天龍燒鵝 (新禧大樓)

营业中

休息中

晚市叫咗兩碟雙拼飯，一碟肥燶腩叉拼腩仔、一碟肥燶腩叉拼燒鵝。招牌菜-肥燶腩叉 出到黎又瘦又柴，燶邊亦唔脆，口感極差。同新開果陣唔識嘢叫錯嘅一般叉燒無乜分別，咁嘅品質都仲要加5蚊。另一招牌菜-燒鵝 皮叫做有少少脆，但味道欠奉完全食唔到鵝味同醃料嘅味道，肉質亦又乾又老，係少有唔肥嘅鵝。腩仔 最重要就係脆皮，但呢度啲皮可以完全唔脆。最後就係居然連個飯都可以係唔熱嘅。比多咗次機會呢間別結果都係大伏，唔會再有第三次。

上次無意之中行過呢間小店，遇上下午茶時間，試左义燒瀨粉，非常之咁美味！今日又有時行過灣仔，不如試吓正常的午餐，叫左份一人套餐。燒鵝乳豬套餐，內有青瓜雲耳小吃一碗例湯，一小碟菜心，一碟燒鵝拼乳豬，飲品我要左凍檸茶，加8元，咁X貴！

山長水遠嚟試一試，$102乳豬燒鵝餐，乳豬竟然淋晒，乳豬皮係軟身，皮下又無肉。同店員講，只收到冷淡回應：「可能掛喺度耐咗，風機吹住，「潮」咗。」，唔好意思都無一句，亦冇打算要更換，然後再沒然後。浪費時間的一次體驗。

本身睇開talkfood 米紙都有介紹呢間燒味，話大廚係前五星酒店燒味師傅，評測唔錯，咪諗住放假嗰陣經過買個外賣叉鵝飯返屋企試吓啦…落完order比完錢，企喺舖頭外面隔住個玻璃，大約見到主廚斬緊燒鵝，但可惜唔夠高，睇唔到啲燒鵝外觀靚唔靚仔，咁攞完外賣咪滿心歡喜返屋企食…一開飯盒，見到燒鵝髀上面多咗兩三嚿冇乜肉嘅燒鵝部位(圖片一)，仲諗住大廚咁好送俾我哋食㗎啦，點知一撩開上面嗰d冇乜肉嘅部位，就見到(圖片二)嘅情形😧😮🫥… 我隻燒鵝髀啲皮消失晒嘅⁉️⁉️想問吓平時其他燒味檔會唔會咁樣做？我怕自己孤陋寡聞，因為我真係第一次遇到燒味檔師傅會自動幫燒鵝髀去皮🤢 叉燒就正常冇特別

天龍燒鵝嘅乳豬燒腩仔飯真係無得頂！燒腩仔啱啱好肥瘦，入口即化，乳豬個皮更係超級脆！佢哋嘅老火例湯都非常出色，材料好足，味道濃郁。我特別鍾意佢哋嘅花生眉豆雞腳湯同埋粉葛煲豬展湯。 如果你想食到肥美入味嘅乳豬燒肉，再飲一碗足料嘅老火例湯，天龍燒鵝絕對係你嘅首選！

同好多人一樣，都係睇YT介紹先知間野，條片講到乳豬燒鵝點點好，又米癡蓮又show曬有heart，就大膽試試，點知又係中伏。乳豬燒鵝飯外賣收81蚊，燒鵝全部邊角位冇件食得，又勁多碎骨。乳豬皮下一層厚脂肪，豬肉又勁肥，整盒飯不知所謂。最正常係個例湯。出品咁差，想留港消費都難啦，80蚊=1600Yen，東京lunch都食到品質吾錯嘅set，想人救要先自救，睇來間野都係賺快錢。

琴晚係Youtube睇完介紹呢間燒味舖，今日Lunch即刻走來試，叫左個肥叉燒鵝飯加鹹蛋，個叉燒一啲肥膏都冇嘅，個鹹蛋開到碎曬嘅。味道還好，對於一個70蚊嘅燒味飯，呢個絕對係唔合格啊！

叫左五碟有一碟係咁嘅質素 搵樓面反映好核突冇啖好肉要換 駁駁駁 唔理 唔俾廚房睇睇 夠膽講係脾位 冇紙巾 收$2建議唔好叫天龍燒鵝 叫天龍燒味算數 燒鵝出名上碟肉酸都唔把關 本業都未做好

見佢轉咗天樂咁耐,今日先去食叉燒😆叫咗雙拼叉燒+油雞飯,老火湯係青紅蘿蔔湯,叉燒肉質粉嫩咁,味道都唔錯,豉油雞都係味道啱啱好,唔會好咸佢個甜豉油送飯真係幾好味我食晒D飯🤣同行人嘅叉燒雙蛋都唔錯,叉燒原來可以叫‘淋啲’😆第一次聽

今次食呢個都係燒鵝乳豬飯，因為我都咁鍾意燒味原因就係因為唔需要等好耐，主要斬好咗之後放上飯面就搞掂快靚正，就算返緊工嘅時候都唔需要太嘥太多時間去等。外賣就當然唔使講啦，簡直係快靚正啦！乳豬皮脆脂肪少肉香燒鵝非常香，食到皮層炭火味道，另外鵝肉入面都充滿着醃料嘅味道！

食佐兩次都係一樣嘅感覺😅師傅做生意冇誠意 偷工減料（之前食過鵝髀拼叉排骨 叉排骨超離譜冇肉…鵝髀比網評細佐一圈…）燒鵝下莊一來 賣相都OK 老實講係好食嘅 皮脆同埋够熱 肉質都幾好 唔乾柴 但係除佐條大髀之外 其他部位都係得一層皮加肥膏 不如淨嗌鵝髀啦🙂‍↔️乳豬真係 blacklist ❌❌❌1/4上莊得哩一碟嘢 切嘅好亂 總要全部凍噻 不如隔籬乳猪头碟饭 嗌三份乳豬飯總要多總有找🤬完全唔值哩個價錢❌濑粉好差 汤头冇咩調味❌俾佐两次机会都唔掂 👋🏻灣仔人都係食翻再興同竺扶 甚至惠記燒鴨啦🙂

上網見佢介紹點好食咁，諗住唔會太差，我要求唔高，七十幾蚊食燒味飯都是想食肉唔係食骨，一打開真心見到個飯都唔開胃俾狗食咩？五嚿燒鵝，四嚿燒鵝都係骨來，如果俾多嚿肉我，我都唔會想投訴，慘過食二手飯，人地食剩俾我食咁，真係一肚火，叉燒份量係夠，本身就唔會投訴，圖都看到又乾又無密汁又無濃邊，見到都唔想食嘔🤮

上網睇YouTube 見佢哋都幾有誠意用心做，就試吓。揀咗燒鵝、燒腩瀨粉外賣自取，打開真係嚇親，燒鵝完全睇唔出同一位置斬出嚟，唔係期望有髀位，但東一舊西一舊（背、近頸對落一舊）咁堆砌出嚟，簡直將啲頭頭尾尾就掉落外賣搏你唔攞返去投訴。燒鵝同燒腩皮都唔見脆，全份餐最好嘅係例湯（南瓜粟米豬骨），如果啲燒味咁都可以比客咁做生意嘅，唔緊要，咪比人呃一次無回頭囉！以為都係重投竺扶懷抱，唔好試新嘢！

朋友係勁愛食燒鵝，介紹咗呢間位於灣仔嘅天龍燒鵝俾我。聽講呢間餐廳係米芝蓮2星中餐廳燒味部主廚創業，仲要係全日不停燒製乳豬同燒鵝。呢日嚟到銅鑼灣及灣仔附近行街，入去食咗隻燒鵝髀試吓先。餐廳主打燒味，當中包括燒鵝、乳豬、燒腩仔、燒排骨、叉燒、白切雞、油雞，甚至乎連手撕雞亦有提供。我哋點咗兩個一人套餐share食，一個係燒鵝髀併油雞髀飯，另一個係燒腩仔併叉燒飯。套餐除咗燒味外，仲包咗涼拌青瓜、老火湯同白飯，另可加$5 / $8 點埋熱/ 凍飲。燒鵝髀併油雞髀飯（$190）- 燒鵝係呢間餐廳嘅signature，原隻燒鵝髀更加吸引，入囗果然非常高質好味，燒得好香。雞髀亦相當不錯，肉質鮮嫩，入口啖啖肉。燒腩仔併叉燒飯（$80）- 燒腩仔同叉燒都好有驚喜，燒腩仔脆皮，肥瘦適中，入口好有層次。個人特別喜好佢嘅叉燒，燒得非常惹味，肉質軟腍，帶少少焦香及甜味。見有唔少街坊熟客幫襯，店員親切有禮。食物質素唔錯，價錢亦相當合理，下次經開可以再幫襯。

其實呢度啲嘢真係唔錯價錢合理味道好同埋服務都唔錯先講吓呢度啲裝修非常光猛直頭係光到殘眼所以啲嘢食放上枱一睇就知靚唔靚😂唯一美中不足就係佢個地下真係好滑佢滑嘅程度係好似喺油上面行有老人家同行嘅朋友們要注意建議坐門口