8月份好評餐廳十強
2017-09-08

嚟到暑假嘅尾聲,大家有冇盡情食玩瞓呢?今個月睇嚟日本菜佔一半,有香港人長期都支持嘅拉麵,亦有新開超人氣餐廳,十強之中有唔少新面孔出現,有啲更加係開張無耐已經打入榜,氣勢認真強勁!閒話唔講喇,立即同你睇睇8月十強名單!


第10位 吉列牛忌廉烏冬專門店

又係你呀吉生?雖然吉列牛熱潮慢慢減退,但呢間來自韓國嘅專門店已成為十強常客,6月曾經入榜,今次再捲土重來。吉列牛以外,忌廉烏冬都係餐廳招牌,白色嘅忌廉令到底下嘅咖喱汁更加creamy,係每枱必點菜式。

圖:babyzbbiampandaaaa


第9位 北海道爐端燒 (*新上榜)

呢間居酒屋係來自大阪嘅過江龍,唔好以為一定好貴,走大眾化路線,食物就係日本常見居酒屋菜式,好似送酒小菜、壽司、拉麵、串燒等等咩都有!招牌菜之一係原個芝士撈意粉,喺客人面前即席製作,芝士味濃,賣相又一流。

圖:mk chan chancarykof


第8位 倪姐泰國美食 (*新上榜)

夏天特別想食泰國菜,今次呢間九龍城開業冇耐嘅泰菜館,食物同格局同上一手都有啲相似,早前$1 promotion吸引唔少人去食。食泰菜梗係要食生蝦、冬蔭公、咖喱炒蟹,呢度仲有坊間較少有嘅船河,湯底夠濃,好有泰式地道風味。

圖:PintzFoodcaptain.hk


第7位 辦館 (*新上榜)

呢間咖啡店最近將版圖擴張,去埋旺角插旗!咖啡固然唔錯,食物同樣係港式輕食為主,好似番茄湯通粉、沙嗲安格斯牛肉撈丁,最出名嘅溫泉蛋芝士多士當然繼續供應。不過呢度大部分都係吧枱位,未必坐得咁舒服。

圖:Wen~~~noknokyuen


第6位 芝樂坊餐廳

已經係第4個月打入十強,人潮開始有減退跡象,反而唔使排咁耐就食到,午餐更加容易入座!芝士蛋糕係必叫是常識,餐牌有咁多選擇點揀好呢?比較多人柯打嘅包括牛油果雞肉沙律、四重奏芝士長通粉、炸芝士通心粉球等等,唔知要幫襯幾多次先食得晒呢?

圖:babyanki惜食識食


第5位 十和田總本店 (*新上榜)

香港壽司店好極端,一係就係連鎖店,一係就係omakase級數,選擇實在唔多。呢間新店就填補中價路線嘅空隙,有日本師傅駐場,壽司係手握唔係機製,質素相當唔錯。蟹膏沙律、松葉蟹三味同拖羅三味更有日本名店美登利影子。

圖:eat_eat_everydayCeliaHing


第4位 Tartes & Pop (*新上榜)

甜品一向受歡迎,呢間法式撻專門店由法國人開設,開業接近兩件,儲落好多fans,更被譽為係全港最好食嘅撻!每日大約有十款,更不時推出特色口味,好似mojito、香橙伯爵茶、芒果椰子等,件頭細細唔膩,買返屋企做飯後甜品就perfect。

圖:ChungYanyan4313anssicaaa


第3位 蜀大俠 (*新上榜)

麻辣火鍋上位喇!海底撈未開業,已經有一大堆國內名店搶先插旗!呢一間喺大陸有成200間分店,好多名人幫襯,香港店裝修及菜式都充滿中國色彩。麻辣鍋湯底用多種辣椒香料熬成,一片紅油就知辣度勁,配料賣相靚,必吃鵝腸、鴨血等內臟。

圖:技巧樹熊Kikivicki


第2位 金田家 (*新上榜)

拉麵不死係真嘅,呢間曾經被選為福岡最佳拉麵,喺銅鑼灣拉麵戰區登龍街站穩住腳,更殺入元朗開分店!供應傳統豬骨拉麵、雞湯拉麵,亦有創新嘅黑松露、松茸豆乳同柚子辛口拉麵。湯底濃郁,而主角之一係煮得火侯剛好嘅溏心蛋!

圖:mantung88為食MoJil


第1位 FLIPPER’S (*新上榜)

毫無懸念,未開業已經哄動坐城震驚13億人,呢間來自日本嘅奇蹟之班戟,一開業即勇奪第一位並唔係奇蹟!梳乎里班戟賣相靚,軟綿又有空氣感,而且位於人流旺盛嘅銅鑼灣,完全俘虜一眾甜品fans,即使要排隊都在所不惜!

圖:BoBo_Chow926Luminol



文:Perrins

Keyword
十強
排行榜
吉列牛
居酒屋
泰國菜
西菜
壽司
甜品
麻辣
火鍋
拉麵
班戟
開飯專題
開飯仔為你提供各類型最新飲食情報及優惠,全面照顧你的飲食喜好。
Restaurant Info
Show More
Show Less
Monthly chart
Delicious USA Introduces Spectacular Dishes across 25 Restaurants
2020-07-22