和井鐵板燒專門店 (已結業)

本來唔係去呢間日本野度食嫁不過又想食鐡板燒所以就揀左最就腳既旺角入到去~好細~不過鐡板燒既BAR 檯好大張~係一種視覺上既享受而且佢既抽煙設備唔錯~我地食完個身都唔係好大陣味講返D菜食我地一行7人所以叫左好多野食~我地就左個鮑魚定食2人前~328元有SALAD,有味噌湯,有炒雜菜,有燒安格斯牛肉有鮑魚啦當然,有黃金炒飯...EXCEPT頭個2樣~其他都好好食牛肉超讚鮑魚爽口日本米炒飯一流~!之後當然仲叫左其他野啦~有三文魚刺身啦~佢地話好新鮮豆腐&牛肉雜菜WALL~~~好好食~其他不同既燒牛肉~唔使問食餐好好食呀!而且位位都係130左右~值服務唔錯呀~無MISS單又成日都潻茶~

昨晚與太太及家人共4人去食鐵板燒，之前食開第二間已多年，覺得質素越來越差所以就轉o下試和井。我叫左一份銀雪魚二人餐、豬軟骨拉麵、雜錦壽司盤和軟殼蟹三文魚飯卷。總括鐵板燒的食物質素都唔錯，服務都幾好但係唔知點解會收茶錢五蚊位，仲有就係上菜次序好亂，景然未上曬D主菜就上左甜品先。個拉麵湯底幾好味，用既麵質有D似味千拉麵果種，都OK。要彈既係雜錦壽司，有12件約一百五十蚊，但係質素就差過Neway果D自助餐既壽司好多。D飯好似求其渣買一舊咁好散、舊甜蝦壽司隻蝦梅梅o地、大部份壽司上面舊肉都唔新鮮。我覺得如果唔識做壽司就不如唔好做，好似元氣壽司咁淨係賣壽司唔做拉麵。軟殼蟹三文魚飯卷既軟殼蟹OK，但係三文魚同之前提既雜錦壽司一樣好唔新鮮，D顏色灰灰黑黑咁。如果再黎，會淨係食鐵板燒，其他野就咪啦！

琴晚係一個一號風球既晚上, 無乜風, 但好大雨. 同女朋友睇完"五粒星老鼠"之後. 就提議去和井食晚飯. 因為係網上睇到好多好既食評. 所以就黎試下. 其實我第一次食鐵板燒係上個月出差時係天津食過. 但係價錢就差好遠啦~ 天津係大概RMB90/一位.琴晚我地叫左一個大蝦二人餐. 頭盆係凍豆腐粒配番茄仔同埋生菜. 酸酸地, 幾開胃.跟住就到三文魚刺身, 麻麻地, 肥o的會好o的.食左呢兩樣後, 到主菜啦. 有大蝦同埋魚柳.大蝦不愧為主菜- 超好食, 好彈牙. 正正正!!之後到魚柳- 好重既牛油味, 好香, 好食!仲有脆瓜配東菇- 同樣係有牛油味, ok!食左主菜之後到配菜, 有牛柳, 炒飯同炒菜. 期間仲有啱啱未食既蝦頭.蝦頭- 出自同一隻蝦, 所以亦係高水準之作. 正呀!牛柳要五成熟- 剛剛好, 不過中心仲有少少凍.而牛柳既根就用同埋o的菜一齊炒, 但係好似炒得耐左,所以變左牛肉乾. 但係都ok. 如果下次無咁乾會非常好.炒飯就可能因為我地太飽, 無乜點食. 只可以講o的米係日本米, 有o的"臨".今次最唔好既係跟餐既麵豉湯. 好淡.呢間餐館既服務都非常好, 待應好有禮貌, 同會不時加

幾星期前去了一餐，我地一班十幾人去食。全部坐晒bar。之後我地決定由師傅話事，叫幾個餐share食。見到師傅手起刀落，非常乾淨利落，之後又玩火，睇表演一樣。之後同師傅有講有笑，十分好玩。至於食物方面，我地叫了蝦，龍利，帶子，牛扒，薄牛肉，炒飯，菜。最好食係果薄牛肉，之後係帶子，好好味。薄牛肉少少生又卷了點蔥同熟蒜，帶子好大粒，好鮮甜好"林"。至於牛扒就太熟，硬了點。整體都不錯，價錢略貴。每人差不多$200。不錯的選擇。

中午同朋友食飯，一直都好想感受鐵板燒的威力，見食評好似幾好，就入去試試。點了一個雪餐，另加兩個午餐，食物斷斷續續地送來。先有雪餐的沙津，接著是金菇肥牛卷加炒雜菜，雞扒炒麵；再來是午餐的蟹子炒麵、手卷、壽司同冷麵。午餐的食物好普通，反而雪餐的金菇肥牛好出色，d汁同街邊食的有點不同，她加上了燒牛肉的肉汁，比平時的更突出。雞扒炒麵麵身少少彈牙，個汁同是最得！食多幾碟都ok！服務態度不錯，食物都算幾好

口痕想食鐵板燒~ 喺旺角孤陋寡聞的我真係諗唔到去邊食…只知道呢間咋！旺角區嚟講不但收費唔算平。但勝在小店企理整齊坐得舒服，仲不用等位、邊食邊hae都冇俾人趕。開心~食鐵板燒本應坐bar 枱睇師傅們手藝。一來平日食開飯習慣面對面eye contact 傾偈；二來我都唔想邊食邊影…搞到師傅又壓力我又壓力。我覺壓力咪大鄉里咁囉！hee…不好意思嘛！當然又躊躇揀咩二人前sets！店員告之當中最受歡迎係大蝦鐵板燒($368)，但我又心多喜歡另一個日本帶子皇套餐($396)。已對比兩個餐牌，當中有2/3相同，而嗰1/3的差異咁啱係我唔鍾意的…所以揀了帶子餐囉！大約內容如下：豆腐沙律雙色刺身(三文魚三件吞拿魚三件)日本北海道帶子皇銀雪魚日本雜菜安格斯牛薄燒日本黃金炒飯味噌湯各一甜品各一(香芋牛奶布甸)事後諗返鬧扇貝恐慌走去食貝類。傻咗 =.= touchwood...豆腐沙律都係沙律菜、蕃茄嗰類啦！個汁同和宴差不多~ 都係酸酸地似醋咁。當然呢度蕃茄係普通蕃茄啦！豆腐一來我一開始冇期望所以冇落功夫考究；二來都係軟豆腐蛋白質感。刺身色澤ok 味道ok ~ 而我唔係嗰種單睇色澤靚就話件魚生靚的人。因為時代

為左慶祝男友的一個喜訊，決定食d特別d既野。初時入到呢間餐廳覺得佢好普通，真係想像唔到有咩特別，只係一入黎見個店主好nice咁幫我地搵靚位、掛外套同介紹menu，感覺慢慢改觀。跟左suggestion叫左個蝦set，因為眼前就係個鐵板，所有製作都睇得好清楚。食物幾新鮮好味，esp個蝦同牛扒，good~最warm既係圖中呢位哥哥見我冇食到個蝦頭，問我點解，我話佢知我唔識食呢個部份，因為覺得好核突，佢就收左返去，用果把好利的「鏟+刀」幫我切開可以食的部份，令我咁大個女第一次食到蝦頭的滋味，男朋友都自愧不如(因為佢冇一把咁既刀，幫唔到我……)﹗雖然個set差不多$400，一餐dinner黎講，esp0係旺角而言都唔係平，不過真係好有特色。可以睇住佢整食物既功力、食物同油同個鏟同抽油煙機的聲音，仲有食落去的新鮮味道，真係幾難忘的~

今日放工後又o黎呢度食lunch.叫o左鰻魚飯定食,"風"和"梅"套餐."風"套餐有前菜,沙律,味噌湯,玉子豆腐,炒什菜和黃金煙肉炒飯;"梅"套餐有味噌湯,燒帶子,金菇肥牛卷,炒什菜和御飯.今次食物的份量比上次少,味道ok.就算假日也不收加一!來這裏吃午餐的話也算是個不錯的選擇.

o尋日約o左舊同事飲茶,點知病o左o黎唔到,唯有自己食,入o左呢間試下.叫o左個特價午餐--板日式豚肉薑汁燒.先來沙律--只有生菜,一兩粒粟米和千島醬,太少料;蜆肉味噌湯比一般的淡,味道ok;炒什菜不太油,ok;板日式豚肉薑汁燒的洋很好味,豚肉薄切,味道不錯但有點乾,炒什菜和豚肉薑汁燒份量不少,一個人吃很夠飽.

呢日黎到旺角,本來諗住去BB 特區食buffet. 可惜太早黎到仲未開門,見到對面間"鐵板燒"記得朋友同我介紹話幾好食,於是就試下啦. o係旺角區黎講,呢間餐廳大細都算一般啦,可能佢都係岩岩開店,d waiter 都未開工,得一個男waiter...不過態度都好好... d 野食好正,o係入面煮緊都聞到香味(可能係我太肚餓啦~) 拎到黎,睇上去份量雖然少d, 但味真係一流.好難忘,下次再俾我選擇bb 特區or 鐵板燒,我諗我都會選擇呢度!!

等左一陣先有位,坐在對燒板燒,廚房門口的位置,舖頭狹窄!坐得好唔舒服!當晚係一個男師傅,黑口黑面的...我們點了大蝦套餐,和一些壽司,小食後服務員將餐具及豉油等送到台上,服務員不小心將豉油潑到我的衫上,她只拿她手上用來抹台的台布給我抹,自己怕老闆看到她倒瀉野,拿拿聲抹地,我也聽不到她對我說不好意思!!也沒有拿紙巾給我!抹完地就像沒事發生一樣!!就算茶餐廳也不會這樣吧!味道還可以,食物很細份!!感覺不太抵食

我們坐在面對鐵板燒位置，近距離見到一個女大廚表演日式鐵板燒。她的手勢一流，整頓飯十分富娛樂性！我們點的鐵板燒有原筒魷魚、金茹牛肉卷、炒雜菜拉麵，味道很好。鐵板以外的有三文魚軟殼蟹反卷和炸餃子，兩味也不俗，不過也不便宜呢。

呢度既set份量好少...而且唔知係咪多人d嘢好亂(dinner時間)嘢食都ok得但未至於咁貴......

06年2月5日上網睇到係旺角新開咗呢間鐡 板燒,我想應該好過漢x既,就去試下啦.入到去都幾細間,不過如果d野食好食都無所謂啦.叫咗個大蝦餐.都好似幾多野食.首先就黎個沙律,唔好食之後就係三文魚.都無咩期望,一咬之下,嘩,有雪係面既,放棄罷啦.終於都見到師傅燒啦.睇佢都幾熟手,不過個師傅就口黑面黑咁囉.所以個胃己經開始縮勒.都算勒,隻蝦大就大,不過就淡而無味.之後好似係雜菜,都ok.之後就係唔知咩扒,話就話用紅酒焗過,係有紅酒, 但就勁難食囉.食咗一舊之後,我同我男朋友眼光交流之下就叫佢上甜品.係雞蛋布甸.好漏...總括黎講都好難食.我之後仲肚痛添.唉!!

女人街真係越來越多特式食係旺角女人街食日式鐵板燒以前真係唸都冇唸過今次我地叫左個二人前帶子套餐價錢可能係貴但真係物有所值坐係吧睇師傅的手藝已經值回票價啦何況d食物質素都唔錯又新鮮下次一定要再去過試埋佢地其他的套餐