有咩幸福得過可以瞓到自然醒再去食個豐富嘅Brunch？咪就係搵到另一半（當然好朋友都得啦）同你一齊食一齊幸福肥囉。開飯仔幫大家搵嚟人均$200-$400，選擇豐富有特色又抵食嘅Brunch，啱嘅話就記得Book定枱啦喂。
中環16道招牌西班牙菜 Ole Spanish Restaurant
圖：Yan~*
呢間西班牙菜館晚市嘅價錢真係算唔上平民價，但好彩每逢星期六同公眾假期都會供應16道招牌菜嘅Brunch。而且唔係以自助餐形式，而係由侍應逐一送上，包括12款招牌 Tapas：番茄凍湯、洋蔥薯仔奄列同凍肉拼盤等。之後仲有三款主菜：塞哥維亞式烤乳豬、傳統西班牙海鮮大鍋飯，是日精選西班牙大鑊飯同四選一嘅甜品，方便各位懶人坐住一邊吹水一邊嘆美食。
供應日期：逢星期六及同公眾假期（星期日休息）
價錢：成人$380，小童（4-9歲）$228（另收加一服務費）
灣仔意大利家庭菜 Pirata
呢間意大利餐廳位於29樓同30樓，運氣好坐到窗邊就有靚景附送，不過稍嫌用餐環境比較狹窄。講返嘢食，佢地嘅Brunch包括芝士凍肉拼盤、三款前菜、七選一主菜同是日精選甜品。而且外面嘅Buffet枱亦有唔同嘅凍肉、芝士、沙律、燒牛肉同醃三文魚，畀大家隨時Encore。主菜推介即刨黑松露意粉或者The Butcher’s cut，前者富黑松露香味後者夠外脆內嫩。
供應日期：逢星期日及同公眾假期
價錢：$298（另收加一服務費）
尖沙咀靚景Semi-Buffet Ambrosia Oyster Bar & Grill
餐廳位於商場28樓，勝在有270°落地玻璃，望住維港景致食嘢更有Feel。而佢地嘅假日半自助早午餐包括每人三隻即開歐洲生蠔，質素有保證。而Buffet枱嘅頭盤以西班牙為主題，包括多款Tapas、Pintxos同西班牙凍湯，亦有凍肉及沙律。九選一主菜當中推介足料嘅虎蝦意大利粉同外脆內嫩嘅香蒜煙燻紅椒烤雞。最後食埋Buffet枱嘅甜品畫上甜美句號。
供應日期：逢星期六、日及同公眾假期
價錢：成人$298，小童（4-9歲）$168（另收加一服務費）
更多【二人前指南】： |
中環中式悠閒Brunch 禮賓傅
圖：fufuchau
近年多咗摩登中菜館，呢間裝修走復古風嘅亦唔例外，破格推出中菜早午餐，畀大家以新方式試盡由昔日香港禮賓府嘅大廚鍾建良主理嘅手工粵菜。最新嘅早午餐Menu包括四道前菜，四道主菜同一道甜品。當中清爽嘅象拔蚌仔配粉皮，秘製桂花魚老雞燉鹹酸菜，招牌菜禮賓傅炒飯，同滋潤嘅蛋白杏仁茶都係出色之作。
供應日期：逢星期六
價錢：$280（另收加一服務費）
金鐘食勻意大利風味 Operetta
同樣係意大利菜，呢間餐廳就以意大利唔同地區嘅菜式做主題，而且可以選擇加唔加主菜，選擇多又夠靈活，抵讃。Buffet枱主要分為各款凍肉、芝士、沙律等凍盤，肉丸、乳豬、千層麵等熱盤，同焦糖燉蛋、慕斯蛋糕、Gelato等甜品三大區域。不過開飯仔建議大家可以留肚嗌份主菜，好似玫瑰牛柳、薯仔意式雲吞或者Pizza，都富有意大利菜特色又方便Share嚟食。
供應日期：逢星期日
價錢：成人前菜及甜品自助餐$208，另加每道主菜$130，小童（包自助餐及一道主菜）$128（另收加一服務費）
灣仔西班牙菜館Semi-Buffet The Optimist
圖：MI200909
其實呢間西班牙餐廳平日都會供應Semi-Buffet Lunch，不過星期日供應嘅Brunch項目更多元化！首先Buffet枱有火腿、芝士、沙律、西班牙蛋餅、凍湯及幾款Pintxos任食。不過記得唔好貪心拎太多，因為另外仲有三款頭盤送上枱，當中一定要留肚食嘅係Broken eggs & Huevos rotos！而主菜一樣有分量，最後照顧埋另一個胃食埋甜品，大滿足。
供應日期：逢星期日及同公眾假期
價錢：$348（另收加一服務費）
文：Cathy