CP值高!地区日、韩料理小店
2021-03-16

小店嘅名气,虽然通常都远不及大集团或连锁餐饮店,但往往正因为佢哋「小」,容许发挥空间反而更「大」,更易搵到惊喜呢。今次要介绍嘅两间餐厅,分别喺荃湾同将军澳,都系深受区内街坊欢迎嘅高CP值小店啊。

(将军澳) 

香港有唔少富有日式风格嘅居酒屋,位於将军澳嘅致就系其中一间,木系质感嘅装修,予人一种舒服嘅感觉,而且更有榻榻米嘅座位,好似真系去咗日本咁。餐厅以日式串烧为主,特别添置咗部日本制嘅串烧电炉,可以快速烤熟食物之余同时做到外层香脆嘅效果。师傅制作用心,单系串烧就已经每日都要花费两个钟去穿好,并且创作咗多款自家调制嘅酱汁搭配。

油甘鱼鲛

油甘鱼油份充足大家都知啦,而油甘鱼鲛位即系鱼嘅下巴同鱼腩中间嘅位置。由於呢个位置嘅活动比较多,令到佢嘅肌肉都相对结实同有弹性,烧香咗之後,外皮有微微焦脆,食到油香之余胶质亦重。


日式炸鲜奶

讲起炸鲜奶,可能都会谂起大良炸奶,师傅参考做法再加以改良,以奶香极浓嘅3.6牛乳制作,所以奶味更加浓郁,外层金黄酥脆,内层绵滑,甜度适中,配多球冲绳黑糖雪糕,冰火交融系几过瘾。


炸物拼盘

想食香口嘢嘅话,炸物拼盘就啱晒。5款炸物包括有炸广岛蚝、炸忌廉蟹饼、炸鱿鱼圈同炸鸡软骨等,咩都有啲咁好丰富。另外值得一赞系炸粉薄薄一层,口感香脆又唔太油,佐酒更系一流。


牛小排

牛小排即系牛肋骨嘅位置,肉质柔嫩软腍,油花均匀,入口即溶,配埋香葱一齐食,层次变化更多。推介牛魔王要试。


加拿大猪拖罗

猪拖罗冇改错名,食落嘅口感好似拖罗一样咁肥美啊,。猪肉嚟自加拿大,天然无激素,虽然望落畀人一种错觉以为实系好肥腻,但实情佢嘅脂肪含量唔高,仲好juicy添。配师傅自家调制嘅清新梅酱一齐食更可将腻度减低。

韩正屋韩国料理 (荃湾)  

呢间韩式小店位於荃湾,有多款韩国地道美食,不论系石头锅饭、铁板烧、部队锅定小食等都有供应,而且份量大,价钱亲民,性价比算几高啊。

人蔘鸡汤

呢个人蔘鸡汤相当足料呀,真系有成只鸡喺度呀,鸡入面酿入咗糯米饭,吸收晒汤嘅精华,清甜带微甘,感觉好养生呢。


炆牛肋骨煲

先讲讲佢个汤底啊,有萝卜喺度就知一定清甜啊,仲有浓浓嘅肉香。至於主角牛肋骨,肥瘦相间,炆得软腍入味。叫set就固然有得食啦,而选择单点嘅朋友仔,推介要留一个quota畀呢个煲啊。


铁板烧牛仔骨

另一款推介嘅都系牛嘅菜式——铁板烧牛仔骨大大块,铺满成块铁板,上枱仲系「滋滋」声架!酱汁惹味带果甜,口感软腍,用嚟送饭最啱。


石头香辣芝士猪肉饭

嚟食韩国嘢,枱枱都总会嗌个石头锅饭。芝士控无悬念,石头香辣芝士猪肉饭!热辣辣捧出嚟之後,要快手捞匀食啊,芝士份量都几多下,重点系可以拉到丝呀,好治癒。加埋辣酱食系醒神嘅,至於倒几多辣酱,就视乎大家想挑战嘅辣度喇。


韩式无骨猪手

韩式猪手外皮胶质重有咬口,肉质松软,就咁食又得;夹埋新鲜生菜、生蒜片、韩式面酱同香辣嘅泡菜一齐食都得。前者可以专心咁享受猪手嘅肉香,後者口感当然更丰富。

心动不如行动!有兴趣就快啲约埋三五知己去叹下美食!快啲bookmark定啦!

*以上图片只供参考,所有食品以实物为准. 食品供应因餐厅而异



关键字
荃湾
将军澳
日本菜
韩国菜
大厨招牌菜
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
本月热门
【随时更新】零食速报 每周新款零食、酒品点评
2021-05-03
【2021生日优惠】持续更新!5月食日本直送海鲜送西班牙红/白酒
7天前
带妈妈味游异国!母亲节Brunch六选
2021-04-20
期间限定$1抹茶菠萝包、$3竹炭菠萝油 佐敦新开 2500 尺新派点心小厨
2021-04-30
荃湾新开 人气名古屋班戟分店 首推冲绳紫薯梳乎厘班戟+班戟汉堡
2021-04-15