Chill叹周末!黄宗泽蚝吧新推任食生蚝Brunch (有片)
2019-03-06

每个星期好唔容易先等到weekend,梗系想去chill下放松下,最好成日咩都唔使做唔使谂就正正子。机会嚟喇飞云,去尖沙咀搵黄宗泽(Bosco)……开嗰间蚝吧吖~ 今个weekend开始推出Brunch优惠,生蚝任食,香槟任饮,叹返几个钟享受下慢活嘅时光啦。

新推出嘅brunch,包括咗一个丰富嘅全日早餐(炒蛋/煎蛋/水波蛋配烟肉、猪肉肠、扒蕃茄、田园沙律、生果杯),另有餐汤/果汁同埋一杯嘢饮,亦可添加西冷牛扒、烧澳洲羊扒等主菜。

不过,重点当然系任食生蚝啦!有两个选择嘅,想试下多几个唔同国家嘅生蚝嘅话,可以拣加$288要个环球生蚝,唔同时令同季节就会有唔同嘅生蚝提供,呢期供应紧嘅就有爱尔兰嘅Majestic、另外仲有啲西班牙同日本嘅生蚝;当然,如果你哋好似Bosco咁,系法国蚝拥趸嘅话,就可以加$320任食法国生蚝!

「我自己锺意生蚝嘅国家系法国,因为我觉得佢哋复杂啲,层次多啲,口味上系好大嘅分别。但最近呢年零,好多韩国蚝、日本蚝都有几好嘅质素。」Bosco仲话佢试过一日最多食成两三打生蚝!不过嗰阵系因为餐厅新开业,要试好多唔同供应商、品牌、国家嘅蚝先至咁「蚝」食法,最後仲搞到肚泻添~ 所以虽然任食生蚝系好开心,但Bosco都补充话凡事要适可而止呀。

餐厅本身都系以生蚝作主打,提供嘅生蚝全部都好新鲜,至於拣边个国家嘅蚝就视乎返各位大大嘅口味啦。西班牙嗰啲就 creamy 啲、蚝味浓啲, 带有甘香; 日本嘅就海水味浓啲、咸啲,裙边位爽口而带子位鲜甜;如果都锺意海水味但又唔想太咸嘅,就爱尔兰生蚝啦,口感仲好creamy同有 层次感;至於大众飞佛嘅法国生蚝,有层次感之余,带子位仲相当甜。 餐厅仲特设咗三款自家调制嘅酱汁配衬生蚝,分别系Cocktail sauce、红酒醋薄荷汁同微辣嘅泰式汁。

话明要享受要chill,食生蚝点可以冇酒?另加钱就可以无限添饮红、白酒或者香槟啦。

原来呢个任食生蚝任饮香槟嘅brunch谂法,除咗系因为好多朋友同Bosco讲话想试之外,仲系因为Bosco最近一次嘅旅行经历:「上一次我去西班牙嗰阵,我去啲街巿入面行,见到啲海鲜档,啲西班牙人朝早十点零钟就坐咗喺度饮香槟,好叹咁食海鲜喎。」咁Bosco同佢哋倾下偈,好奇点解佢哋咁早就饮香槟。点知啲西班牙人就答佢「系咁㗎我哋西班牙人,放假冇杯香槟系唔似放紧假。」Bosco觉得佢哋真系好享受生活。「我觉得又啱喎,你放假都唔使谂嗰日要做乜嘢㗎啦,嚟到享受下食物,饮杯香槟relax下,系一件几舒服嘅事。」

餐厅另外仲有两款新菜式介绍返,分别系纽西兰羽龙虾意大利饭,同香煎白鳕鱼伴乾元贝碎配野菌汁。前者用火枪轻轻烧一烧只Scampi至半熟状态,再加入鱼子同淋上龙虾汁,入口鲜甜。

至於後者,嗰啲泡沫唔止有视觉效果,食落仲好有惊喜,传出阵阵乾瑶柱嘅咸香,原来系大厨先用海鲜同乾瑶柱一齐煲熬,之後再打泡而制成,沾埋煎鱼一齐食即刻层次感大升。


Brunch
推出日期:3月9日起
时段:11:30 – 16:00 (逢星期六、日及公众假期供应)

Oystermine Restaurant
地址:尖沙咀广东道33号中港城第三座平台1A号舖


鸣谢
Wardrobe : Zadig & Voltaire
Stylist : Queenie Yu
Hair : Jun @ HH salon.nail
Make Up : Miko Wong by Cyrus Lee team


文:Kar
相、片:Tom Li


关键字
生蚝
任食
香槟
任饮
尖沙咀
名人店
brunch
饮食潮流
开饭仔为大家发掘香港这个美食之都的最新美食资讯,分享饮食潮流文化。
餐厅资料
本月热门
【随时更新】便利店寻宝 每周新品速报
2019-04-08
边行边食!湾仔区扫街5大推介
2019-03-22
【特约分享】多间特色餐厅进驻 尖沙咀新食力银座38
2019-03-25
A4和牛沾面配鸡白汤 李泳豪旺角新开拉面屋
2019-03-27
无辣不欢!5大麻辣爱好者必试川菜推介(有片)
2019-03-27