往年呢啲时候,好多人都去咗泰国享受阳光与海滩咯,但而家未飞得住,惟有喺香港搵住泰国菜吊住瘾先啦!泰国船面都不失为一个好选择呀!船面汤底一般都加入唔同嘅材料熬煮,香味浓郁,而配料选择亦非常多。今次开饭仔就为大家介绍全港唔同特色嘅船面,每一间都各有千秋呀!
多料之选 笃笃船面
食船面通常都得猪、牛、鸡几款选择,但呢间餐厅嘅船面就好似车仔面咁,可以自选唔同配料,连牛柏叶、札肉、猪大肠、鲜虾、鸭血等等都有,再配上泰式河粉或者金边粉,变成一碗香港地船面啦!
经典之选 船皇
呢间船面餐厅来头唔细呀!1988年喺泰国起家,喺泰国已经有50几间分店啦!汤底微咸,味道浓郁,招牌菜嘅大大碗「船皇汤面」,有齐晒鸡翼、猪肉丸、猪腩肉、牛肉片等8款配菜,系丰富嘅!
米芝莲之选 泰面
呢间泰国菜餐厅连续三年荣获米芝莲推介,船面汤底用猪皮、猪红、猪骨熬制,味道特别浓郁。不过配料先系重点!加入咗澳洲和牛片,半熟嘅牛肉嫩滑入味,索埋汤底嘅阵阵肉香,相当有层次!
抵食之选 阿叔泰面
自认系小鸟胃嘅话,呢间嘅迷你船面就啱晒你啦!汤底用牛骨熬足12个钟,肉香味甜!牛魔王记住拣牛肉船面,牛腩牛丸都够香。指定时段$15就食到碗泰版船面,正常午餐晚餐时间,都系50几60蚊碗,又好食又饱肚,性价比超高!
香浓之选 666泰船面
讲得系「香浓之选」,当然系讲紧佢哋嘅汤底啦!汤底加入猪骨、椰水同唔同嘅草药熬煮,除咗甘草同八角等常见香料,仲加入咗两种得泰国先有嘅草药!汤底浓郁带咸香,主打猪肉船面,有猪肉片、猪润同腩肉,每一啖都带有草药嘅香味~
文﹕Kiko