Get set go!长沙湾一站式试匀多国菜
2016-08-24
一日三餐,即系每日都要谂至少三次食乜好。好彩香港系美食之都,唔同国家风味嘅菜式都搵得到。唔信?去长沙湾行个圈,你就会发现到港、日、法、泰甚至葡国菜都有!由呃Like小清新甜品到重口味浓厚沾面,由新派Fusion菜到老香港小食,喺长沙湾呢个旧区都有齐哂。

葡国代表:平民优质传统葡菜  BOM Cuisine


图:大胃鹏

唔洗飞去葡萄牙,连大海都唔洗过就叹到正宗葡菜?无错,嚟长沙湾呢间多国菜馆就有喇。辣肉肠配马介休炒饭嘅辣肉肠惹味不在话下,马介休亦咸香诱人,浓而不腻。另外招牌葡萄牙烤乳猪配番红花饭啱哂食肉兽,乳猪肥瘦适中皮脆肉嫩,连番红花饭都系粒粒分明带特别香味。

泰国代表:住家菜Feel泰滋味  


图:iamissyee

食泰国菜唔一定要去九龙城嘅,呢间楼上小店水准亦唔错。先嚟一碟生虾刺身,生虾新鲜肉厚,配上加咗辣椒蒜片等调配嘅鱼露,酸辣冰冻够开胃。人多嘅话就可以嗌有齐炸虾饼、鱼饼同春卷嘅小食拼盘,同色香味俱全嘅冬荫公汤一齐开心Share。拖友们两个人亦可以叫青木瓜沙律同泰式炒粉丝,一样泰滋味。

日本代表:重口味隐世沾面  海老名沾面


图:ki918

非常低调嘅门面,低调到随时走咗宝都唔知。小店主要供应虾汁酱油、虾汁味噌,同虾汁蕃茄呢三款口味嘅沾面。沾汤用咗用上大量猪骨同樱花虾熬煮,见到上面果层红油就知有几真材实料,浓得嚟唔死咸。唔钟意咁重口味嘅可以试下加枱上面嘅樱花虾醋或者山葵柠檬汁,增加味道层次。

日本代表:小清新柚子主题小店  柚屋


图:暴食小公主misskitb

香港人特别钟意食日本菜,所以开饭仔亦特别介绍多一间,呢间柚屋名副其实专卖柚子主题甜品同轻食,例如柚子胡椒鸡扒沙律,亦有懒人放假最啱食嘅All-day breakfast。不过最切合主题嘅就系佢地嘅柚子甜品,柚子雪芳蛋糕口感轻盈软熟,加上柚子香零舍清新。柚柚拼盘嘅柚子雪糕仲带少少柚子果肉,清爽冰凉。

法国代表:高CP值蓝带法国菜  Oui Oui Bistro


图:相机食先eat_eat_everyday

要叹优质法国菜一定要高消费?未必,呢间餐厅虽然唔算非常平民,但有法国蓝带大厨主理加上菜式用心,计返性价比值得一试。Truffled Carbonara看似简单但细节见心思,黑松露嘅独特香气加上北海道温泉蛋,酱汁黏而不腻,满嘴浓香。Poire Au Vin Rouge红酒烩梨即叫即做,酸甜多汁一清味蕾。

西餐代表:坐喺车卡叹好西  CHOO CHOO


图:肚饿上班族mohkc

特别装修可以帮美味「好西」再加分,呢间西餐厅以火车做主题,坐低食嘢好似置身外国火车车卡当中咁。慢煮三文鱼柳配法式芥末酱先慢煮至半熟,令三文鱼柳肉质特别嫩滑,再煎香表皮,一脆一嫩层次分明。招牌甜品L.J.K.系芝士蛋糕球,切开仲有流心杂莓酱,配埋焦糖脆脆,酸甜有致又唔腻。

Fusion代表:用清酒杯嗒咖啡  疯鸟


图:mantung88

如果上面介绍嘅餐厅系西餐中见Fusion特色,呢间Cafe就更加将唔同国家菜式特色融为一体。泰式冬阴功变成意粉酱汁,香辣开胃。三重芝士炸虾Pizza有少少拉芝效果,加上有香脆程度同日式天妇罗有得Fight嘅炸虾。最特别嘅系佢地嘅手冲咖啡,特别用清酒壶同杯装住,造型抢眼之余仲可以畀你慢慢细味咖啡香。

香港代表:怀旧豆花+酿豆腐  顺兴隆桂记荳品厂


图:portfoodioPPAndy

香港嘅老字号荳品厂已经唔多,其中一间就喺长沙湾。嚟到当然唔少得嚟碗豆腐花,雪白嘅豆花非常幼滑,一个唔小心就会瀡落喉咙,可惜无姜汁而且豆香唔算非常浓郁。意犹未尽嘅再食多碟煎酿豆腐,煎香咗嘅豆腐滑溜结实,金黄色鱼肉亦有鲜味。记得点少少豆瓣酱再食,即刻升一个level。

香港代表:新旧融合抵食糖水  松记糖水


图:au9傻宝

照顾埋女孩子嘅甜品胃,介绍多间港式糖水舖。虽然系港式糖水舖,但从传统嘅红豆沙芝麻糊,创新嘅生果明珠(即系大西米)同水晶凉粉,日式Feel嘅刨冰,到西式嘅心太软同窝夫都应有尽有,选择恐惧症人士小心头痛。钟意大堆头嘅可以试Summer,两大球雪糕加上杂果同明珠,一次过满足三个愿望。

随时接收最新资讯
赞好OpenRice专页!
关键字
长沙湾
沾面
法国菜
葡菜
咖啡
糖水
开饭专题
开饭仔为你提供各类型最新饮食情报及优惠,全面照顾你的饮食喜好。
相关文章
【新店直击】氹仔旧城抵食Café:One More Café
2017-02-02
【新店直击】青洲灶记咖啡氹仔新登场!
2016-08-09
【新店直击】粉色系Café潮圣打卡必到
2017-03-03
【Pinkoi好设计好生活】咖啡迷必到:4 大来自不同地方的特色咖啡馆
2017-02-24
【编辑推介】「越」食「越」好味:发达越南小食馆
2016-03-25
【小不啦叽1大口】火车来了!【CHOO CHOO】
2017-04-18
餐厅资料
更多
收起
本月热门
【随时更新】便利店寻宝 每周新品速报
5天前
给自己一个休息时间 10-11月下午茶推介
2019-10-25
【特约分享】食鱼生转运 三种好意头日本海产介绍
2019-10-14
鼎王来了!味道服务媲美台湾 必食麻辣鸭血锅及员工教路秘制鼎王饭
2019-11-01
粮尾打气!5间湾仔平价饭堂推介
2019-10-24