rst123的個人專頁

呢間中環嘅餃子店開喺利源西街。由於係假日嘅關係，裏面條街已經比一班菲傭印傭逼到水洩不通。好唔容易先搵到呢間餐廳。餐廳係有一班後生仔打理。鋪頭好光猛，而且好乾淨。為咗支持依班後生仔我就揀咗一個最貴嘅套餐，有六隻餃子、一個米線同埋一個小食。黑松露豬肉餃子煎得好香脆，好有肉汁，黑松露嘅味道亦唔少。米線係用昆布堅魚湯，飲落去好甜。小食係炸魚片頭，炸得略為多油左少少。埋單要$74。餃子店來講佢都算貴，但係喺中環呢個黃金地段都叫做合理啦。…查看更多

行行吓旺角，突然心血來潮想食牛扒。於是去左依石板燒牛扒餐廳。餐廳裏面基本上係自助式嘅，一入到去就可以喺部機上面點單，咁我就叫左200g嘅西冷牛扒。然後又坐定定等部機響，等嘅同時就去咗夾沙律、麵豉湯同埋白飯。沙律菜都幾新鮮嘅同埋洗得幾乾淨，麵豉湯就略為鹹咗少少。講返個主菜牛扒，一上到黎我諗係得一成熟，咁你就可以隨你嘅喜好，等個石板慢慢煎到塊牛扒去到你想要嘅熟嘅程度。咁如果你鍾意食生啲嘅呢，你就要好快咁切左塊牛扒，然後將佢擺喺隻碟度，如果唔係佢就會變到太熟。我自己就鍾意食生少少嘅，所以我就好快咁切完就拎開咗塊牛扒。西冷牛扒肉質都幾好，牛味幾重，連埋啲沙律菜一齊食感覺冇咁油膩。成個餐$128，如果你唔想自己煎牛扒嘅話，黎呢度食都係一個唔錯嘅選擇。…查看更多

今晚約咗人一班朋友聚舊。嚟到深水埗一間西式cafe。環境幾好幾chill。佢個餐牌要用qr code掃去佢個網址自己睇。意念係想環保啲換餐牌唔使次次都要印過哂啲紙。食物都係啲大路嘅西式野，豬、牛、雞、魚、海鮮、意粉。我就揀咗紅酒羊扒。朋友揀咗牛扒，朋友嘅牛扒好快就到左，而我嘅羊扒就要等左差唔多20分鐘先到。睇落去牛扒好大塊好抵食。而我嘅羊扒都唔差，有四舊羊扒，一堆沙律菜，薯蓉。夠食就一定夠食，但係相對地，羊扒就好似抵食啲。味道方面羊扒一啲都唔騷，煎得幾好。跟餐嘅甜品係綠茶布甸，出乎意料地幾好食。…查看更多

夜麻麻突然想食拉麵，見依間未試過，即刻走入去試下。嗌咗招牌嘅炙熱味增拉麵，加咗個餃子。一嚟到試吓個湯先，湯底幾特別，唔係平時嘅豬骨湯。佢喺塊叉燒上面加咗少少蒜，係俾你撈落個湯度嘅，撈完再試多啖湯，果然唔同咗。面底就普通啦，唔係幾夠彈牙。叉燒得一塊，好肥，鍾意食肥叉嘅就啱晒。另外有幾粒細細粒嘅叉燒粒，反而幾好食幾入味。除咗叉燒，配菜仲有幾塊筍片同芽菜令碗麵清新左健康左。再飲下個湯覺得鹹咗少少。餃子就得五粒，但係要成$45唔係咁抵。…查看更多

西灣河新開嘅馬來西亞餐廳。嗌咗三樣嘢。第一樣係海鮮喇沙摻摻，有蝦、豆卜、半隻半熟蛋、魚蛋一粒、魚片數塊，湯底非常惹味，油面米粉份量唔少，40幾蚊來講算幾抵食。第二樣係雞髀飯，飯係有少少椰香味，口感唔錯，唔會好似白飯咁寡。雞髀亦都係大大隻，肉質鮮嫩，唔會好鞋口。跟飯仲有少少花生同埋魚乾，好適合用嚟送飯。40幾蚊咁大隻雞髀又有嘢飲算係咁啦。第三樣係馬拉盞通菜，炒真係幾有鑊氣，鹹魚味重，但係油左少少，不過廿零蚊大大碟，都算OK啦。…查看更多

今次嗌咗四樣嘢。首先係前菜醉雞捲，一共有六七件，每件都好入味，食到有酒香， 件件都有骨膠原。然後係人蔘雞湯面，有黑木耳、西蘭花、糖心蛋、同幾件雞片，湯底濃郁，飲得出係落足料，而且冇味精，麵底就普通上海麵，糖心蛋係茶葉蛋味道。再黎係番茄濃湯淨湯，雖然冇面，但係配料十足，一樣有黑木耳、西蘭花、半舊蕃茄、同埋四五塊肥腩肉。湯底帶甜，個人認為有少少甜得滯，所以最後冇飲晒啲湯。最後係一個蒜蓉炒西蘭花，幾有鑊氣，味道唔錯。飲品就嗌咗杯自家製羅漢果茶，幾好飲。…查看更多

今日突然心血來潮想打邊爐，去咗依間有午市火鍋放題嘅餐廳 中。我叫左嘅餐係109蚊加一。湯底有四五種，我就揀咗最清淡嘅清湯。食物種類都有幾多選擇，菜有三四種，其他蔬菜類嘅都有五六種，其餘丸呀，腸仔呀等等，加加埋埋都有好多選擇， 種類都算幾豐富。另外飲品都有四五種，加埋各式汽水。呢個餐，牛同豬都係可以無限嗌，肉質就唔好期望太多啦，呢個價錢算ok啦。另外有haagen dazs嘅雪糕，我今次就冇試到啦。開枱計限時60分鐘，佢會喺仲有15分鐘嘅時候提醒你，到真係夠鐘就會差唔多每隔5分鐘咁催你走。態度都算係咁啦，起碼唔會一夠鐘就收曬你啲嘢。…查看更多

牛扒一直都係我嘅最愛。見到一啲平價嘅牛扒餐廳都會忍唔住入去試下。我叫左紐西蘭西冷牛扒，冇加任何伴菜。佢嘅牛扒係用鐵板上，試過效果滿分。 一開始覺得好奇怪點解落單嘅時候佢冇問我幾成熟，原來係佢一上菜預設咗就係五成，而你就可以根據個人口味，喺鐵板上煎熟佢，將個責任外判賣畀你，以佢咁嘅價錢都可以接受嘅。西冷牛扒牛味都幾重，由於佢一開始就係五成熟，所以要快快手食哂佢，唔係就會好靭。而佢嘅配菜有大量嘅洋蔥同粟米，令到嗰餐冇咁油膩。我覺得幾抵食，唔使一百蚊食到一個質素ok嘅牛扒。…查看更多

一間拉麵店好少會得到米芝蓮嘅垂青，所以一直都好想嚟呢間米芝蓮拉麵試下。咁啱佢而家做緊優惠 ，終於有機會啦今次。我嗌咗黑醬味玉叉燒拉麵，黑醬我諗即係黑蒜油啦。個湯飲落去其實個黑蒜味唔係好出，有一種淡淡嘅豬骨味，畀我嘅感覺係佢唔太鹹，但係飲落去好濃，亦都好油。老實講我唔太鍾意個湯。麵質嚟講，因為佢係幼面，所以相對哋冇咁彈牙。叉燒佢就有四塊，分量好足，而且唔太肥，係我鍾意嗰隻。值得一讚嘅係佢嘅溏心蛋，好少香港嘅拉麵店會做到好似日本嗰隻咁，依間拉麵店就做到啦，值得一讚。…查看更多

慕名而來到中環，一嚐另一間日本過江龍嘅拉麵店。 好好彩星期六嘅午飯時間嚟，唔使排隊。立刻叫咗招牌番茄汁沾麵，差唔多等咗十幾分鐘，終於嚟到喇。拉麵嚟講，佢嘅準備時間都算長，但係冇所謂啦，一場嚟到。首先講下個麵質，幾彈牙唔錯，試一試個湯，真係好有蕃茄味，而且因為我嗌咗微辣，佢加咗一隻辣椒仔，令個湯更加惹味叉燒有兩至三塊，瘦瘦地口感唔錯。佢另外有啲叉燒粒，炒香咗好香口。當然唔少得佢嘅大量香葉， 味道唔會太勁，容易接受啲。值得一提嘅，佢有一細條小黃瓜，令到成個沾麵添上一試清新嘅感覺。…查看更多

難得平日嚟到深水埗，就專登搵咗一間評價唔錯嘅拉麵店試下。平日當然就係冇乜人，好快就坐低咗。 裏面嘅裝修都ok，睇得出有擺心思落去。咁當然我唔係呢式裝修而係食拉麵啦。我就嗌咗海老拉麵，要咗普通麵同椰菜，叉燒揀咗火炙。佢跟餐有個小食同飲品，我就揀咗炸雞同coke zero。 拉麵賣相唔錯，佢中間圓形就係一舊肉碎波。湯就略為鹹咗少少，飲唔到啲咩豬骨味。櫻花蝦亦都冇乜 蝦味，所以湯就麻麻地喇。麵質都ok，唔會太淋唔會太硬，都叫彈牙嘅。叉燒就完全食唔到火炙嘅味道。炸雞都叫炸得ok啦，都係有肉汁嘅，但係有少少碎骨，同日本食嘅炸雞唔同。總括嚟講係一間相對普通嘅拉麵，值唔值80蚊就見人見智喇。…查看更多

元朗真係好多嘢食。今日就嚟咗呢間台式餐廳。根據佢嘅餐牌所講，呢度賣宜蘭特色嘅食物。我就嗌咗鹵肉飯加一種叫羅東肉“火庚”湯， 跟餐仲有一杯冷泡無糖東山茶。 滷肉做得好夠味，連埋飯食一流，但係啲豬肉好似唔係咁新鮮，食落去有啲削削地，滷蛋亦較為普通。佢個湯呢就即係香港嘅湯羹，杰杰地，有啲芽菜，魚肉條，同埋一舊舊嘅瘦豬肉。味道酸酸地，應該係落咗醋。佢落芫茜都好重手，鍾意食嘅話就會覺得唔錯。而最後個東山茶就冇乜茶味，亦都一啲都冇唔甜。整體嚟講，都算係幾正宗嘅台式食品。…查看更多

週末嚟到灣仔區，行下行下就嚟咗位於大王東街嘅神虎拉麵 中。唔使點等位就已經入咗去。嗌咗一個黑虎拉麵試下。黑虎拉麵，顧名思義，係用咗黑蒜油嘅豬骨拉麵。咁除咗面同湯之外，佢就有洋蔥黑木耳，同兩粒肉丸。大家睇睇圖就知道湯底有幾濃。我食拉面特別鍾意比較濃嘅湯。食拉麵仲要食得清淡，不如唔好食。食拉麵就係要佢夠濃，夠油，夠肥，而依碗野完全滿足到我呢個要求。再講講佢兩粒肉丸，相對地比較少見，咁同我哋平時食嘅豬肉丸，梗係唔同喇。質感係冇咁實淨，散散地 但佢落咗啲馬蹄喺裏面，就會好爽口。…查看更多

星期日嘅中環係冇乜人，加上我十二點已經嚟到，所以就走咗去試下一間平時要排隊食嘅餐廳。呢間餐廳有蔡瀾個名加持， 所以平時晏晝都排曬長龍。今日唔使等位直接入去，仲可以揀位坐。第一次嚟，理所當然嗌咗生牛肉河粉，另外加多個炸蝦餅。越南粉唔洗幾分鐘就送到。飲飲個湯先，同平時食嘅冇太大分別，都算幾甜，再試下個牛肉 ，都唔會太靭，口感唔錯，食得出係靚牛。再試下個蝦餅，相對地就普通咗啲啦。講番個價錢，生牛肉河88蚊，炸蝦餅78蚊，中環嚟講算正常價錢。值得一提嘅係，佢個河粉係無限添加嘅，我都嗌多咗一份。對大食嘅人嚟講係一個唔錯嘅選擇。…查看更多

香港地食嘢越嚟越貴，尖沙咀就更加唔洗講， 閒閒地到百幾二百蚊。想食平啲嘅就要去快餐店 。咁如果唔想食快餐店 ，雞記咁嘅潮式粉麵店就係沙漠中嘅綠洲。今次我就嗌咗魚蛋河，炸紫菜墨魚丸撈幼，一碟蝦籽芥蘭，同埋炸墨魚餅。 魚蛋河不過不失，紫菜墨魚丸同墨魚餅就唔錯，食得出係新鮮墨魚手打，彈牙爽口。黑豉油撈麵亦都好入味。芥蘭新鮮，蝦籽更加好少地方有。美中不足嘅係舖頭真係幾污糟。我唔期望你有商場酒店咁乾淨， 但係雞記嘅衛生環境真係要改善一下。如果你想做遊客生意就更加要企理啲。…查看更多