周記油渣麵 (深水埗)

十一月五日, 放咗學, 同老公返到深水埗, 特登走噃去《周記》食佢既油渣麵,
因為過多三日就要搬離深水埗區喇! 搬走咗之後, 我諗我好會好少機會返嚟呢頭食嘢,
但其實講到食嘢, 深水埗區真係臥虎藏龍架!
有《維記咖啡粉麵》、《譚仔雲南米線》、《金城苑越南餐廳》、《泰潮》、《飛鷹餐廳》、
《坤記粥店》、《超幹線刺身》、《松記糖水》、《大利美食中心》(街市內),
同埋好幾間賣腸粉(《為食軒》)、牛什(《日旺》) 賣到出晒名既小食店,
當然唔少得呢間《周記油渣麵粥粉茶餐廳》!
因為呢度除咗油渣麵好食外, 其餘既炒粉麵飯都好食又勁抵食呀!

其實之前已經嚟食過幾次, 但次次都唔記得帶相機,
今次可以話係搬之前最後一次幫襯, 所以一定要帶定相機影底佢啦!

呢個係加咗酸辣雪菜既油渣麵, 另外有原味油渣麵架,
最鍾意呢度既油渣係炸過, 所以就算係肥膏部份食落都唔會覺得太膩,
又脆又香, 仲勁多料, 咪睇佢細細碗咁, 其實好夠飽呢!

至於老公就話今晚想食粥, 所以叫咗碗及弟粥, 以呢間唔係主力賣粥既食店嚟講,
佢個粥都已經好好, 夠綿夠料, 只係唔夠香啫~

老公仲叫咗個呢度似乎幾出名既炸鴛鴦餃, 次次嚟親都見有兩、三檯客會叫呢個餸,
襯熱食又確係幾正喎~ 雖然熱氣咗啲, 但簡唔中食吓都可以接受呀, 不過食完會好飽囉...

唉! 搬走咗之後, 睇嚟都冇乜機會再嚟幫襯喇...

更詳細資料及圖片請看 : http://hk.myblog.yahoo.com/joycewai616/article?mid=11527

喜悅海鮮酒家 (銅鑼灣)

十一月五日, 今日嚟試吓呢間只係開業約一個月既酒樓,
因為佢做緊全部點心半價呀!!
咁就入去試吓好唔好食啦! 最多唔好食咪冇下次囉~

除咗半價點心, 仲有張超特價既點心紙, 都有十款八款架~
基本上啲點心都 OK, 係煎炸嘢比較膩, 同埋個流沙包唔得囉!
叉燒包同菜肉包都係麻麻哋, 但雞仔包就幾好。

最吸引我哋既係個灌湯餃, $11.8 一盅咋! 我哋一人叫咗一盅啦!
味道叫做合格, 啲料都足, 只係個皮厚咗少少啫~
仲有個炒飯 $38 都 OK, 不過個酸汁差少少。

我諗我哋見到半價太開心, 乜都點啲嚟食, 最後發現叫多咗嘢啦! 勁飽呀!!
總括嚟講呢度都唔錯, 但我哋都諗佢做半價點心既時間唔會太長, 所以有心幫襯食平嘢既朋友就要襯早喇~~~

更詳細資料及圖片請看 : http://hk.myblog.yahoo.com/joycewai616/article?mid=11456

濠餐廳 (沙田)

十一月一日, 今日係 284 生日, 約咗佢兩公婆走嚟沙田麗豪酒店食 buffet,
點解要去到咁遠食 buffet ? 因為呢期做緊龍蝦喎~

先講主菜, 每人有半隻芝士焗龍蝦仔, 原來仲有鵝肝食添!
隻龍蝦都 OK 啦, 但唔算好鮮好好味, 鵝肝第一次嚟嗰啲比較普通,
佢可以再落 order, 我同老公都各要多兩份, 第二、三次嗰啲好食好多呀~

呢碟係 284 佢哋既冷盤, 啲賣相都幾得喎!

到我啦! 第一碟當然係魚生刺生類啦! 都幾多款式同算幾新鮮喎~

呢碟係我同 284 share 既熱葷, 普通, 唔特出, 係啲辣酒煮花螺最正 (影相前已經食晒兩隻)。

蘇皮龍蝦湯, 個湯唔錯, 可惜個蘇皮厚咗啲。

今晚除咗個鵝肝, 另一個最正既食物 - 片皮鴨, 大量供應,
老公又勁鍾意食, 食咗好幾份, 我都食咗兩份, 正!!

終於可以食咗沙律, 由於呢期搬屋冇得煮飯, 少食菜, 所以今次攞咗好多沙律食,
沙律料都幾多款, 乜都有啲, 唔錯, 如果有埋意大利沙律汁仲正!

啲芝士亦唔錯, 但我已經開始好飽.................. 佢另外仲有朱古力濆泉架, 不過唔記得影相。

老公幫我拎咗份幾生吓既燒牛肉, 由於已經好飽, 所以分咗一半畀九號,
可惜呢件牛扒比較靱, 唔多掂, 最後只係食咗三分一, 真係食唔到喇...

第三個必定要推介既係呢度既雪糕, 係自製既超低脂及 0% 脂肪既雪吧嚟架!
芒果味最好食, 我都忍唔住食咗兩杯各四個球先收手!

呢間酒店既 buffet 裝修真係唔錯, 我幾鍾意藍藍綠綠既顏色, 好海洋 feel,
食物選擇亦都幾多, 有機會都想再嚟幫襯多次呀!

更詳細資料及圖片請看 : http://hk.myblog.yahoo.com/joycewai616/article?mid=11451

新星海鮮酒家 (銅鑼灣)

十一月一日, 今日埋數要返工, 一早已搵定資料, 特登走嚟試吓呢間新星飲茶得唔得!
坐底落單覺得啲嘢都幾貴, 但好多選擇, 不過啲食物嚟到後,
先發現原來呢度啲份量比一般酒樓既多, 所以可以叫少幾籠點心,
而且個楊州炒飯仲好多料, 四十幾蚊咁大碟, 我哋五個人都唔係好食得晒呀! (呢度只係一部份)

呢個脆炸鮮什果, 初時以為係去飲食嗰啲, 點知原來啲什果喺面架! 唔係包係裡面既!
賣相就幾靚, 但食落真係麻麻, 唔建議大家食囉~

Anyway, 佢其他點心腸粉炒嘢都好得, 用料靚啲, 份量大啲,
食到個個飽到郁唔到都係五十幾蚊一位, 咁樣計, 根本一啲都唔貴架! 一定有下次!

更詳細資料及圖片請看 : http://hk.myblog.yahoo.com/joycewai616/article?mid=11450

泰簡單 (銅鑼灣)

十月廿九日, 搬屋呢段時間都煮唔到飯, 所以要成日跟班同事出街食飯,
今日又走噃去《泰簡單》, 原來佢哋啲午市餐牌都轉得幾密架喎!

不過今次食物配撘都幾搞笑, 由於好想食咖喱,
明知呢個咖喱牛肉係跟拉麵唔跟飯都要試,
啲咖喱同牛肉都好味, 可惜用嚟配拉麵就真係差啲, 唔多食到啲汁囉~

睇吓, 佢個咖喱牛肉份量真係幾足架!

同事叫咗「肉片炒翠肉瓜」, 我初時都想食呢個, 因為鍾意食翠肉瓜,
但怕個份量唔夠, 同埋又勁想食咖喱, 所以冇叫到, 不過原來呢款個份量都足架!

仲有呢個南瓜海鮮飯, 好似好正咁呀~ 可惜我對南瓜興趣不大,
但試過一啖, 都唔錯既, 鍾意食南瓜既人應該覺得好好味!

間唔中嚟呢度幫襯吓都幾好, 價錢又唔會太貴, 啲食物質素又 OK, 仲會間唔中轉款添!

更詳細資料及圖片請看 : http://hk.myblog.yahoo.com/joycewai616/article?mid=11434