2月份好评餐厅十强
2019-03-11

踏入猪年嘅2月,你哋除咗系咁食年糕萝卜糕之外,仲去咗边度食好西?2月份嘅十强百花齐放,甜品店、西餐厅、星马菜等都有,你哋有冇边间食过?

第10位 登堂(*新上榜)

 图:ManIron5216为食妹hc

大家都开始识去观塘工厦搵食,呢间西餐厅环境极宽敞,占地成过万尺,坐得好舒服。食肉兽去到可以尽情享受炭烤澳洲M5和牛斧头扒吖,1.7kg好啱些牙。另外海胆、手拆鲜蟹肉、蟹粉、西班牙辣肉肠拼蕃茄忌廉汁扭卷粉亦好吸引。

第9位 初心冰室(*新上榜)

 图:tung_1230Chiloong

旺角西洋菜南街有好多间餐厅,呢间能够突围而出打入十大,可能同冰室都有得锯高汁扒有关。推介香草芥末籽烧纽西兰羊扒配薯菜同烤美国谷饲西冷扒配黑松露野菌汁薯菜,肉质松软。

第8位 % Arabica(*新上榜)

 图:Superlover920jmxstyle 

呢间咖啡店坐拥地理之利,喺正鰂鱼涌海山楼打卡热点附近,打完卡过嚟饮返杯微苦醇厚嘅Iced caffe latte,或者带有淡淡回甘而抹茶味香嘅matcha latte,系几疏乎嘅。同埋佢哋啲拉花好靓!

第7位 LIFETASTIC Patisserie

 图:nee.eat.playE0E0E0

继上年11月後再次上榜嘅呢间餐厅,最受欢迎一定系佢哋主打嘅澳洲西瓜草莓蛋糕,个个都系慕名而嚟!五层忌廉、士多啤梨、西瓜等系坚吸引嘅。当然,佢哋其他甜品好似芒果热情果蛋糕、无花果芝士竹炭蛋糕等都值得一试。

第6位 The Pantry(*新上榜)

 图:ahkityanqhoqho

首次上榜同时入围优秀开饭热店大赏「甜品组别」嘅呢间西餐厅,好可惜暂时已经结束营业。枱枱都会叫嘅即叫即做厚pancake有蛋香,空气感适中,呜,希望之後可以再食返啦。

第5位 花果山(*新上榜)

 图:WincyholicMaDuncan

呢间绝对系榴槤控嘅新宠,成间舖都系榴槤饮品,例如猫山王沙冰、榴槤奶盖呀咁,饮到果肉添呀!仲有榴槤小食,churros点榴槤酱超香罗。其中一个负责人仲曾经任职於香港三星米芝莲餐厅㗎。

第4位 微酵烘焙


图:蓓*triangle_onigiri

呢间嚟自台湾嘅手工烘焙欧式软包店稳守十强嘅位置,除咗三款爆浆珍奶软欧之外,佢哋嘅茶饮同样有心思,特别用萃茶机冲泡㗎,珍珠奶茶茶香珠甜,醇厚咸香嘅蓝芝士奶盖茶更系香港限定。

第3位 麦金.麦金马拉特式茶啡室

 图:wngyan030milkpeanut

上个月都有入围嘅马拉茶室,今个月跃至三甲,喇沙同拉茶当然系必食,肉骨茶都系,仲可以无限添饮添。肉骨茶选择有好多呀,视乎个人锺唔锺意甘香或中药材而决定啦,款款都好足料。

第2位 老夫子港式餐厅(*新上榜)

 图:很能吃王子hehagod

老夫子系香港经典漫画人物,应该储落咗唔少粉丝,难怪即使呢间主题餐厅开喺九龙湾咁远,都咁受欢迎,仲一上榜就第二位。成间舖都系打卡位,粥粉面饭、猪手、口水鸡等都有提供。

第1位 鸡翼山(*新上榜)

 图:besimpleyoyo454

第一次上榜就系榜首位置嘅,系人气小食店鸡翼山!佢哋嘅鸡翼款式多多,黑松露蒜香、咸蛋黄、浓味三重芝士、柠香山葵蟹籽、咸柠七、玫瑰味等。重点系,喺度食鸡翼可以放低仪态,戴手套用手揸住尽情享受!


文:Kar


关键字
十强
排行榜
旺角
小食
甜品
pancake
榴槤
主题餐厅
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
2021及历届米芝莲香港澳门指南完全版
2021-01-27
情人节爱意满泻 甜蜜蜜堂食/外卖下午茶推介
2021-02-01
【随时更新】零食速报 每周新款零食、酒品点评
2天前
日本吉列牛排店京都胜牛进驻铜锣湾 黄金六十秒炸法 推介京都胜牛三味套餐
7天前
楚捻记新line!荃湾新开饺子店 必试黑松露什菌饺+香煎潮汕韭菜粿
2021-02-10