為食細寶的個人專頁

終於的起心肝光顧早輪非常難訂位的釣魚船屋！中午約1點walkin，坐位竟然只是半滿，反觀樓下及旁邊的食肆大排長龍，對比非常强烈🤔入坐時侍應附了一張印有點菜的QR code，掃一掃後選了6件壽司配熱烏冬，確認下單前已問過侍應6件壽司中將會有拖羅、牡丹蝦、帶子，另外三件時令，另外亦有同侍應特別order不要三文魚。上菜時間好快，大約5分鐘左右就到了。4式前菜顏色豐富，吸引食慾👍🏻細寶習慣先食熱食，但熱烏冬不熱，麵豉湯不熱，連蒸蛋都係不熱。。熟食方面連基本的"熱"都做唔到，有點失望。接著睇下壽司可否為呢個午餐爭回一點分數。6件壽司，有拖羅、刀貝、帶子、池魚、間八及1件白身魚。等等，說好的牡丹蝦呢？🙄拖羅入口肥美，但略嫌有渣; 刀貝爽脆; 帶子比較吝嗇，只有半粒; 池魚配上蔥花減低魚腥味，不錯; 間八爽口; 白身魚咬不開。壽司也不算十分出色，只能說正常水平。整體黎講，食物水準一般，食完沒有飽的感覺，而且85折後也超過$100，以lunch來說，實在沒有吸引細寶再次光顧的念頭，反而想試下隔離的餐廳，試下點解要排長龍🤭…查看更多

放工返到屋企唔想煮飯，路過見到呢間美孚小店，原來除左甜品，仲有意粉，價錢仲出奇地便宜！揀左最難出錯的Carbonara，晚餐跟一碗南瓜湯，加$8飲左禁南北杏蘋果雪梨茶。小店即叫即做，意粉大約10分鐘上桌，wow!非常驚喜！意粉熱辣辣上檯已經合格，蛋黃醬唔稀，掛喺意粉剛剛好！唔太咸，而且仲好creamy!煙肉脆卜卜，蘑菇份量亦不小家，食落每啖都有菇味，真心覺得好好食！南瓜湯亦都係熱辣辣上檯，沒有過多的調味，跟意粉配合得好好，互不搶風頭。吃得出是有誠意做的小店，起碼食物應熱則熱，味道正路，加上沒有overpriced, 實在非常難得！值得美孚人支持！…查看更多

是日不用上班，試左邨友推左2星期既日日涮，喺個死場開飲食真有勇氣！午市有丼飯，亦有60分鐘定量火鍋定食及90分鐘放題火鍋，唔想食得咁趕，所以揀左90分鐘放題，而且牛，豬，雞都食到，肉就正正常常，如想食好少少，記住揀第2個價位，最平$109嗰隻牛真心難食。。。先來肉類各一碟，其實正常人食晒呢3碟肉都會覺得飽架，再上拎埋自助區既菜同丸，基本上加肉就唔加得幾多碟。湯底有幾款揀，骨膠原雞湯、泡菜湯、壽喜燒、昆布湯等等，細寶今次揀左壽喜燒，湯比較單調，喺自助區拎啲洋蔥、菜同菇做返個湯頭就正喇！飲品櫃內飲品係住飲既，選擇係多，但比較多不知名飲品，唔係好敢飲，都係飲返正路野穩陣！最後就係成餐飯既重點！午市放題都竟然無雪糕食啊！😭😭😭😭😭…查看更多

知道呢道開左一段時間，但都係第一次食，第一次永遠覺得好新奇，味道又唔錯喎。Lunch 14:30後7折，幾抵食，每個set lunch都有湯跟，第一次去係蝦冬蔭公湯，第二次第三次都係椰子雞湯。因為一大班人既關係，基本上都試得齊lunch set既食物，最得細寶心既係海南雞飯，雞好嫩滑，油飯都好香，有質素第二樣就係pad thai，細寶不嬲都好鐘意食炒金邊粉，呢個炒得唔錯，唔油亦唔會一pat野咁，加少少青檸汁同花生碎，好香口食完一次覺得幾好，之後一星期內又食左2次，好可惜第二次同第三次既水準都比第一次差好遠，椰子雞湯一次暖，一次直頭凍。。。炒菜唔熱，炒飯唔熱，pad thai 唔熱，結論係水準唔平均，短期內都唔會再試了。…查看更多

工作過後路過女人街，兩邊的食肆內，有啲好多人，有啲無乜人，唯獨呢間十三姨排緊隊，見無乜野做，又唔係好多人等，就試下啦。排到入座，未夠8點，手撕雞飯同鵝肝飯都沒有了，轉食手撕雞銀針粉吧！賣相不錯，上檯時熱辣辣，聞落都幾香，湯底稠密，無乜味精味。桌上的指引話先加啲檸檬汁，可提升雞湯鮮味，好可惜檯面上無檸檬。。。亦無秘製辣椒醬😣手撕雞唔會太咸，但撕得太碎，加上勁滑既銀針粉，用店裡提供的鐵匙更比較難”畢”，食多幾啖，實在忍唔住問店員拎辣椒醬，成碗銀針粉個味道即刻提升左10倍！好食好多！大家記得要問店員拎辣椒醬啊！…查看更多

點解我會知？因為我係同其中一篇食評既朋友一齊去試食既，佢就唔方便寫比較差既內容啦，我就不吐不快喇，相就唔出喇，廢事明眼人睇得出邊個食評係我朋友，影響到佢啦。呢度既野食唔可以用好食黎形容，只係入得口食你唔死。串燒夠膽死燒到黑晒，上檯既時候都唔熱既，難為我朋友仲要同一碟野影幾次，盡量影到佢無咁黑，影完都唔想放入口仲有隻大蘑菇，唔熟架陰公，串燒個師傅係咪新手黎架貴就唔係貴既，1x~4x一串，有得坐住食，當交租都要啦。不過環境就麻麻，店員全部都好似返黎玩咁，對我地梗係有啲招呼啦，不過隔離檯就無咁好彩，上齊order後無人理佢地（仲要當晚其實得3檯客）。店員就圍埋一齊傾計，喺門口食煙，we嘩鬼叫，音樂大聲到好似旺角啲劈場咁，整體感覺非常cheap。大家俾唔俾錢食啲燒到黑晒既串燒同買啲咁既服務，就你地自己諗啦，一路食我都一路諗，啲野食質量咁樣，唔怪得之要搵人寫食評啦，不過用呢啲門面野呃到人上黎，但食完又一肚氣既，又點會有回頭客呢？不如俾心機提高店員同食物既質素仲好啦！順帶一提，佢地租埋對面半個單位賣酒，開到12點。…查看更多

韓國過江龍百味堂，喺韓國差唔多每間百貨店都有分店，估唔到會喺香港開店😂早幾日喺韓國過門而不入，今日經過K11就會一會佢啦！百味堂既雪糕採用有機牛奶，所以奶味非常重，聞落非常香！而且甜度適中，唔會太膩。一般黎講，咁重奶味既雪糕多數會好creamy,但又無想像中咁creamy, 似sherbets同雪糕既混合體，所以都溶得幾快，可以揀用脆筒或紙杯裝住，岩晒食得慢既人士👍🏻外型黎講，絕對贏晒，雪糕結實唔易掉下，小朋友都可以食得好放心。…查看更多

某日下午見完客，見有啲時間，就獎勵一下自己食個下午茶啦。觀塘其實好多樓上cafe, 早輪因爲呢間餐廳有下午茶甜品放題而放入筆記名單，不過優惠既野真係唔等人，今次就試下個咖哩豬扒蛋包飯啦。估唔到又幾好味喎，下午茶黎講份量唔細，豬扒好脆口，咖哩汁甜甜地，加埋木魚碎非常惹味！蛋都幾滑，整體比想像中好食當日只係平日既3點幾，都坐左半場人，可見非常有人氣！唯一不足之處係，樓面有4，5個人行黎行去，但都無人留意到我檯上既餐具盒係吉既，想搵人拎啲餐具，但個個對眼都好似生喺頭頂咁，扮見唔到，如果侍應生既服務質素能提高，呢間cafe可再encore…查看更多

雖然黑雨，但無損細寶想食芝士蛋糕既心情，黑雨訊號一落就出街喇！如果唔係黑雨，相信Cheesecake Factory門口唔會一個人都無！Cheesecake Factory選址前身港威戲院，地方好闊落，裝修、燈光同喺美國食真係一模一樣！令細寶非常掛念喺LA既日子！芝士蛋糕大部分$75左右，係貴既！但見到佢個size你會覺得都抵，因為真係好大件！如果比較份量既話，佢會係starbucks 嗰個size 既2.5倍左右。Fresh banana cheesecake $75好香蕉味，香到食落以為連啲cream都係蕉味。芝士蛋糕唔係厚實嗰種，比較輕身，入口即溶，好軟滑！雖然好大件，但一個人食晒都無問題！超滿足啊！…查看更多

出去做野做到lunch都無時間食，咁岩諗起旺角有間cafe做下午茶雞翼放題，仲要星期1～5都有得食，無理由唔上去試下啦！間cafe喺潮流特區對面馬路，高氏大廈隔離條巷仔入去再上樓，勁隱閉，走過左幾次先搵岩路，不過無損雞翼控細寶要食雞翼的決心😂龍華軒有2層，每層座位唔算多，下午4點去到，8張檯坐左5張。店員安排左細寶坐角落位，好舒服，又唔會顯得一個人好突兀，空間感營造得唔錯，每檯都有自己既空間。既然上得黎，梗係試下個雞翼放題啦，一共有鹽香雞翼、蜜糖雞翼、香草雞翼同蒜香雞翼4款可以任食，可惜當日無蒜香雞翼，試唔晒咁多隻味。首先3款雞翼會一次過送黎，每碟都8～10隻，見到都好滿足，不過細寶一個人就食唔晒咁多喇，唯有叫店員每碟既份量減半先，唔夠再加，駛事做大晒鬼。3款入面細寶最鐘意鹽香雞翼，炸完再灑上椒鹽，香口惹味！蜜糖雞翼唔會過甜，食多幾隻都唔會膩😍香草雞翼就無乜特別出色之處。本身驚放題形式，雞翼會唔會好un呢，但又唔係喎，都幾厚肉架喎，單人匹馬KO左16隻，好滿足😋由於雞翼全部都係炸過，所以會有啲口渴，放題唔包飲品，需要另外order，除左咖啡，都有唔同的紅茶綠茶梳打。墊杯的木板仔仲有cafe既名，好有details! 龍華軒環境舒適，播既歌虛無飄渺，令細寶好似逃離左現實咁，唔經唔覺就坐左兩個鐘，聽講carbonara係龍華軒招牌菜式，下次一定要試下！…查看更多

最近好hit講緊一班朋友約食飯難過登天，的確專登約好煩，好彩身邊的朋友都鐘意即興，兩三個人食都會出黎今次拋低仲OT緊既大寶，同朋友即興去左呢間臭臭鍋開飯。幸得朋友夠義氣，6點準時黎排隊，所以能夠食到第一輪。放工黎到門口已經大排長龍喇據聞呢間臭臭鍋係由台灣黎，一直都覺得台灣食麻辣鍋出名，估唔到都鐘意食臭豆腐喎！一入店已經聞到臭豆腐味，可惜同行既朋友無人鐘意食臭豆腐，所以無叫到招牌臭臭鍋。Menu都幾多選擇，嗜辣既細寶當然係食麻辣鍋啦，朋友就分別叫左香蒜牛肉鍋同藥膳羊肉鍋，每個鍋既饀料都唔一樣，唔夠可以再加餸，跟飯或粉絲，細寶就覺得跟粉絲比較好食，因為粉絲可以吸晒啲湯，食落好惹味上菜時會跟一個爐，下面係一舊爉，大約燒到20分鐘左右，唔夠可以叫服務員加。麻辣鍋中有娃娃菜米腸、豬大腸、肥牛、公仔麵、墨丸等等，好豐富。本來以為會唔夠飽，點知最後都食唔晒。肥牛唔算太難咬，墨丸都好彈牙，難得地配菜都全部合格！麻辣鍋湯底可以選擇辣度，平時譚仔食開小辣，呢度既小辣比譚仔小辣更唔辣，鐘意食辣既朋友可以試下中辣啊。另外值得一提既係，個湯底好夠味，基本上唔需要再加調味料已經足夠。各款鍋係無跟飲品既，可加$24左右飲一杯台式飲品，叫左杯百香果紅茶，茶味還好，偏淡，朋友表示佢地既飲品都偏向淡味，鐘意清淡既朋友應該會幾滿意。入座限時90分鐘，基本上都非常足夠，走既時候外面仲好多人等緊位，不禁感嘆，尖沙咀區飲食業由6點爆場爆到9點，真心唔容易，希望呢間臭臭鍋過左熱潮後仲撐得住！…查看更多

星期四既晚上，大寶話慶祝完左個project, 帶我食好野💕大寶今次帶我黎駱駝漆既掌壽司，之前多數同大寶食lunch黎，今次又試下晚市先。門口多左盞貼滿手掌既燈，離遠都見到，好靚好符合店名一坐低就serve左個前菜，係白蘿蔔漬，酸酸甜甜好開胃🖒不過份量略為少左啲，多2粒就岩晒為食細寶喇😆坐低左一陣店員過黎介紹左啲時令野俾我地，當日有個特上刺身盛，入面有8種唔同既刺身，有大拖羅、牡丹蝦，仲有鮮魚等等，可惜我唔食魚，所以散叫左牡丹蝦同象拔蚌就算😛先來一個開胃菜招牌沙律，面頭3片以為係玉子，食落原來係豆腐，一問之下先知係蟹味豆腐，好好味！沙律菜新鮮爽口，配上和風沙律汁，基本上唔會失手，如果大份少少就完美喇本來大寶想食雞泡魚乾，店員話不如試下推介既七味燒魚翅，加左味醂甜甜地，又無雞泡魚乾咁硬，咁就試下啦。果然無介紹錯，食落口感同鱈魚絲好似，甜甜咸咸咁都幾惹味，點埋沙律醬食，簡直停唔到口到左細寶最期待既刺身喇！牡丹蝦大過隻手掌，肉質爽口結實，連個蝦頭入面都好有肉，係新鮮蝦既味啊！如果蝦頭可以炸埋黎食就一流喇！象拔蚌刺身都好鮮甜爽口，仲好厚肉添。刺身好食真係好簡單，夠新鮮就一定好味，估唔到觀塘工廈都有咁新鮮既刺身食🖒因為點左份和牛扒，所以壽司就散叫左幾件就算喇，鍾意呢度壽司係逐件叫，想食幾多件就叫幾多件，唔駛下下兩件咁上。細寶好欣賞呢度既海膽手卷！加拿大海膽大大件，味道甜甜地帶啲甘，仲好creamy，最欣賞既係，食到最尾一啖都仲有海膽架！店員見我地食完刺身，就幫我地上埋啲炸物，都係大路野炸雞軟骨同炸雞翼啦。對比起刺身就失色左啲喇，唯一令人驚喜既係啲雞翼真係好大隻，幾juicy, 唔會炸到過晒龍乾晒。呢個鐵板和牛（5成熟）係大寶叫既，全晚得呢樣野係佢點，所以大寶勁期待😂一上檯滋滋聲，聽見都興奮！店員話呢件牛叫北海道大雪牛，油脂度拍得住神戶同鹿兒島牛，不過入口無神戶牛咁油膩。鐵板既做法逼晒啲牛味出黎之餘仲好香口添。入口油份的確無平時食和牛咁膩，大寶表示唔夠喉啊！唔經唔覺，食下影下就走淨我地一檯，見無乜人就周圍影下相，咁樣影先見到餐廳環境好闊落，樓底又高，仲有盞好靚既雕花燈！老闆仲用sake樽做牆身裝飾，物盡其用。出街食飯最驚就係俾錢買難受，雖然呢度唔平，但論環境同刺身質素，肯定係觀塘區最佳！人大左，對食物質素要求高左，唔再係食放題質素同環境既年紀喇，都係嗰句，刺身唔需要花巧，夠新鮮已經贏晒！…查看更多

星期日的下午，又係同大寶四出搵食的時間。諗起好耐都無一盅兩件，就去左呢間觀塘區幾出名既新式點心店試下。吉吉點位於觀塘裕民坊上面的某條巷仔，對於唔係住觀塘既細寶黎講，拎住Google map都搵左一陣，第一個感覺係，果然好隱世！對食物質素既期待感高左！入到店，見到店內位置都幾迫，無計啦，香港地寸金尺土，好彩客人唔算多，如果唔係，都應該會幾迫。首先係蜜瓜脆脆卷，顏色好靚，聞落好香。食落口第一個感覺，好脆，但係瀨野，勁油啊！好明顯係炸完無吸好油就上碟，同埋明明係炸既，入面餡料完全唔熱，外面脆但內裡未夠熱蜜瓜味好假，過甜，同大寶一人食左一舊就再食唔到落去，差評鳳爪幾入味，可能無豆豉，食落無咁惹味。當第一件入口既蜜瓜脆脆卷令我大失所望之後，已經對吉吉點既點心無晒期望。呢個蝦腸鮮蝦好爽口，腸粉夠晒皮薄，但係！點心最基本既野都做唔到！佢唔熱架！！只係微暖！一間主力食點心既鋪頭，竟然連最最最基本既熱辣辣點心都做唔到當日仲食左其他香口野既，諗住差極有限啦，點知粉漿多過饀，真係寧願唔食仲有，光顧當日撞岩聽到廚房師傅同樓面員工嗌交，由廚房嗌到出樓面，客少都唔係咁樣當啲客無到好明顯對出品同運作都無好好管理，真係唔明點解會咁多好評…查看更多