保育活化後重开嘅历史建筑茂萝街7号，年初进驻一间走日本明治时期和洋折衷风格、占地2,000平方尺嘅餐厅，分为主餐厅、吃茶咖啡室，及摩登日式酒吧。4月正式开张，供应多款和风洋食，包括蛋包饭、明太子意粉等。私心推介每日新鲜制作嘅抹茶蝴蝶酥，打卡好睇、抹茶味又香浓！

主餐厅

Maison Meiji以明治维新时期饮食文化变革为灵感，装修亦充满当时和洋折衷嘅摩登风格

Omurice with Wagyu Demi-Glace Sauce（Lunch Set，$168）

餐厅搵嚟嚟自日本福冈嘅春田达雄先生担任行政总厨，春田先生曾於Hal's Restaurant（已结业）任职主厨，传统蛋包饭就系其中一道招牌菜！新店版本嘅鸡蛋依然半熟滑溜、充满蛋香，包住茄汁炒饭，再加上煮至软腍入味嘅和牛同烧汁，味道丰富。
 

Miso Black Cod w/ Vegetable Croquette（Lunch Set，$268）

鳕鱼西京烧带淡淡焦香，鱼皮香脆富油脂，鱼肉肉质细致多汁，加上味噌甜中带咸。下面嘅野菜可乐饼外脆内软绵，配搭芦笋同柠檬可以平衡油腻感。不过记得尽快食，如果唔系可乐饼就会被鱼油同酱汁浸湿无咁脆㗎啦。
 

Classic Mentaiko Pasta（Lunch Set，$168）

意粉加入博多名物福冈明太子，腌渍过嘅明太子咸鲜微辣，非常开胃。加上紫菜同紫苏提味，可惜意粉略软身。
 

吃茶咖啡室

半开放式嘅木系吧枱可以畀客人欣赏冲调咖啡同手拂抹茶嘅过程

更设榻榻米座位，系最受欢迎嘅打卡位

Premium Hand-Whisk Matcha：Rokumei（$178 / 2 Shots）

同一般Cafe唔同，呢度有手拂日本抹茶，有两款唔同风味嘅京都宇治抹茶、同1或2 Shot选择。点2 Shots会连埋抹茶粉同茶道工具奉上，系因为第二杯会由茶师带领你自己手拂，可以亲身体验到日本茶道文化！而两款抹茶中以鹿鸣较受欢迎，香气到味道都带抹茶嘅独特甘甜，完全唔苦。配搭和菓子、例如拍摄当日嘅蕨饼，更突出抹茶嘅鲜味。
 

Matcha Palmier（$40）

抹茶蝴蝶酥系每日新鲜制作，以两块酥脆富牛油香嘅蝴蝶酥夹住抹茶酱，再洒上抹茶粉，馅料嘅甜度同茶香平衡啱啱好，回甘悠长。
 

Iced Drip Coffee（$69，限量供应）

咖啡方面推介冰滴咖啡，以冰滴萃取出嚟嘅咖啡口感香醇柔滑，再加上冷藏发酵48小时後，更能够突显单品咖啡豆嘅风味同层次。例如拍摄当日采用嘅咖啡豆嚟自埃塞俄比亚，闻落有优雅嘅花香，入口微酸带甜，均衡清爽。
 

摩登酒吧

酒吧装修走银座风格，别室更放满黑胶唱片，甚有情调

（左）Umeshu Blossom（$120），（右）Last Samurai（$160）

Kuromaru酒吧由调酒师远藤雅彦先生主理，供应多款日本烧酎及精心调配嘅Cocktail。Umeshu Blossom以梅酒烧酎及黑糖本格烧酎为基底，加入果汁等制作而成，味道酸甜易入口。而Last Samurai以侍士の门甜薯烧酎调配，特别附上一小杯烧酎，可以试到烧酎本身甜薯芳香、浓厚而带辛辣余韵嘅原味，再同Cocktail对比返。
 

Maison Meiji
地址：湾仔茂萝街7号1楼

文：Cathy.H
相、片：Wilfred Chui