又到咗一年一度嘅大閘蟹季，係每年都唔可以錯過嘅時令美食！想一次過滿足味蕾，除咗大閘蟹宴，仲有大閘蟹放題同自助餐任你揀～
匠心九道菜大閘蟹嘗味菜單 嘗申滙
呢間高級滬菜食府推出咗期間限定嘅大閘蟹宴，以太湖大閘蟹入饌，演繹最地道嘅江南風味。九道菜嘅套餐包括清蒸大閘蟹、蟹粉豆腐羹、蟹粉炒河蝦、蟹粉小籠包同鍋貼等，款款蟹香濃郁、味道細膩，想再升級仲可以加蟹粉翅或砂鍋蟹粉飯。每道菜都講究火候同層次，啱晒鍾意蟹嘅朋友慢慢嘆住過個金秋。
六両大閘蟹‧珍饈八味金秋宴 个園竹語 
主打上海同淮揚菜，今個秋季推出咗「六両大閘蟹‧珍饈八味金秋宴」，一次過品嚐八道蟹粉料理，夠晒豐富。由現拆蟹粉燴魚翅、清蒸六両江蘇大閘蟹到蟹粉小籠包，款款鮮味十足。仲有超貼心嘅拆蟹服務，等食客可以優雅慢慢食～最後以桂花薑湯圓作結。蟹宴名額有限，記得早啲訂位。
澄黃蟹韻‧秋之饗宴 明閣 
用上當造江蘇大閘蟹配龍蝦、花膠等矜貴食材，將傳統粵菜手藝同創意結合得恰到好處。成個菜單蟹香滿滿，由蟹粉小籠包、蟹粉龍蝦球到清蒸大閘蟹同蟹粉燴豆腐，款款都鮮味十足。連配菜都好講究，例如生炒臘味糯米飯粒粒分明、香氣逼人。最後以桂花薑茶小丸子收尾，暖胃滿足，秋意即時升溫。
低至$268大閘蟹放題 上海新大眾大閘蟹專門店
圖：餐廳(FB)
想食到夠本嘅蟹迷注意啦～呢間主打大閘蟹嘅上海菜餐廳推出咗時光倒流價放題，大閘蟹任食任飲，低至$268就有交易，真係抵到爆！蟹公香滑細膩、蟹乸膏香濃厚，隻隻爆膏爆油。除咗清蒸大閘蟹之外，仲有蟹粉水餃、蟹粉扒時蔬、生滾蟹粥同生炒蟹膏糯米飯，多款蟹粉菜式輪住上。再加上任飲啤酒汽水同埋可以加$28任飲花雕，一邊拆蟹一邊乾杯，氣氛一流～
更多OpenRice詳細推介：
► 2025最新糖水/甜品小店合集 首間日式芭菲專門店/手工芋泥杯/法式精緻甜品 (按此)
► 初秋下午茶合集 舊香港情懷/可可主題/下午茶自助餐 (按此)
► 五星級酒店阿拉斯加帝王蟹宴自助餐 新增法國蜘蛛蟹+本地藍花蟹 (按此)
文：Yanica
編：Kate
