今年優秀開飯熱店大賞得獎名單有成97間餐廳，大家有邊間食過或者未食過呢？唔緊要，咁多餐廳一於逐間慢慢去試！我哋編輯都有自己心水之選，我哋都偏心本地美食多少少，今次一於分享吓我哋嘅心頭好，可能有機會撞到我哋開餐架！
初戀嗱渣麵 榮記粉麵
圖：
圖：Perrins：絕無誇張，食咗榮記車仔麵至少二十年，由皇室堡後巷開始幫襯，直至入舖、搬舖，我都一直係忠實粉絲！好多人批評榮記多味精、零服務、勁加價、要搭枱，但係一道招牌濃郁腩汁湯底，係有啲鹹，但喜歡就是喜歡，真係邊度都無法取代，令我咁多年心甘命抵支持。多年味道始終如一，即使偶有失準，但至少跟以前分別不大，係一種會令人掛住嘅味道。
榮記嘅車仔配料選擇多，但我的常餐是滑溜豬紅、清甜冇渣嘅蘿蔔、軟腍入味嘅牛筋三大鐵膽，偶爾加餸獎勵自己，牛肺墨魚頭豬大腸雞翼尖係指定後備，配上爽彈油麵或米線同一支玻璃樽裝可樂，就係食極唔厭的comfort food！即使榮記有分店，我還是鍾情糖街總店，見住店主一家人特別有親切感。慶幸榮記一直冇離開銅鑼灣，讓我的美食回憶得以延續下去。寫寫吓，又再想起呢一碗勾魂車仔麵了！
小店老薑辣中辣 佳佳甜品
Kar：作為後生細仔，都係傾向鍾意食西式甜品多啲，而呢間係少數幾得我心嘅中式甜品。首先當然係因為平啦，食餐飯閒閒地都200零蚊落樓，再轉場食多餐甜品其實都幾金，呢度好在夠平，又夠多位（係要等下啫）嘛。
無論天氣凍定熱，都要嗌返碗蕃薯糖水，因為真係好夠薑味。要知道夠辣先係蕃薯糖水嘅精髓，愈辣就愈香！上年聽到佢哋被瘋狂加租要搬走嘅消息，就覺得好可惜，點解啲好食嘅小店成日都係咁？好在有人用友情價將而家呢個舖位租畀佢哋咋。 之前同老闆做過訪問，就知道每碗糖水背後嘅心機有幾多。老闆同囝囝，每日輪流接力，由朝早凌晨3、4點就開始預備糖水，一路又做到凌晨。而且對於用料亦有一定嘅要求，寧願貴啲都唔肯轉用隻差啲嘅料，咁有heart，係值得支持嘅！
平靚正Comfort food 合益泰小食
圖：嘉菲cc
圖：Cathy：每個人都會有自己嘅Comfort food，而我嘅Comfort food之一絕對係熱辣辣又香噴噴嘅豬腸粉。喺香港講起腸粉當然要哦哦數到呢間唔少深水埗街坊嘅最愛，亦係我每次去附近電腦商場買嘢一定幫襯嘅合益泰小食。佢地嘅腸粉唔單止特別滑而有米香，仲有店員落得非常爽手嘅混醬加芝麻——個人最愛佢地嘅芝麻醬，睇起嚟有啲稀但聞落香氣十足。而且豬油腸粉而家已經買少見少，老實講係無咁健康，但Comfort food就係要以氹自己味蕾為先吖嘛。
通常趕時間就會企喺後巷以狂風掃落葉之速食哂落肚，偶然先會坐低食多碗蘿蔔或者豬皮魚蛋。座位唔多所以每次都要搭枱，但或者呢個亦係一個好機會，令你放低部電話，同對面枱嘅食客講句「唔該可唔可以遞樽芝麻畀我？」，重拾一下人同人面對面嘅交流。
開飯熱店大賞2017：https://www.openrice.com/info/awards2017/index.html
文：Perrins、Kar、Cathy
