Dim Sum Library

呢間餐廳以創新手法演繹傳統粵式美食，加入矜貴食材製作點心🥢另外供應經典雞尾酒、葡萄酒，同新式中國茶雞尾酒🍸💗海膽蟹肉春卷 ($92/ 4件)春卷炸得鬆脆而不膩，包住滿滿蟹肉沙律🦀最後放上新鮮海膽，味道奶滑鮮甜🟠💗雲南黑菌手撕脆皮雞 ($210/ 半隻)雞皮金黃香脆，皮下脂肪少，手撕雞肉嫩滑多汁，雞味濃郁🐓帶陣陣黑松露香，香氣十足💎💗鵝肝桂花燻糖心蛋 ($118)糖心蛋爽口滑溜，蛋黃半熟流心，帶清幽桂花薰香🥚放上香煎鵝肝，味道醇厚甘香，油香四溢，入口即化🦆💗虎蝦XO醬餃 ($78/ 2件)餃皮加入紅菜頭汁搓成，口感煙韌薄身，包住鮮美飽滿嘅鮮蝦菠菜餡🦐面頭放上爽口彈牙嘅虎蝦，XO醬微辣惹味🌶💗巴馬火腿蘿蔔糕 ($88/ 3件）蘿蔔糕口感柔軟Q彈，有少量蘿蔔絲同臘味粒🥕用巴馬火腿包裹後煎至焦香，更鹹香惹味🍖💗黑蒜燒賣 ($68/ 4件）用上半肥瘦豬肉、鮮蝦同冬菇粒做成餡料🥠特別加入黑蒜，味道甘甜香濃🧄口感爽滑鮮嫩，以蟹籽點綴💗香芒流心脆杏卷 ($58/ 3件)杏仁酥皮卷外層香脆鬆化🥨內𥚃包住芒果流心醬同新鮮芒果粒，味道酸甜開胃，帶微微牛奶香🥭…查看更多

位於太古廣場呢間fusion餐廳係Aqua𣄃下，我好早之前我已經book mark左，不過一直未有機會試，今日就襯住朋友生日一早book定位黎try try🥳😋擔擔湯包 $72/3件一咬落去啲湯已經湧出黎，做到皮薄餡靚，味道有少少酸辣，好似四川湯底咁，但又唔會辣過龍，做前菜夠晒開胃啊ˊᵕˋ)੭🥠海膽蟹肉春卷 $92/4件淨係個賣相已經好加分，點知食落仲有驚喜，海膽好新鮮，而且呢個配搭係出奇地match，食落好有層次感🐔雲南黑菌手撕脆皮雞 (必嗌) $210/半隻呢個係我同朋友評價最高既一碟，雞皮薄得黎燒到好脆好香口，配埋黑松露味既手撕雞🤤超級有驚喜，下次黎都一定要order🥘石鍋葱香鵝肝和牛炒飯 $258鵝肝配和牛一定無得輸( ´ ▽ ` )ﾉ啖啖飯都食到濃郁既鵝肝香味，鐘意食飯焦既你唔好錯過🦐蝦球蚊伊麵 $198呢碟菜係最後先上，由於之前食既野全部都好好味所以我地既期望都好高，但end up呢個伊麵係有少少失望，伊麵個汁好淡無咩味，不過蝦球都算爽口新鮮🥬花膠魚湯津白 $138整體不過不失，我覺得可以留啲quota試點心…查看更多

Dim Sum Library主打中西合璧的fusion菜，對於不好傳統中菜的人來說頗有新鮮感。擔擔湯包🌶一咬破外層，濃濃的擔擔面湯湧入口中，味道濃郁，層次豐富亦且不會過辣。海膽蟹肉春卷🦀海膽鮮甜，春卷皮鬆脆不會過厚，內裡包裹著蟹肉一起吃，鮮味十足。上海燻蛋擔擔面🍜湯底不會過淡或過咸，亦不會只吃到辣味，但對喜愛花生味的人來說，略嫌不足。雲南黑菌手撕脆皮雞🍗黑松露非常香，雞肉嫰滑，外皮亦十分香脆，令人食指大動。值得一讚的是點心份量是按照人頭上菜，非常貼心。 …查看更多

為增進家人彼此間o既感情，大肥爸爸決定每當哥哥回家時都要一家四口外出搞搞新意思，小肥就提議四周尋訪新食肆。肥肥家族咁為食，大家當然舉腳贊成，上週四先從飲食雜誌搵咗間連晚市都有點心o既「Dim Sum Library」飲晚茶。餐店位於金鐘太古廣場，除咗搭地鐵容易之外，自駕食客消費滿$300即可憑單據括免於商場停車場三小時o既泊車費。地點雖說係超級方便，但係個門面就唔係咁突出，XO仔首次光臨都要靠大堂o既服務員指引先搵得到。店子室內光線較暗，接待處身後有一排半梳化式合拼散座。另一方則為酒吧。貌似屏風o既牆身印有花卉雀鳥o既圖案，四周亦可見不少雀籠鮮花擺設，裝潢新潮得黎帶份詩意。酒吧後面o既大堂寬廣闊落，黑色木造o既大小餐桌分佈於堂內，空間感好足。穿過暗黑o既走廊秘道，先經過兩張二人卡位。真係估唔到入面仲有間咁大o既內廳，其中三張餐枱更可搖身變成麻雀枱添！同一般茶樓唔同，「Dim Sum Library」並無收取茶錢，四口子就各自點選汽水同雞尾酒。小肥因身兼柴可夫一職，當然係睇住家人飲啦！桌上黑底金邊金字o既餐具及餐牌充滿著時代感。雖則餐廳以「Library」起名，但餐牌只有六頁，單點項目唔多，又冇相睇，講真都有少少失望。幸得樓面一位溫婉落力o既妹妹仔自動上前講解及推介，我地先唔洗用網友喺OpenRice上刊登o既靚相點菜。黑椒和牛酥（$88/三件）：金黃色o既和牛酥外層鬆化乾巧，中間o既黑椒和牛餡心潤腍惹味，送酒一流！松茸冬菇包（$52/三件）：外觀與原隻冬菇無異o既冬菇包其實只係外皮劃上冬菇紋理，不過造型實在逼真。冬菇包熱辣鬆軟，松茸冬菇餡料清香鮮美，好睇又好食！擔擔湯包（$48/三隻）：餐牌上並無列印任可插圖，只有門外展出一幅「擔擔湯包」o既硬照。眼見都幾吸引，哥哥又嗜辣，所以就叫咗客黎試。未有用上獨立小籐籃承載o既湯包實物遠不及參考相片美觀，但勝在皮薄湯多，香辣醒神，成功挽回不少分數。海膽蟹肉春卷（$88/四件）：春卷本身好夠香脆，連同海膽一口食落肚，鮮味滲滿口腔，唯一唔係好食得出內含蟹肉囉。黑松露蝦餃（$48/三隻）：多咗松露黑點o既蝦餃皮軟韌得黎唔會過厚，蝦餃爽甜味清，很是討好。蝦餃屬大路點心之一，一籠卻只有三隻，建議餐店可讓大圍食客續粒加點。雲南黑菌手撕脆皮雞（$195/半隻；$390/一隻）：亮澤o既手撕雞如餸名般脆皮，手撕雞肉幼嫩芳香，四個人要食哂一隻絕非難事！手拍蒜炒菜苗（$88）：蒜炒豆苗翠綠脆嫩，簡單美味。蔥燒石鍋和牛肉（$308）：原石鍋上o既和牛熱就夠熱，不過和牛份量唔多，好難先搵到黎食，食落更是油膩溜滯，毫無肉香，可謂失敗之作。花枝響鈴炸兩（$68）：個人覺得炸兩唔係好夠熱，上枱時亦偏咗少少腍，不吃也吧！砵酒燒脆蠔（$268）：燒蠔體積大就夠大，可惜層炸皮過厚且黏，又唔夠熱，失色得很！星洲黑豚叉燒炒米（$168）：米粉炒得好夠乾身，蝦隻亦爽厚鮮脆，微辣o既調味都好醒胃，個人只係略嫌黑豚叉燒唔夠肥潤。薑蔥龍蝦包（$88/三件）：肥嘟嘟o既龍蝦包外表似乜就無謂多講。白色o既包包暖手軟身，橙黃色o既龍蝦餡雖未夠豐盛，但就鮮濃爽潤，實屬不錯之選。流心可可糯米糍（$42/四粒）：糯米糍煙煙韌韌，個朱古力心流心滑溜，甜而不膩，用上朱古力做中式甜品o既食材，細佬應該都係第一次食到，幾有驚喜。XO仔讀得書少，成績仲要係油麻地嗰隻，一聽到「Dim Sum Library」個名，腦海只浮現出「點心圖書館」，一心諗住食店本餐牌應該會喺本又厚又多靚相o既圖冊。食後方才發現餐店用上不少國際食材，如黑松露、海膽、和牛、黑豚、朱古力等，獨創出一系列新派精品點心，店名似乎係有「點心珍藏館」之意。「Dim Sum Library」環境開揚新潮，點心菜式大多美味有特色，埋單時發現原來新店屬「Aqua集團」旗下，唔怪得知各方面都流露出潮意，服務生亦訓練有素。…查看更多