台湾菜或者西餐相信大家都食过唔少,但有无谂过将两者特色糅合?牛肉面变成慢煮牛肋骨配手作面,肉燥饭选用英国西班牙橡果猪配台湾香米,班戟就淋上芝士奶盖同珍珠!讲紧嘅系呢间台式休闲餐厅同香港陀飞轮品牌联乘新开嘅台式西餐厅,由装修到食物都有新鲜感。
TeaWood Deluxe位於尖沙咀K11,由茶木·台式休闲餐厅同万希泉合作推出,主打高级台式西餐。装修风格以优雅古典为主,加上钟表齿轮、罗马数字等元素,别有格调。
12小时慢煮牛肋骨台式手作面·溏心蛋·海苔($328)(每日限量供应10碗)
叫得做「升呢」版,用料同烹调方式都全方位改良!牛肋骨先用红酒同多种香料腌制,再以65°C低温慢煮12个钟,最後煎至表面焦香。慢煮令牛肉口感特别软嫩,带少少脂香但唔肥腻。
汤底亦唔马虎,用牛骨、花椒、八角、新鲜蔬菜等熬制,牛香浓郁,咸味适中无油腻感。而面条就系自家工场每日新鲜制作嘅粗身手作面,弹牙烟韧得嚟亦做到挂汤效果。连萝卜等亦煮至入味。
酥炸排骨西班牙橡果猪肉燥饭·高丽菜丝沙拉($138)
同样系香港人食开嘅肉燥饭,呢度就用咗西班牙橡果猪肉,即系西班牙当地以橡果等作为粮食放养嘅猪肉,特色系油脂肥瘦均匀,肉质软腍,令呢碗肉燥饭更香而不臊。
白饭亦特别用台湾直送嘅台稉9号米,粒粒饱满分明、黏中带Q。酥炸排骨亦特别挑选英国保湿猪肉,有特别保湿技术,保留更多肉汁。
威士忌乾炒三杯鸡($108)
传统台式三杯鸡嘅三杯系指酱油、麻油、绍兴酒,但餐厅将绍兴酒改为台湾近年大力发展嘅威士忌。更会席前加上点火威士忌增添香味!放心威士忌煮过之後只会留下酒香,食落唔会太呛。外脆内嫩嘅鸡肉配上淡淡酒香够惹味。
更多【新店直击】: |
烧美国肉眼扒(10oz)·台式沙茶酱($258)
西餐亦加入台湾元素!肉眼扒烧香之後配上自家调制嘅烧汁同沙茶酱,同时可以试到经典西式口味同台式Fusion风格。半熟肉眼扒肉质嫩滑,点上带虾乾咸香嘅沙茶酱又几夹。
MTW黑糖珍珠舒芙蕾班戟·抹茶冰淇淋/香草冰淇淋($88)(制作需时约30分钟)
甜品亦有台湾Fusion风格,呢款舒芙蕾班戟里面有吉士忌廉,上面就淋上芝士奶盖同烟韧珍珠,而且可以按自己口味加上台湾黑糖浆,有啲似班戟版嘅奶盖黑糖珍珠!
芝士奶盖柔滑带少少咸香,珍珠烟韧而黑糖浆香甜,甜咸有致而口感丰富。班戟口感轻盈松软,略嫌唔够入口即溶。
氮气人蔘乌龙茶($54/300ml,$78/500ml)
选用台湾人参乌龙茶,即系喺茶叶当中加入人参粉,味道甘甜生津,余韵悠长,餐後解腻就最啱。餐厅更特别打入氮气,产生好似啤酒咁嘅奶白色细致泡沫,唔单止令茶汤口感更为细滑,亦有保鲜嘅效果。
人参乌龙珍珠奶茶($52/热,$56/冻)
锺意饮甜啲嘅就可以拣珍珠奶茶,热饮更以茶壶奉上,别致优雅。奶茶香甜柔滑,配自家制珍珠增加咬口。
新店试业期间亦有推出优惠,即日起至4月11号,堂食惠顾满$200再Like埋餐厅Facebook或Instagram,就可以用半价享用威士忌乾炒三杯鸡!堂食惠顾满$400就可以免费获赠Mocktail一杯,每日各限30份。
TeaWood Deluxe
地址:尖沙咀河内道18号K11购物艺术馆B1楼B105-B106号舖
文、相、片:Cathy