大坑呢間新餐廳，兩位創辦人嚟自波蘭同意大利，呢兩個國家同香港嘅飲食文化都有個共通點，就係唔少得豬肉！因此餐廳以豬肉為主題，六成菜式都以五種豬肉創作而成：美國杜洛克豬、英國漢普夏豬、日本鹿兒島黑豬、意大利席恩那琴塔豬、匈牙利曼加利察豬，各有風味，炭燒烤肉更係必點。加上餐廳同本地精釀酒廠合作，供應獨家啤酒。
 

餐廳氣氛悠閒，設有主餐廳、啤酒吧及Salumeria吧

Porkcentric位於大坑，係附近Ask For Alonzo嘅姐妹店，不過就唔賣意大利菜，反而以德國、匈牙利、波蘭等地嘅美食為靈感。另一亮點係供應一系列風乾火腿，更係全港唯一一間可以單點波蘭風乾火腿嘅餐廳。
 

中歐風味前菜

Porkcentric Borscht（$98）

正宗中歐風格嘅羅宋湯，以甜菜頭為主，加入大白菜、蘑菇等，味道清甜。加上蒔蘿、烤豬腩肉同酸忌廉，特別係烤豬腩肉可以增加焦香同脂香，倍添風味層次。
 

Polish Pierogies（$68/4件，$128/8件）

呢道傳統波蘭菜賣相平凡，但食落味道有驚喜。餃子裡面係芝士、薯仔同洋蔥，外面係牛油醬汁。芝士、牛油嘅奶香同薯仔、洋蔥嘅甜味好夾。
 

Pork Trotter Croquettes（$128）

用手撕豬手作為餡料製作可樂餅，外脆內軟，而且食到一絲絲豬肉，口感豐富。配搭酸辣沙律、醃紅洋蔥可以平衡膩感。
 

Veal Tripe & Chickpea Stew（$108）

牛肚鷹嘴豆燉菜嘅食譜嚟自大廚Giuliano羅馬嘅家鄉，醬汁甜中帶辣，牛肚非常軟腍入味，相當醒胃。配搭薄荷同烘過嘅麵包。
 

最啱Share！備長炭烤燒肉

Roasted Pork Belly（$168）

精選橡果餵飼嘅西班牙伊比利亞黑毛豬，用肥瘦相間嘅五花腩部位做成燒肉，外層香脆，裡面嘅肥肉更係入口即化，瘦肉部分亦非常軟嫩。加上莎莎青醬、烤歐洲蘿蔔及蘋果片，一解油膩。
 

Hungarian Pork Chop Tomahawk（$568，18-20oz）

多人分享就要點呢份炭烤匈牙利曼加利察豬斧頭扒！曼加利察豬嘅特色係油花豐富，占60-70%，肥美甘香。大廚更於日本備長炭爐中額外加入蘋果木同壓縮木炭，令烤箱溫度更穩定，鎖煮肉汁及鮮味，同時帶淡淡天然甜香。口感細膩、肉香豐富，點埋墨西哥辣汁更香口。
 

Iberico Braised Pork Knuckle（$288）

燉豬手就選用英國漢普郡豬嘅原隻豬手，加入蘋果酒燉煮，蘋果酒嘅甜味融入豬手，令豬皮柔軟而唔爛，豬肉鬆化唔油膩。伴以扁豆、德式蘿蔔酸菜同烤蔬菜。
 

Grilled Octopus（$298）

豬肉以外亦有烤海鮮同蔬菜，例如呢道香烤八爪魚，口感Q軟彈牙，越嚼越有鮮味。配搭紅菜頭辣根蓉及紅洋蔥香芹沙律。
 

Assorted Grilled Vegetables（$198）

多款蔬菜包括球芽甘藍、歐洲蘿蔔、蘆筍、西蘭花、薯仔等烤熟，然後灑上山羊芝士，最後淋上意式薩巴糖漿（Saba Syrup），帶出淡淡炭烤風味。
 

甜點之選

Nutella Parfait（$88）

以蛋餅酥餅夾住自家製意式Nutella半冷凍甜點（Semifreddo），外層輕盈酥脆，夾心好似雪糕咁柔滑同入口即溶。可以配旁邊嘅雜莓同覆盤子醬，微酸解膩。
 

Apple Cake（$98）

波蘭常見嘅甜品之一，用青蘋果切片加入香料製作而成嘅蛋糕，可以食到蘋果嘅酸甜滋味。再加上核桃雪糕，口感冷熱交替相當過癮。
 

Vanilla Bavarese（$108）

同一般嘅拿破崙唔同，呢款Vanilla Bavarese夾心係巴伐利亞忌廉（Bavarian Cream），食落少一份蛋香而多一份厚滑口感。加上杏果醬同朱古力醬，甜而不膩。
 

獨家本地精釀啤酒

餐廳中央有三個吊頂直立式啤酒缸，啤酒每週從釀製廠直送到店

餐廳同本地精釀酒廠門神啤酒合作，抬頭就會見到餐廳天花吊住三個直立式啤酒缸，酒缸每個星期都會裝滿500升新鮮釀好、直送到店嘅啤酒！其中「蓮花宮特釀」更係餐廳獨家發售，亦會定期轉換款式，例如最近係蓮花宮熱帶風情，入口帶果香好啱夏天。
 

Monkami Sake Rice Lager（$58）

另一特色推介係呢杯米釀啤酒，以日本清酒米釀造。酒體輕盈、帶淡淡柑橘同米香。
 

啤酒吧供應多款啤酒以及啤酒Cocktail

Salumeria吧展示多款風乾火腿

Porkcentric

地址：大坑銅鑼灣道98號地舖

文、相：Cathy.H