天虹海鮮酒家

营业中

休息中

尋晚一家四口去了天虹食飯慶祝母親節,可能因為朝早落過大雨,晚餐時候都唔係太多人.可能人唔多,我覺得呢度d侍應態度幾好,絕對唔會粗粗魯魯.我地揀海鮮時,個經理都好老實,好似我地想食椒鹽瀨尿蝦時,佢話兩隻就夠啦,絕對無迫我地叫太多.食物方面,都好新鮮,雖然瀨尿蝦唔平,但我地食完兩隻後都回味無窮,仲添多兩隻.其他海鮮及小菜亦好好味.食物連啤酒,埋單合共$1,300,同食buffet差唔多價錢,不過食物就新鮮得多,而且唔駛同人迫,都算幾滿意.除了食物好味,呢度又有免費專船來回南丫島及尖沙咀/中環,所以交通都算方便.

都唔好話本地旅遊局辦事不力，原本想車兩個日本仔去布袋澳食海鮮，點知佢地counter-propose去南丫島。問佢地點知果度有海鮮食，佢地就話從旅遊局的小冊子得知。適逢5.1黃金週，都預左會多人，所以一早已訂定位，又選了星期一晚去希望唔好咁多人。呢度有船接送，所以雖然位處離島，亦不算比布袋澳隔涉。呢度星期一都唔算少人，眼見都有唔少檯在招呼外賓，當然少不了的就是我們的國內同胞。六個人叫了椒鹽瀨尿蝦及秘製蟹各兩隻、芝士焗龍蝦、炸魷魚、蒸元貝、蒸大泥鯭、咕嚕肉同炒個菜，另外亦炒了個蝦膏炒飯。可能因為客多，都要等左一陣，又催左幾次，至上得齊所有菜。侍應的態度還不差，不愧為旅遊局推薦的食肆。各款海鮮都算係明碼實價，講明斤兩至拿去煮。價錢當然比環頭環尾的大排檔貴，但都不至貴得離譜，如瀨尿蝦13蚊一兩，本地龍蝦12蚊一兩，秘製蟹100蚊一隻等，始終係出名食海鮮的酒家，唔會以抵食掛帥。見有瀨尿蝦，而客人又想吃，所以就唔捨棄了白灼蝦。瀨尿蝦兩隻都斤幾，大隻好肉，亦多膏，椒鹽整亦治味，但始終是喜歡白灼的味道；秘製蟹聽講是得獎菜，蟹身不太大，都算有肉。個汁是蜜糖黑椒汁，又係幾治味，客人好鍾意，不過在我而言蟹

兩個人去食，叫o左以下4款菜：1. 蝦膏炒飯：冇蝦膏味，同揚州炒飯差唔多2. 上湯龍蝦：十両$120....都算喇，但細到冇人有，大約5-6寸3. 蒜茸粉絲貴妃蚌：$20一隻...抵唔抵真係見人見智4. 豉油皇煎中蝦：例牌$100碟，但只有8隻嗌埋啤酒一支o甘大把，埋單要件$475.....以後唔會幫襯仲有，冇人得閒招呼，隔離枱坐o左好耐冇人執枱，走o左

去食海鮮，都考慮過西貢或鯉魚門，不過最後都係來了南丫島，貪佢有得行下又有得坐遊艇，加上日本人好少可見倒四面環海的海島，所以就來了。兩個人不能叫得太多，見係墨魚季節就叫了灼吊桶，有大隻瀨尿蝦就點了椒鹽瀨尿蝦，再加個咕嚕肉係咁多。吊桶鮮甜，日本妹竟然說可以生吃更好；瀨尿蝦亦多膏，但炸得乾左少少；反而咕嚕肉係我最喜歡吃的菜色，估唔到海鮮店可以整倒正的咕嚕肉，聽講仲係得過獎的。飲埋啤酒埋單兩百多，日本妹都食得好開心。

次次入去南Y島行山.家人都必選天虹作為lunchtime聚腳點.侍應們會主動推介每日海鮮之選(家母絕對係精明的家庭主婦.連佢都話天虹唔會亂sell又貴又唔抵食的海鮮俾客.幾老實).強烈推介如下:1.如果當日賴尿蝦夠大隻.我建議白灼煮.再點甜鼓油食.鮮味彈牙.如果椒鹽.就會浪費蝦肉與蝦膏的鮮美.如果中size..整法就冇乜所謂喇.2. 蒜蓉粉絲蒸扇貝3.白灼墨魚4.天虹秘製蟹5.原隻波蘿咕魯肉6.吉列鮮魷7.椒鹽豆腐最後再叫個炒菜作結.夠喇~順帶一提,天虹有免費船接載食客返皇后碼頭(中環大會堂對出) .班次都幾密.值得一讚!P.S. 不過各食客千祈唔好public holiday去.唔好問點解. 一定捉蟲~

今晚去完食一定要講下, 唔係因為好而係衰到離哂譜。去完發覺完全係水魚俾人搵笨。食物唔好講, 因為我同朋友十個人坐左個半鐘, 叫八樣野先上三樣, 之後叫伙記跟4次都無上, 仲話lee樣無0個樣無, 等個半鐘先同我講無, 你無0野呀....!其實隔離0個仲慘,六點半坐到八點上0左一碟"送" 。所有叫0既海鮮淨係有食0左蝦, 最後頂唔順驚動老細, 仲想昆我食咩龍蝦鮑魚, 我真係唔會咁笨。即刻叫佢取消未上0既埋單, 埋單我想問條數點計仲即刻黑面, 本來話唔計汽水, 最後又計埋。一個粟米都九十蚊仲要差過罐頭湯,所謂招牌咕嚕肉同其他酒樓無咩分別。一心諗住食海鮮點知食到成肚氣,以後都唔會再去。咁0既服務同食物質素, 都唔知點解可以推介俾遊客, 好心唔夠人就請多d啦, 一係間舖就唔好開咁大, 仲以為有咩咁巴閉, 徒有虛名..., 當d遊客係水魚, 唔想受氣就千祈唔好去。我只係將自己的親身經歷講俾大家,天虹唯一0既好處就係有專船,但係依家有專船我都唔會再去, 大家小心d啦。我真唔明點解有人話佢d服務好, 擺明做馬啦.....!!!!!

推介秘製黑椒蜜糖炒蟹, 特別得來真的好鬼好味, 保證食過返尋味。侍應服務反應又快又親切, 日頭對住個海食野真係別有一番風味(夜晚未去過, 唔知會唔會太黑睇唔到野?!)。酒樓仲提供免費船隻來回南丫島同皇后碼頭接載食客, 只要事先預約就OK, 夠晒體貼。

上過禮拜同同事入去食海鮮,幾好食!!首選個魚湯,好鮮甜。龍蝦刺身幾正,食完後個龍蝦頭用椒鹽炸,好惹味!! 佢地d 服務都幾好!! 有禮貌又有效率,對我地要求又無黑面!!

趁週末同成班朋友入來玩,為左等齊人.所以成十點先食晚飯,點知差吾多全部都收哂.得番呢間仲有一檯客,而侍應又叫我地,好彩咋！我地冇諗住食海鮮,因太貴了.但佢地都好好招呼.又介紹我地食Ｄ平平地既野～白灼蝦～好大隻,新鮮.蒸蟶子～又係好大隻,豉汁蒸～好味！生炒骨～酸酸甜甜,好開胃.天虹炒飯～有好多蝦,吾乾,好正！豉油王炒麵～吾知點解,覺得好好味！我地係最後一檯客,個侍應話Ｄ野大碟左嫁！可能冇乜客,所以Ｄ侍應招呼好好,又同我地傾謁.仲送左船飛,庶水買二送一,仲送生果.其實可能人人都有得送既～但佢地冇趕客.又好笑容,所以我地都食得好開心呀！

有檯都未必有人招呼，都係平日去好d，不過佢愈做愈大，愈來愈旺，以前真係幾好服務，依家太多人了，邊有人招呼你。不過?始終係我食海鮮地方的首選。

Would it be due to Easter holiday, more and more people went there and therefore service level is somehow affected.My friend told me the food quality was great, and as I've never been there before, I hope the service will be better.

復活節假期幫襯晚飯,無人招呼,無人加水,自己排隊落單,每隔十五至二十分鐘才上一度菜,那碟酥炸生蚝經多番催促,最後告訴你說沒有,白等了半小時,對唔住都無聲