元朗新記 (吳松街)

营业中

休息中

元朗呢間新記雞粥食咗好多年，由以前喺街邊擺檔到喺元朗開舖頭，冇諗到咁多年之後開到周街都係分店，不過依家同以前就好唔同啦，依家乜都有得食，除咗招牌雞粥，炸乳鴿 ... 而家仲有小炒同炒飯麵食。佐敦呢間店應該都幾新，價錢真係好親民，又貼地，平均幾十蚊一樣野！清蒸盲糟$54-食河魚最怕有泥味，蒸得剛剛好，份量都唔細，出街食飯幾十蚊，真係算好好。鯪魚球$49-正正正正正，必點鯪魚球，炸到脆卜卜，加埋個汁，而且鯪魚多，唔似出面有d好大舊但得舊粉咁。脆皮乳鴿$59-乳鴿出名都係有道理，又大隻又炸得香脆，重點係外脆內滑仲好厚肉，呢個就係點解呢間餐廳可以一直做落去既主要原因。菠蘿咕嚕肉$63 + $5 有野飲 -同事話要叫小菜食，酸酸甜甜夠開胃新記招牌雞粥$57-又到招牌野，必叫呀喂，雞係雞髀，但好鮮甜又好味，個粥煲得夠晒棉！欖菜四季豆$52- 送飯一流既四季豆，如果份量再多d會更開心😁鹹魚雞粒炒飯$50-夠獲氣先炒到好食既炒飯，加少唔會太多油，一粒粒飯夠分明。總結來講新記繼續真係CP值好高既餐廳，真係食多幾次都唔唔悶呀

馳名新記雞粥今日收左工同幾個同事一齊食飯，試下佐敦間開左冇幾耐既元朗新記，亦即係好出名既新記雞粥，因為價錢都唔貴，我地又好餓，咁就每樣叫d share一齊食，咁就可以試多d野。樣樣野都唔錯既，第一推介係乳鴿，好小食到咁大隻既乳鴿，又多肉又外脆內juicy，下次要再食，跟住第二推介係雞粥，我地叫左豬潤雞粥，雞好滑好入味，豬膶好新鮮。雲吞都好推介好抵食，38蚊8粒大大粒。仲有鯪魚球都好出色。叫左幾味家常小炒同炒飯，好飽好滿足。佢選擇好多所以下次要再試其他喇😂

元朗人在佐敦收工，十分肚餓，見到雞粥又幾想食🤭 坐低先發現原來唔止雞粥，仲有好多野食，睇完成份menu都要幾分鐘呀！由於太肚餓關係，就叫左雞粥、蜆介鯪魚球、XO醬叉燒炒蛋、腐乳椒絲通菜，再加個白飯。招牌雞粥十分抵食，綿綿的粥滲滿雞肉鮮味，雞件份量多，真係落足料，一人食一碗的話已經很夠了。蜆介鯪魚球，超大粒，配上蜆介汁鮮味更突出，這個是必點的呢👍🏻XO醬叉燒炒蛋，識食緊係要餸飯啦😋平時食開的叉燒炒蛋的叉燒係黏著半凝固的蛋漿，呢個叉燒炒蛋就有小小唔同，佢既做法比較多汁，不過鹹鹹的肉汁餸飯一流，都可以！食左咁多肉，都要食返少少菜😆腐乳椒絲通菜，不過不失。最後飲返杯泰式青檸冰，清清喉嚨，爽呀👍🏻

食過幾次旺角新記, 佐敦分店就第1次食, 應該係新開無耐? 裝修比旺角既新, 相比起依度就大d而且d位更闊落更好坐, 呀d店員仲幾好禮貌添海蜇手撕雞小食黎講佢比我想像中大份, 堆到座山咁, 佢既醬汁比平時食開既杰d, 麻油味好香脆皮乳鴿黎新記必食既有兩樣, 第1樣就係乳鴿焦脆既外皮, 一啖咬落去油香滿溢, 而家打字都流緊口水貴妃雞粥必食之選乳鴿外就係雞粥, 馳名雞粥真材實料, 雞肉咸香, 煲出黎既粥鮮味又綿綿的, 砂鍋上食落份外好味XO醬cha燒炒蛋炒蛋粉炒得好好, 係炒滑蛋既狀態, 同蔥花完美融合, 面頭加左xo醬辣辣地惹味d, 唔中意食咁油既人可以選擇唔加架~ 份量都幾大, 兩個人食都夠有突!!清哂! 不過佢份量大既關係有d過飽, 可以叫少一樣野食, 抵食!!叫完杯熱豆漿先發現原來有湯可以加既, 唯有下次飲啦~

今日約了朋友在佐敦食lunch，友人建議去新記雞粥，話之前在旺角食過唔錯，呢位挑剔的人話ok應該不會伏的。我們兩個人，點了兩個餐加一個小食，分別有生滾貴妃雞粥配炸兩、XO醬叉燒炒蛋飯和炸魷魚鬚。先上枱的是XO醬叉燒炒蛋飯，炒蛋的賣相美觀，顏色鮮黃，生熟程度恰到好處，配上鋪面的XO醬，增強味道層次又不失炒蛋香味。至於生滾貴妃雞粥，粥的份量夠，粥底棉滑，雞件入味，水準十分高，午市生滾粥套餐跟腸粉，我們選擇了炸兩，一份九件，油炸鬼脆口，腸粉薄滑，不錯、不錯。今次最驚喜的，反而是小食，魷魚鬚即叫即炸，入口時還是熱辣辣，炸漿薄薄的，另人食指大動。吃了咁多東西，捧着肚子離開，埋單都只不過是$160，性價比超高。

有間食店講到好出名雞粥。。走咗嚟佐敦開分店。。昨晚終於有機會試吓😍。。一開始落單有個女店員係呆滯d。。重複講左三次先至成功。。但總算都係OK啦。。整體個粥同炸兩都好食。。最難得個炸兩係熱同脆👍（晚上9點多）。。叫咗碟海蜇燻蹄其實理論都唔想拎入廚房換。。。但係上枱嘅時候真係接受唔到囉😵。全部燻蹄好似頭頭尾尾食淨咁🤦🏻‍♀️🤦🏻‍♀️。。迫於無奈都要換。。換完果碟靚仔好多。。咁先至見得人😋還有一味干扁四季豆。。足料不過。。炒得唔入味。。有待改善😬

今日食左下午茶 所以都冇乜胃口 想食下粥 原來佐敦都開左呢間新記雞粥 所以今晚就食粥啦 〰️貴妃雞粥〰️$51呢個係我每次都必食既粥呀 今次食都仍然保持到個水準 雞味好濃 聞得到好香 而且個粥底真係煲得好綿 真係好回味 〰️紅燒元朗脆皮乳鴿〰️$59叫得個粥梗係要叫埋乳鴿食啦 好似上次食咁個皮仍然係炸得好脆既 但入面既肉又唔鞋 加埋d准鹽真係好正〰️椒鹽豬扒〰️$55我加多左$16轉餐 個餐包括一碗白飯及一杯飲品（凍飲加$3）豬扒每塊都好淡淡肉及頗厚 冇乜骨既 煎得每塊都金其色 最吸引係d蒜係好多 用黎撈飯一流 而且豬扒都幾多塊架〰️魚香茄子煲〰️$52茄子好淋 用黎餸飯好惹味

經過這間新開的粥店，見幾多野食，入去試下！雞粥粥底有雞肉鮮甜，而且雞件多又夠滑。香脆炸大腸炸至表皮脆口，裏面還帶了大腸內壁的肉，很有咬口。蜆介鯪魚球大粒過乒乓波，裏面啖啖鯪魚肉，十分彈牙，加上咸香味十足的蜆介汁，味道更能提鮮。蒜泥汁脆皮豆腐豆腐炸至表面金黃香脆，裏面嫩滑，細細件正好一口一粒，蒜泥汁帶點醋酸，令豆腐不至太油膩。帶子肉片炒麵炒麵雖然不油膩，但比較乾及硬，味道一般。椒絲腐乳炒通菜通菜爽脆，腐乳的咸香味十分夾，亦不會過咸。最後飲了杯五花茶，味道夠濃又不太甜，食完炸野真係可以下火。

這一段時間外出食飯多數是食西餐，今晚想清清地，就同老公兩個人去了食粥。這裏最出名的是雞粥，除了粥外，還有多款小食、炒粉麵等。紅燒元朗脆皮乳鴿乳鴿外皮表面香脆，而且厚肉，肉質嫩滑保留了肉汁。海哲薰蹄薰蹄點上醋汁減輕油膩感，海哲有咬口，作小食一流。鮮蝦腸粉腸粉又薄又夠滑，而且大隻新鮮的蝦肉，非常爽彈。貴妃雞粥雞粥有至少五至六件雞件，雞肉保持嫩滑，而粥底亦都有雞油香味，既綿滑又鮮甜。油炸鬼食粥點可以無油炸鬼呢！炸得鬆脆又細心地剪開一件件，方便食用。