利強記北角雞蛋仔

营业中

休息中

星期六陽光普照，人也精神一點。同老婆去北角食札幌拉麵，在港運城落車，見到這間聞名已久的雞蛋仔店已經排了一條五人的小人龍，我地當然唔執輸又排埋一份。呢度係用電的夾板，始終兒時食開的火燒鐵夾板已經幾難搵。見佢一開就六個夾板一齊整，雖然一底底的雞蛋仔密密出，但見前面排隊的是兩、三底的買，加上老闆如果見烘出來的效果未如理想的話，會扔掉再烘，所以都要等成十分鐘，我地果底雞蛋仔至可以到手。雞蛋仔果然外面脆脆的，而入面又軟綿綿，蛋味略欠，但比較起街頭巷尾的喇喉雞蛋仔已經高一班。呢度標榜不用色素，是否如此不得而知，但雞蛋仔的色水不是刺眼的黃。難怪呢度唔算旺舖，前面又無巴士站都咁多人排隊。載雞蛋仔是一個刺了圓洞的紙袋，用意是疏氣以免在紙袋內的雞蛋仔變腍，幾有心思。9蚊一底，價錢應比其他地方貴一蚊至兩蚊，但喜歡雞蛋仔的是值得一試。除了雞蛋仔，用同一原料製作的窩夫亦有賣，不過因為要另外烘，所以要買就要早揚聲。同老婆在舖外食雞蛋仔，見佢一路都有不少於五個人在排隊，直到我們食完札幌拉麵再經過，都仲係有五、六個人。賣雞蛋仔賣到成日有人排隊，呢度都算犀利。