喺K-11已经有间舖嘅韩国人气雪糕店,喺同区另一个商场又开多间分店喇!新店开张当然会有新嘢食,好似原个芒果雪糕同抹茶tiramisu咁,睇得又食得!有啲新嘢仲系得新店先有供应添咋。
先讲原个芒果雪糕,话夏天系芒果嘅季节相信冇人会反对,呢个新店限定嘅新鲜芒果牛奶雪糕,由头到尾到返头都系芒果!最底落咗层用新鲜芒果打成嘅芒果酱,唧完雪糕之後又落多层,再铺满一粒粒芒果肉喺面,真系一杯一个芒果㗎!好足料!果甜混埋奶香,噢,要投奔初夏啦~
抹茶Tiramisu都系新店限定嘅新品。参考tiramisu嘅概念,底层系抹茶芝士,中间夹有索晒抹茶Expresso 嘅手指饼,唧完牛奶雪糕後再撒上抹茶粉同黄豆花生粉,抹茶控应该会食得几开心。
红豆牛奶雪糕呢,就系重推嘅。用嘅系济州红豆,仲特地喺韩国订咗几个养生锅返嚟,慢煮啲红豆三个钟,再以有机糖同少量盐去作调味,令到红豆唔会黏埋一堆,仍有咬口之余亦唔会太甜。撇甩老拍档抹茶,改同撒上花生粉嘅牛奶雪糕一齐,估唔到又几夹。
除咗雪糕,新店仲有自制手工果酱多士呀,无论系块厚多士定系啲果酱,全部都系自家制!面包系有机牛奶面包,质感松软。而果酱就会按时令转变,依家系无花果酱,系用以色列无花果肉切粒、煮酱而成,微甜带有蜜香,呀,连片牛油都系自制㗎!混入乳酪去整,感觉light啲~ 预告下,迟啲仲会有意大ricotta芝士多士同手工牛奶酱多士食。四十几五十蚊件厚多士,系就系贵咗少少,但贵在手工呀。
饮品方面,打卡-able嘅有济州抹茶鲜奶咖啡,先落抹茶奶,加有机牛奶,最後倒埋expresso,啡白绿三只色拼埋系几靓嘅。
健康路线嘅就有几杯梳打:五味子、鲜姜柠檬、鲜橙柠檬 ,果味突出又够fresh,完全系消暑饮品。
百味堂
地址:尖沙咀广东道3-27号海港城海运大厦二楼OT264号舖
文、相:Kar