尖咀酒店海鲜主题自助餐 3.5小时食鲍鱼龙虾鲜蟹(有片)
2018-08-20

暑假就系要一家人食自助餐!当中当然又以海鲜最受欢迎啦系咪?尖沙咀呢间酒店最近就推出海鲜主题自助餐,由冰镇海鲜食到海鲜菜式,即煮海鲜粥食到新鲜刺身。最後记得试埋酒店招牌甜品,一次过满足哂各种愿望!
 

必食冰镇海鲜


冰镇花雕醉鲍

雅苑座即日起推出鲍鱼「蟹」逅海鲜三重奏自助晚餐,睇名就知首推当然系鲍鱼!每人可凭券换领一份冰镇花雕醉鲍,系将鲍鱼用花雕、酒糟同冰糖浸至入味,酒香馥郁,鲍鱼口感弹牙,加上余韵嘅阵阵嘅花雕香,唔食就走宝啦。
 


(左)波士顿龙虾,(右)加拿大长蟹脚

冰镇海鲜区当中,就以大件而多膏嘅波士顿龙虾最受欢迎,已经数唔到Refill咗几多次,因为一出就会被扫走超过一半!而且无论系波士顿龙虾定加拿大长蟹脚,都已经预先处理,食嘅时候自然更方便啦。
 


冻虾、冻蚬、冻青口、翡翠螺

冰镇海鲜选择都算多,而且质素平均都唔错,Keep到爽口弹牙。
 

海鲜热食推介


(左)贵妃蚬,(右)濑尿虾

呢个热食海鲜区就喺饮品区对面,有蟹、贵妃蚬、濑尿虾、东风螺等新鲜海鲜,拣好就可以交畀师傅用海鲜面豉汤或者龙虾蕃茄汤煮熟。怕太饱嘅话可以唔要面,配搭自己口味嘅超足料海鲜汤!
 


(左)蟹肉鸭肝多士,(右)海鲜蟹皇粥

自助餐另一主角蟹亦有唔少菜式选择,必试蟹肉鸭肝多士,蟹肉嘅鲜甜加上鸭肝嘅脂香同多士嘅脆口,无论系味道定口感层次都非常讨喜。即煮海鲜蟹皇粥亦系人气之选,可以配埋蟹肉海鲜粒锅粑一齐享用呀。
 


(左)酥炸广岛蚝,(右)金银蒜蒸粉丝扇贝

其他海鲜菜式当中就以呢两款最受欢迎,酥炸广岛蚝外脆内Creamy,无论系大人定小朋友都会锺意。而金银蒜蒸粉丝扇贝就简单但充满鲜味,一样系每次Refill一定会被大家扫走一半。
 


(左)烧美国特级肉眼,(右)烧芬兰猪肉

食咗咁多海鲜,中间不妨食下肉。老实讲烧牛肉算系自助餐当中「老是常出现」,反而烧猪肉就真系比较少见。餐厅特别选用芬兰Omega3猪肉,烧至皮脆肉滑,食落比一般食到嘅仲更多汁。
 

更多【饮食潮流】:
1. 利园三期正式试业 进驻新餐厅一览
2. 丼丼屋联乘熊本县 新推亲子黑毛和牛丼
3. 米芝莲名厨陈国强师傅设计 抵食上海本帮菜

 
酒店招牌甜品


(左)蝴蝶酥,(右)绿茶蝴蝶酥

嚟到呢度唔食返两件蝴蝶酥就对唔住自己啦,皆因呢间酒店嘅蝴蝶酥相当出名,唔单止香港人,唔少台湾同日本游客都识得嚟买返盒做手信!口感酥脆,富牛油香而唔油腻感,绿茶口味就更清新。杂果拿破仑都系另一必试!
 


即制班戟

另一推介系即制班戟,班戟皮有原味、朱古力同班兰任拣,特别系班兰都系其他酒店自助餐少见嘅口味。而馅料就可以拣忌廉、红豆同香蕉,再邪恶啲额外再加两球Häagen-Dazs雪糕,嚟个冰火口感刺激亦得,得咗。开饭仔今次就试咗班兰班戟加香蕉馅,甜得嚟又有淡淡班兰香。
 


餐厅位於酒店三楼室内花园,楼底达110尺高,仲有喷泉感觉特别舒适悠闲,最啱一家人嚟享受丰富晚餐。
 







鲍鱼「蟹」逅海鲜三重奏自助晚餐
供应日期:即日起至2018年10月10日
供应时间:(星期日至四及公众假期)18:30-22:00,(星期五、六及公众假期前夕)18:30-21:45
价钱:(星期一至四)成人$608,小童$478;(星期五至日、公众假期及前夕)成人$688,小童$518(另加一服务费)
*用OpenRice优惠券订枱可享7折优惠(条款及细则



雅苑座
尖沙咀麽地道69号帝苑酒店3楼




文、相、片:Cathy

关键字
尖沙咀
酒店自助餐
自助餐
海鲜
龙虾
雅苑座
饮食潮流
开饭仔为大家发掘香港这个美食之都的最新美食资讯,分享饮食潮流文化。
餐厅资料
本月热门
【随时更新】零食速报 每周新款零食、酒品点评
2天前
全城抗炎! 5间酒店自助餐转型 任点任食海鲜/主食/甜品 变阵保卫生
2020-03-17
【特约分享】超抵外卖陪你抗疫 即睇将军澳饮食地图!
2020-03-10
【随时更新】最後倒数!即将结业的老字号及人气小店
5天前
尖咀Omakase 独创三文鱼子海胆日式糯米饭 新开业优惠 第2位半价
2020-03-19