丸，不過都會睇睇menu，睇下有冇新食品，今次見到三文魚長通粉，就叫一份試下先！雖然買野食要排隊，但自助形式，好快就有得食喇。三文魚長通粉都好大碟，有好多蕃茄，三文魚都唔少喎！味道都唔錯架當然唔少得每次必食既肉丸，$20有十粒，仲有薯蓉，抵食配埋果醬真係冇得頂呀！今次仲叫左八隻雞翼，炸到好香脆，好食！但係就乾左小小。希望下次可以再試其他新食品

今日陪朋友拿部電腦去沙田整，完左之後行去宜家家私睇書枱同食野。唔記得有幾耐冇嗨宜家食野，印象中去宜家最仲意食佢哋嘅肉丸、薯蓉同雞亦😬黎到餐廳入口見到Menu有新品，大家都想試下試完之後真係大失所望，即使係價錢平，相信都唔會再黎食😞

因為落大雨，被困商場。周圍左逛逛、右逛逛，發現原來IKEA有早餐食，於是帶埋BB一齊入去嘆早餐。IKEA一向出名Baby Friendly,除咗有果蓉免費派發給18個月或以下嬰兒之外，又有好多BB櫈提供。職員對我這個無助媽媽，更服務周到，主動幫手捧餐及幫我囉BB櫈，令我十分感動！早餐有三款選擇，價錢非常合理，當中更有牛扒選擇。我們選擇了炸魚柳餐，分量豐富，包括有炸魚柳一大塊、豬柳扒、炒薯仔粒、scramble eggs...... 飲品有汽水或咖啡，無限添飲。

喺附近睇完牙，泊到錶位就黎左呢度食，雖然已經8點幾仲都好多人好難搵位，我地食到9點幾10點都仲有人等位。一如概往叫左好多野食，成枱都係唔夠位擺，好抵食，不過食完個通粉已經好飽，最好食依舊係蔬菜薯餅，必試，但豬手就唔夠咸，麻麻地。

有時每個月總有乾糧日子，係呢個時候除左要平之外，但又想有多d選擇，咁ikea就係一個好選擇!本人就叫左個小食拼盤，有蔬菜薯餅，腸仔，粟米，仲有炸雞塊，你話好食就一定唔係，但勝在多選擇，當中最好味就係蔬菜薯餅，而最唔好食就係炸雞塊，真心太乾同粉太厚!除左呢樣仲叫左個素食小丸，素丸味道不錯，如果可以配瑞士肉丸個種紅苺醬應該會比酸忌廉好，至於素肉丸底配既米飯我覺得就一般般~都係個句，健康既食物係味道的確健康d既~