10月份好评餐厅十强
2020-11-09

10月份可以话系café同小店嘅天下,十强榜内大部分都系充满独特个性嘅小店,无论系装修定系menu设计方面都富有谂法,展现小店灵活嘅创造力。

第10位  土生花(*新上榜)  

 图:nutty_eaterFANKANA

香港本身都开咗唔少韩国菜餐厅,但韩式素食料理,仲要引入韩国寺庙饮食文化嘅,应该就冇乜几间。所以呢间餐厅新开冇耐,已经吸引到一众韩粉追棒喇。餐厅选用天然植物性食材,好似紫苏叶籽芋头汤咁,入面就包有燕麦脆、雪耳、木耳等,口感沙沙地,紫苏叶味唔会太浓。而红枣玉桂糖水煮香梨则选用韩国香梨,清香清甜。

第9位  Vivienne Westwood Café(*新上榜)    

 图:annielwymjqueen7e

呢间由着名英国品牌开始嘅café,一直都有供应多款英国菜同下午茶等,最近更推出一系列嘅素食菜式,就连成个三层架下午茶都系素食呢,例如有芦笋酥皮挞、迷你未来牛肉汉堡、柚子藜麦沙律等,款款健康。英式早餐中嘅热狗肠都系植物热狗嚟,以葵花籽制成,而家个个都咁注重健康,难怪一推出就大受欢迎。

第8位  Cafe Fabulous(*新上榜)     

 图:starrychowTaniatt

今年大家都辛苦了,唔少楼上café就成为大家放松relax嘅地方,同朋友坐低食餐饭、吹下水玩下boardgame咁过返日。不过好多呢类型嘅café都系食物质素一般,但旺角呢间就几有惊喜呀,食物份量够大,而且味道唔错,推介黑椒炸虾天妇罗螺丝粉,微微辣几香口。另外甜品都几吸引,玩到咁上下,再食多件蓝莓芝士饼作结就perfect池。

第7位  泰嘟嘟(*新上榜)    

 图:kaylawytkoniw

大角咀都有几多特色小店,呢间泰国酒吧概念嘅小店系其中一间,仲要有啲卡位做到好似泰国笃笃车咁,几有feel。最多人叫嘅一定系炭烧猪颈肉,因为佢嘅present手法唔似一般传统泰菜,而系好似日式烧肉咁,成个炉头上,大家可以自己慢慢烧肉。肉味香得嚟仲保留到肉汁!

餐饮券:$100现金券-无限兑换!

第6位   Artisan Café(*新上榜)

 图:yoli_lky_0115wingshuen1123

主打轻食,好似三文治、蛋糕同咖啡嘅中环咖啡小店,细细间座位唔多,但就几有气氛同文青气息。首推磨菇芝士三文治,份量十足,外脆内软,够晒香口。三文治仲烘到有一条条坑纹,影出嚟好靓。想试特别少少嘅咖啡可以拣桂花latte,有淡淡清香呢。

第5位  鱼事者 

 图:e.wkyChuChuCheung

以鱼肉为主题嘅小店,多款小食同面食都加入鱼肉制作,呢份新鲜感令佢成功继续留守喺十强嘅位置。炸鱼无薯条即系炸鱼肉条,口感烟韧,啖啖鱼香,配埋自家调制嘅酱汁就更香口,如果想要鱼鲜味更突出嘅,就拣蟹皇酱啦~ 各款鱼面亦系餐厅招牌之作,无论系汤面定捞面,都比一般嘅粉面弹牙烟韧,满满鱼香,重点系唔腥呀。

第4位  渌鼎记(*新上榜)  

 图:Chiuyu118 Beautylionbb

虽然唔系秋冬天先可以打边炉,但近嚟凉凉地,又真系挑起咗唔少人嘅边炉瘾。呢间火锅店性价比高,集鸡煲、酸菜鱼、任食火锅於一身,刺身、海鲜、肥牛样样齐。汤底有养顔嘅花胶鲜鸡美人锅,或者刺激嘅重庆麻辣鲜鸡煲等选择,难得系任食冇时限,唔使食到赶头赶命,当然轻易就可以成为一众火锅迷嘅宠儿啦。

第3位 Café Crêpe

 图:eunice2046Moncarrey

上个月榜首嘅法式薄饼店,今个月微微下跌两级,但依然保持喺三甲位置,人气强劲。28款薄饼选择有咸有甜,遇着有选择困难症嘅都咪话唔头痕。抹茶控可试抹茶忌廉芝士配新鲜红莓酱,薄饼皮系朱古力味,夹住抹茶忌廉芝士,味道浓郁,仲有开心果同麦皮脆脆等增加口感。苹果金宝奶油酱法式薄饼亦系另一人气款式。

第2位  你你(*新上榜)   

 图:sophiawong0127yuchiro

荃湾新开冇耐嘅台湾菜小店,食完真系会有啲挂住台湾。呢度啲菜式配搭新颖,好似鲁肉饭咁又会加珍珠,手作吐司都会加珍珠,效果又比想像中夹,鲁肉饭内嘅珍珠仲用台湾酱油同油葱酥炆煮过,令到味道上多啲变化,微甜中又会渗有咸香。珍珠控不妨试试啊。芋泥肉松三文治就更有台湾味道啦,厚叠叠der见到都满足。

第1位  阿里郎热狗棒 

 图:iristsang852hkfood

喺韩国有超过80间分店嘅人气热狗连锁店,以面包糠混合面团、大米再现炸成热狗外层,有多款口味,薯条鸳鸯芝肠热狗棒系热门之一,有一粒粒炸到脆口嘅薯条粒喺外层,趁热食仲有拉丝效果,明知邪恶都会一啖一啖咬落去。建议洒埋砂糖、芝士粉同埋唧多一两款芝士酱一齐食,就更加有风味!


文:Kar



关键字
十强
十强名单
报榜
旺角
荃湾
尖沙咀
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】零食速报 每周新款零食、酒品点评
2天前
优雅小聚 11月下午茶推介
2020-11-03
【订座感谢祭】 快闪$20餐饮券第八弹 激抵烧烤优惠
2020-11-06
桔梗姐妹店进驻牛头角 8,700尺自设炒豆房及饼房 手冲咖啡配轻食
2020-11-02
Wine & Dine 2020预告 免费网上学品酒 精选品酒套装率先睇
2020-11-19