情人节求救指南!精选十二大浪漫情人节餐
2018-02-06
就嚟到情人节啦,谂好同另一半去边庆祝未先?buffet?set dinner?定系打边炉?点都有一间啱你(bb)心水啩?
 
鲍鱼自助餐 Park café

平时出面食鲍鱼闲闲哋都要几百蚊只,而家有得任食以鲍鱼为主题嘅菜式喎,抵!每位食客都会获赠一客日式矶烧鲍鱼并黑松露羊肚菌芝士焗龙虾,鲍鱼肉质弹牙,龙虾味道香浓。其他鲍鱼菜式仲有鲍鱼鲜虾火龙果沙律、鲍鱼蟹肉龙虾汤泡饭同猴头菇花胶鲍鱼螺头炖鸡汤等。而甜品就以粉红色系为主,囡囡见到应该会好兴奋!
 
粉红朱古力心太软 花月庭

食自助餐梗系要食甜品,而呢度嘅甜品唔止甜,仲甜入心。事关每对情侣都会获赠粉红朱古力心太软,仲可以喺碟上写低同另一半想讲嘅嘢,系sweet嘅!其他食物仲有红花带子威灵顿伴牛肝菌汁、和牛涮涮锅、玫瑰杂莓慕丝伴雪燕等。仲有无限量供应Mövenpick雪糕,听落都几吸引。
 
养颜花胶海参自助餐 柏景餐厅

呢个自助餐就主打花胶同海参,够晒滋补养颜。菜式有花胶螺头炖鸡、冰花海参炖六福糖水同桂花炒花胶丝等,天气咁冻食啲暖嘢就啱喇,仲可以补充骨胶原添,女神应该满意。
 
花花世界半自助晚餐 帝景轩

唔想食太饱嘅话,半自助晚餐都系一个唔错嘅选择。主菜可以拣安格斯牛柳配桂花蜜饯鹅肝或者香煎鳕鱼柳虎虾配洛神花牛油汁,两者都加入咗花嘅元素,感觉浪漫。而海鲜、刺身、前菜、沙律同甜品就系任食嘅。特别推介卖相可爱嘅朱古力花盆同玫瑰花形状嘅芒果挞。

DIY甜品半自助晚餐  1+1 吧
同样系半自助晚餐推介,主菜可以拣香煎美国牛柳拼酱烧波士顿龙虾。而任食美食当然唔少得各款冰镇海鲜、刺身、寿司等。特别在甜品方面有DIY Tiramisu小盆栽,畀大家用朱古力饼碎、士多啤梨、红桑子或者唔同形状嘅朱古力,为另一半设计独一无二嘅甜品。
 
甜王士多啤梨下午茶 八天堂
呢间出名食忌廉包嘅舖头喺情人节会推出甜王士多啤梨下午茶,有新鲜甜王士多啤梨、甜王果酱忌廉松饼、甜王果酱忌廉卷蛋同甜王果酱忌廉多士。影相实呃到唔少like!仲有情人节限定嘅甜王忌廉包,以新鲜忌廉配上甜王士多啤梨果酱,馅料足足有50克咁重!食落香甜得嚟又唔会腻,sweet池晒~~
 
玫瑰茶香马卡龙 Tea WG

呢个品牌就以茗茶融入食物入面,好似有香煎法式牛腰肉配上以恋人早餐茶煮成嘅酱汁,仲有波本香草红茶雪糕配蛋白酥。如果想畀个惊喜另一半嘅话,不如拣埋盒玫瑰茶香马卡龙吖。馅料由特选大吉岭同玫瑰花制成,入口带茶香又唔会太甜。
 
玫瑰朱古力拿破仑 Villa Villa

试问有边个女仔唔锺意玫瑰?呢间餐厅情人节套餐嘅甜品朱古力慕丝拿破仑口感松化,朱古力味浓。面头仲有一块粉红玫瑰朱古力,好浪漫喔。而主菜澳洲和牛面颊肉配意大利云吞就系以红酒汁烩和牛面颊肉,肉质嫩滑,连云吞都系心形㗎!
 
以花入馔 魔膳厨房
情人节唔少男士都会送花畀另一半,如果花系食得嘅会唔会再开心啲呢?唔好睇呢个意大利面好似无咩特别咁,其实佢系以食用玫瑰花、忌廉同茄汁嚟烩意粉嘅,估唔到个味都几夹喎。而甜品 红桑子草莓提拉米苏就酸酸甜甜,带淡淡酒香。
 
粉红盛宴 The Point

如果讲最代表到情人节嘅颜色,应该一定系粉红色啦。呢间餐厅嘅情人节四道菜晚餐就由头盘到甜品都系粉红色,够晒应节!主菜日本刺身带子配粉红忌廉汁天使面加入咗红菜头,配上刺身级带子,味道鲜甜。而甜品士多啤梨芝士薄饼配云呢拿雪糕仲系心形添,成餐饭都心心眼啦。
 
龙虾火锅 canton pot
情人节成日都系食西餐?如果想有啲新意嘅其实打边炉都OK㗎。呢间火锅店嘅情人节套餐食物好丰富,有原只龙虾、澳洲M5级和牛、西班牙黑豚肉同美国桶蚝等食材。而汤底就系龙虾浓汤拼韩式牛肋骨汤,两款味道都好香浓,打边炉之前可以饮少少试下个汤先。
 
韩牛大餐 炑八韩烤

女朋友最爱睇韩剧,连情人节大餐都想食韩国菜?呢间连锁韩式烤肉店就啱晒啦,佢哋嘅情人节韩牛套餐主打各种1++级数嘅韩牛部位,包括肉眼粒、牛前胸、牛小排、牛五花等等。套餐包埋韩式年糕串做甜品。最後温馨提示埋,预先订座2月13至15号任何一间分店嘅情人节套餐,就会送埋大热韩剧《鬼怪》当中出现过嘅木棉乾花一扎!数量有限先到先得呀。
 
文:Crystal

关键字
情人节
自助餐
buffet
士多啤梨
甜品
火锅
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】零食速报 每周新款零食、酒品点评
2020-06-26
食豪啲啲 城中5间海鲜+肉扒父亲节自助餐
2020-06-10
至甜初夏 6月下午茶推介
2020-06-15
湾仔新扒房只卖$298黑安格斯牛扒套餐 任食薯条+超松软肉桂牛油餐包
2020-06-11
送A4和牛拼盘!最平$298任食两小时 铜锣湾新开鬼怪主题日式烧肉放题店
2020-06-22