鍾意食燒鳥嘅朋友要留意喇！今次精選5間人氣日式燒鳥店，無論係炭香味濃定創新口味，都一定有你啱心水嗰款～
西日fusion風味 Maison Tori
圖：中環街市附近呢間日式燒鳥小店外觀有啲似西式小酒館，設計感十足，氣氛帶點西班牙風情，但賣嘅係地道日式串燒。串燒方面雞肉係主角之一，大蔥雞用上厚切雞肉包住京蔥心，火候掌握得準，外香內嫩，完全冇蔥嘅生澀味；白鱔新鮮彈牙，皮脆肉滑，加埋青檸調味，魚香更加突出。仲有雞胸軟骨、雞腎、豬腩肉、雞皮等選擇，款款高水準，不過最令人難忘嘅係店方自家製雞肉多士，將鵝肝、牛舌夾喺香脆雞皮中，再配白蘿蔔平衡油膩感，創意十足，入口酥脆濃香，絕對係亮點！如果想一次過試勻餐廳精選，可以考慮十道菜tasting menu，性價比高之餘菜式設計好用心～
日本農場直送雞肉 火赤 
圖：以吧枱座位為主，可以近距離欣賞師傅即場燒烤嘅手藝，氣氛一流，特別之處係串燒可以自選調味，包括抹茶鹽、柚子鹽、咖喱粉、七味粉等帶出唔同風味～招牌雞肉串燒選用由日本農場直送嘅雞肉，必食招牌糯米雞肉棒，將糯米飯同免治雞肉結合，燒至外脆內糯，飯焦香氣濃郁，層次豐富。除咗雞肉亦不乏其他選擇，如鱈魚乾燒到香脆，再配沙律醬簡單但好味；燒秋葵、蘆筍清爽鮮甜，簡單調味已經突出原味；醬油飯糰外層微焦，內裡軟熟，為整餐燒物作出圓滿結尾。最後以冰涼抹茶蕨餅收尾，煙韌口感中滲出淡淡茶香，令人回味。
長期人氣之選 備長
圖：以高質串燒見稱嘅樓上居酒屋，開業多年依然人氣不減～招牌菜式包括荔枝豬肉卷，香甜多汁嘅荔枝中和豬肉嘅油膩感，口感層次分明；厚切牛舌肉質彈牙、炭香十足；自家製雞肉棒配溫泉蛋嘅雞肉混入雞軟骨，口感特別，沾埋蛋汁更加香滑。其他刁鑽部位如雞心、雞皮、提燈等亦處理得好細緻，口感同味道俱佳。除咗串燒亦有多款特色小食，如鵝肝多士及慢煮雞肝等，無論係味道或擺盤都相當用心，配埋清酒或梅酒係絕配呀！
招牌重量級火焰原隻雞腿 FireBird 
圖：Mr. Che
日式居酒屋，主打串燒、壽司、刺身等多元化料理。餐廳環境舒適，設有開放式廚房，氣氛溫馨，無論係朋友聚餐抑或生日慶祝都非常合適。招牌菜火焰原隻雞腿上枱時由店員即場點火炙燒，賣相搶眼，雞肉熱辣嫩滑，極具儀式感～串燒方面選擇豐富，蔥段雞肉卷掃上鹹中帶甜嘅醬汁燒至微焦，逼出油脂同大蔥香氣勁滋味；柚子胡椒雞肉辛香中不失清新感，肉質彈牙幾開胃。蔬菜串燒方面，如翠玉瓜明太子串、明太子玉子燒等同樣有驚喜。
九龍城有heart小店 禮
圖：一間開到凌晨嘅串燒店，有啤酒同清酒供應，啱晒同朋友宵夜去食串燒飲返杯！串燒款式選擇幾多，特別一提嚟自德島嘅亞波美雞手羽先，燒至外皮脆卜卜，脂肪少而肉質結實，就咁食原味已經夠突出。另外黑豚豬腩油香十足，配上醬汁更添惹味；脆皮白鱔燒得香脆唔腥；創新組合方面亦有驚喜，例如青森青提豚肉卷用新鮮提子代替番茄，食落清甜多汁，令人眼前一亮。除咗串燒亦有小食，如清酒煮蜆、漬物、紫菜芥末八爪魚等，係一間性價比極高、聚餐氣氛又好嘅居酒屋～
文：Yanica
編：Cathy
