wingching360's Profile

唔好意思，又係食韓燒啦！今次去咗旺角分店既喜來稀肉，座位比銅鑼灣感覺上寬敞啲。而餐牌嘅內容2間分店係一模一樣。枱面上嘅伴菜味道都係一樣。今次同行朋友唔食豬，所以我哋決定要咗個全牛宴！首先有最快熟嘅牛舌，一開始咁肚餓梗係食啲快熟嘅嘢填飽左個肚先啦！牛舌好爽口，亦都唔會有嗰陣怪怪的羶味，而且份量十足！相信大家都知道呢度最出名就係護心肉，其實我之前次次都叫豬嘅護心肉，今次係第一次試牛，原來同樣出色！肉質非常柔嫩，肥瘦比例啱啱好，仲勁香牛肉味，好值得食！最後仲有每次都係啲點嘅喜來烤肉，份量同價係好多，記住燒之前點多啲醃汁會再juicy d!又係滿足的一餐:) …Read More

講到食韓燒，每次都一定係會來喜來稀肉，因為呢度每次食嘅質素都係keep得咁好，非常有品質保證。而且呢度嘅泡菜都好好味，對我來講鹹度，酸度同埋辣度都啱啱好。仲有包肉嘅生菜都係好新鮮，又大片又爽口。主角肉呢，每次嚟呢度有兩樣都係必點嘅，首先係呢度嘅王牌護心肉，千祈唔好睇佢好似其貌不揚咁，但信我，真係無論點燒，什至燒過龍都唔會硬。而且食豬最怕有嗰陣豬嘅so臭味，但呢個真係完全唔會有，只有好香既豬味。另外都係必點嘅就有喜來稀肉。呢朵”牛肉花”相信有唔少男士都會想收到。我自己鍾意嘅食法就係先燒冇汁既部分，食左牛肉本身嘅牛尾同埋香味先。之後就可以盡情將剩返落嚟嘅牛肉浸入去下面嘅韓國醃汁先再燒。個汁甜甜地，而且多汁嘅時候燒出嚟嘅牛又會有另外一番味道。而且呢度既爐邊蛋亦係我最愛，燒到半熟真係好正！…Read More

之前嚟過呢度食燒肉覺得質素非常之好，所以今次選擇咗lunch嘅時候再嚟嘗試下佢地既lunch set。每個跟餐都有前菜同沙律，食肉前食啲菜就最啱喇！既然呢度叫得牛魔當然要食佢哋嘅牛啦。今次就揀咗兩個牛餐，首先有宮崎咖喱和牛漢堡。唔好睇呢兩塊漢堡細細舊，其實非常足料，食晒都好飽肚！而且和牛味非常濃，完全唔乾唔鞋，配埋有芝士嘅咖喱，真係可以撈兩碗飯食。之後亦都要左份鐵板牛肉，牛肉份量都好足，最驚喜嘅係放咗喺鐵板度基本上已經去到全熟，但係肉質仍然好嫩！同樣地亦都非常有肉香同好juicy，加埋半熟嘅洋蔥同埋好好味嘅醬汁，好正！加埋杯飲品其實真係超滿足！最驚喜嘅係隔離其實有人燒肉，但食完之後完全唔會全身油煙味！…Read More

天氣涼咗梗係打邊爐啦，今日嚟到銅鑼灣呢間超級靚景嘅餐廳同男朋友黎烚吓烚吓！首先湯底今次要咗個雙拼芫荽皮蛋鍋拼濃湯胡椒豬骨鍋，兩邊都係相對比較清，咁就可以更加食到材料嘅鮮味。而且好想一讚個芫荽皮蛋鍋係超級多皮蛋，啱哂我地！打頭陣有呢個超級浪漫嘅黑毛豬腩肉玫瑰拼盤，除咗靚之外，其實都好足料，用咗好多好多豬肉先至捲到呢舊玫瑰花。除咗賣相之外，味道亦都非常之好，完全唔會有豬嗰陣腥臭味，脂肪比例亦都啱啱好。食完豬梗係要食埋牛，叫咗呢個同樣買上100分嘅掛架頂級安格斯牛小排，睇到雪花嘅部份都可以想像到係幾咁入口即溶！之後就到打邊爐必備嘅丸，呢個七星報喜手打丸拼盤每粒都唔同味，啱晒我哋呢啲樣樣都想食少少嘅人，每一粒都非常之彈牙咖！除咗正常造型嘅丸之外，我哋仲叫咗呢個非常可愛嘅”開心小企鵝”。其實佢係手工墨魚丸嚟，食落墨魚味好香，而且咁可愛小朋友都一定鍾意！我哋全家都好鍾意食餃子，所以今次都要左份有晒我最鍾意嘅元素既黑松露蝦蟹餃，嗰陣黑松露味10分香濃，而且餡料非常豐富有蝦又有蟹，鮮味十足。之後我哋亦都點左台灣空運鴨血，鴨血厚薄適中，夠彈牙，冇奇怪嘅血腥味道，完全係爭住黎食！食咗咁多肉係時候食返啲菜，所以都要咗份蔬菜拼盤同雜菌拼盤。接近尾聲，當然唔少得打邊爐必食嘅響鈴！呢度嘅響鈴係手工即炸，夠脆夠大件之餘，最重要係冇嗰陣油益味，又唔肥膩，食多兩件都唔怕濟。最後飲品部份叫左餐廳自家製羅漢果茶同雪梨水，飲落好有家既味道，十分滿足既一餐！…Read More

自從上次食過尖沙咀分店之後，真係好鍾意呢度嘅Pizza，所以就決定帶好朋友佢哋九龍灣嘅分店。的確呢度嘅地點冇咁方便，但係地方更加闊落坐得非常舒服。而且我哋仲遠距離見到燒烤嘅火爐，諗都覺得個Pizza正呀！呢度嘅Pizza選擇好多，除咗一啲傳統小小嘅款式之外，亦都有啲特色味道，真係揀咗好耐先揀到呀！最後決定咗要呢款有星星，即係餐廳推介嘅意大利香草醬海鮮pizza。餡料方面除咗有主角意大利香草醬，仲有蜆肉，提魚，蝦同魷魚。個香草醬真係好香濃，加埋少少檸檬汁除左更加可以將海鮮嘅鮮味帶出，仲令到個香草醬層次再提升。仲有pizza唔可以冇嘅芝士，今次餐廳選用左水牛芝士，而且仲係大量嗰隻，所以每一啖都有強烈嘅拉絲效果，真係好幸福呀！由於我哋兩個女仔都唔係好肚餓，所以要多咗份小食就夠哂數。我哋揀咗份香蒜辣椒白酒煮蜆，蜆肉嘅份量都幾多，而且每隻都大大隻又飽滿，仲完全冇沙！蒜頭白酒加辣椒呢個組合真係無敵，加埋蜆肉嘅鮮味，忍唔住連個汁都飲埋！好正！…Read More

今日同男朋友嚟咗銅鑼灣呢間餐廳食日本嘢，個人覺得呢度既lunch set喺銅鑼灣區來講定價都唔正常，加上非常好嘅環境同埋食物質素都好唔錯，我一定會再encore。呢度所有嘅lunch set都會包前菜，沙律，同埋超級超級好食嘅茶碗蒸。唔係講笑，呢度嘅茶碗蒸非常滑，個味道亦都調校得好好！主食方面，今次嗌左雪舟壽司set，總共有八件壽司，同埋兩件玉子燒。師傅手勢好好，壽司飯唔會太鬆散或者太硬。而且魚生亦都非常新鮮，個人最愛一定係三文魚子同埋海膽，鮮味十足啊！玉子燒亦都值得一讚，甜甜地，又夠厚切。本身以為就咁就完，點知食完壽司之後，侍應突然之間拎上一碗熱辣辣嘅湯烏冬。烏冬好滑，簡單配以昆布同埋豉油清湯已經好好食，成個餐份量啱啱好。原來仲未完！仲有甜品，係好靚嘅水信玄餅！打卡一流之外，口感亦都好特別，加埋黑糖漿，非常圓滿。…Read More

嚟呢度好多人都係為左呢個龍蝦餐，宜家仲有優惠，真係好抵食，今日都決定同朋友試下。套餐包括2碗龍蝦湯，一個火焰龍蝦pizza，一份龍蝦mac & cheese，同2杯餐飲，其實份量預得剛剛好，比兩個女仔食夠哂飽。先講龍蝦湯，濃稠度岩岩好，龍蝦味道好濃郁，鮮味突出之餘又唔會太鹹。重點係入邊仲有龍蝦肉㗎。飲完湯之後Pizza就嚟啦，呢個Pizza唔止食得仲好睇得，店員一上枱之後會的職場為龍蝦點火，造成火焰龍蝦嘅效果，岩哂打卡用。除咗靚之外，燒過嘅龍蝦殼會更加之香，pizza亦會有焦香味道。Pizza係簿批，批底真係值得一讚，夠鬆軟，邊位勁脆，上面除咗有主角龍蝦肉之外，亦都佈滿左芝士，我哋每人食咗半個pizza都覺得唔夠喉！之後就有龍蝦芝士通粉，一向對Mac and cheese嘅感覺都係又濟又漏，從來都未試過食得多。但呢個夠芝士味，又有龍蝦汁，當然重點亦有龍蝦肉係入邊啦，但出奇地完全唔覺得漏！其實真係好飽，得兩個女仔食飯點可以冇甜品呢？我哋就要左呢度嘅signature brownie。我真係夠膽話呢個係我食過最正頭三位嘅brownie! 非常之香濃鬆軟嘅brownie放喺熱煎pan上面，加埋煎香過嘅焦糖香蕉同埋合桃，仲有冰凍嘅雪糕，呢個冰火二重奏真係無敵！真心推介！…Read More

有個唔食牛嘅朋友突然約食燒肉，我第一時間就諗到喜來稀肉，因為佢哋嘅豬絕對唔會比牛差。今次我哋就要左呢個壹頭豬套餐，可愛嘅豬型木碟上面，放咗五款肉，包括脂肪分布平均嘅豬頸肉，必食嘅五花肉，原塊燒到差唔多熟嘅時候再用鉸剪剪開小塊，令佢更加香脆，仲有助燒走啲多餘嘅油脂咖。然後係韓燒必食，煙煙韌韌嘅豬皮，同樣係原塊燒完之後剪成細細條，口感會更加好。燒完既豬腸外脆內軟。最後仲有呢度必食嘅護心肉，就算燒到過晒龍都仲係好淋，豬肉味有夠濃，真係真係必點！哎呀唔記得咗呢個set仲有一大塊梅肉，佢就係好似一塊薄身豬扒咁，食落都好淋咖。所以其實食晒成個餐，加埋前菜，任refill既包肉生菜，仲有泡菜同芝士爐邊蛋，2個人真係好夠食！…Read More

今日約咗個好朋友食飯，特登揀咗呢間專食串燒嘅餐廳，可以慢慢食，又可以食多啲同種類嘅食物。首先有前菜有蘿蔔，青瓜，椰菜，配特製既醬，甜甜地幾開胃。再要左一個涼拌蟹柳芝麻菠菜，爽脆既波菜加一定好味嘅芝麻醬，仲有少少蟹柳點綴，易入口又透心涼。之後就到主角串燒啦，留意番呢度嘅串燒一定要最少叫2串。厚切牛舌牛舌鮮嫩多汁，唔靭無筋仲好juicy。芥末雞肉串芥末味慢慢浸出嚟，個股後勁帶來小小嘅刺激感，上面仲有薯片碎增加調味同口感，配搭嫩滑既嫩滑，真係好好食。雞翼一夜干一夜干嘅意思係指師傳用鹽將雞翼醃過夜，風乾後再燒。本身以為用鹽醃完會好鞋，點知冇之餘竟然仲有肉汁，食落有鹽焗雞嘅感覺。雞皮風乾後收哂水同冇哂脂肪，燒到好香脆，加少少青檸汁更加提鮮。燒虎蝦手掌咁大隻嘅蝦，燒得啱啱好，肉質依然保持彈牙，隻蝦夠鮮甜，唔洗任何調味都好好食。芥末牛肩肉牛肩肉肉質鮮嫩多汁，加少少芥末更能將牛肉味提升。咖喱飯朋友係飯桶，最後要左個咖喱飯。唔係日式個種甜咖喱，而係有少少辣個種，好香好飽肚。…Read More

之前上網見到人介紹灣仔呢間新開嘅扒房，就同無牛不歡嘅男朋友一齊黎。呢度環境唔算好大，但係都有一個小小嘅吧枱，望街景嘅位，甚至一個偽火爐，幾有氣氛。食物方面，呢度只有一個牛扒餐，啱晒啲有選擇困難症嘅朋友。首先會有餐廳自家製嘅麵包，可以配普通牛油或者佢哋特製嘅玉桂味牛油。由於我真係唔太喜歡玉桂味，所以都係要咗普通牛油。個麵包本身超級軟熟，而且烤過之後外層脆脆的，塗上軟滑嘅牛油，再加少少海鹽，前菜麵包來講真係相當出色。然後有一個田園沙律，爽脆嘅羅馬生菜配合麵包脆粒同煙肉碎，仲有一小塊糖心雞蛋。之後就多主角牛扒了，今次要咗medium well，但個肉質仍然唔會鞋唔會靭，牛肉味濃又有肉汁，可以配合洋蔥汁，或者簡單配少少黑椒少少鹽。而且牛肉係比較薄，一個女仔都可以食得晒成塊。唔好唔記得仲有伴菜薯條，呢度嘅薯條係幼身，炸得好脆又唔會油淋淋，仲係任食！男仔都一定夠飽！呢個價錢來講，有呢個質素其實真係非常之抵食！…Read More

男朋友生日為佢安排左一個全牛宴。首先食d菜先，個醬好特別，令唔中意食菜既男朋友都食哂。先黎有呢個韓式火焰牛肉，店員即場用火槍燒韓牛他他，燒過牛肉仲係半生，用左辣醬調味，加洋蔥令口感同味道更提升。然後用紫菜包住，再加青瓜同蛋黃汁，真係好好食！然後有汁煮牛舌筋，食落其實好似牛筋腩咁，係炆到好淋個種，仲好入味，伴菜既紅蘿蔔都好甜。之後有一連串各個牛既部位既串燒，師傅唔會全部都用成一種調味，每一串都有少少唔同味，幫助帶出個個部位本身既味道:包括外脆內軟，牛味好濃既燒牛小腸爽口既燒牛大腸&彈牙燒牛筋牛脷，牛心管，牛舌筋，牛草肚，後3者都係比較少聽，都係我第一次試，無論係味道同口感都好有驚喜。食左咁多肉，我都想食翻少少菜，所以要左豚肉秋葵捲同馬蹄牛肉捲，少少既蔬菜有助減低肉類既油膩感，準備迎接最後既鹹牛肉燒飯團，飯團外面喺滿滿既鹹牛肉，師傅燒到非常非常脆，為我地呢餐作完滿既句號。…Read More

有時想食壽司但係又唔敢食太多魚生，可以選擇過嚟呢度，食佢哋又靚又精緻又好味嘅壽司卷。呢度嘅卷物選擇非常多，今次就揀咗我最愛嘅蜘蛛卷。所謂嘅蜘蛛其實係炸軟殼蟹，配埋青瓜，牛油果同蟹柳，味道清新，仲有不同嘅口感。加埋類似鰻魚醬嘅燒汁，真係次次黎都必點。另外呢一款忘不了您，只係簡單用咗三種材料芒果，炸牛肉，同芝士，香甜既芒果，鹹鹹脆脆嘅炸牛肉，軟綿綿嘅芝士，配合面頭嘅Wasabi同千島醬，成個層次更加提升。呢度除咗卷物之外其實仲有其他日式食物選擇，今次就要咗一款豬頸肉串燒。一串燒得好嘅串燒真係唔簡單，要做到有燒烤嘅香又唔會焦，要識落夠味又唔會太鹹，仲要保持有肉汁唔乾，而呢度嘅師傅正正全部都做到。特別欣賞佢個醃醬，調味真係非常好。下次要約多啲朋友叫多幾款唔同嘅食物！…Read More

上星期同屋企人去左龍華酒店食飯，發現左呢度有一間超適合打卡嘅屋仔。決定今個星期再同佢地嚟。以為呢度係一間Cafe，點知竟然係飲中式湯嘅舖頭，真係估佢唔到！忍唔住要再讚多一次，呢度嘅環境真係好靚好靚。餐廳嘅裏面用咗藍陪雲石枱既簡潔嘅雲石設計，出面望到嘅係翠綠嘅園林景，真係可以影好多相。好啦到翻重點食物方面，呢度主要提供三款食物，包括湯，花茶同埋小食。我哋今次就要左3款湯，2款花茶。店員介紹嘅時候同我哋講因為佢哋都有同龍華酒店合作，所以同龍華一樣，乳鴿湯係佢地主打。我哋首先要咗茨實燉乳鴿，呢個湯簡單用上茨實，花旗參，瘦肉同蜜棗，飲落已經非常清甜。呢個湯有助清熱降火，仲可以排毒養顏添。之後有啱晒女仔飲嘅黑木耳紅蘿蔔燉乳鴿湯，個湯有大大片黑木耳，仲有好多好甜嘅紅蘿蔔，真係好好飲又飽肚，仲有助健脾益胃。最後仲要左花旗參綠豆百合燉乳鴿湯，飲落比想像中冇咁苦，仲好清甜好易入口，有助清熱解毒，岩哂呢排帶口罩帶到生暗倉既我。呢度既湯全部都好足料，仲可以外賣拎翻去唔洗自己煲，仲平過自己買材料呀！除咗湯之外我哋仲要左兩款抗疫花茶，包括”百毒不侵”，姐係決明子金盞花茶，幫助清肝通便，消炎降火，岩哂夏天飲，飲落清新。仲有”風雲色變”金銀花茶，係熟悉既金銀花味道，好容易入口，除咗有助清熱之外仲可以幫手抗菌。以後想搵人傾偈影相都可以選擇約人飲湯啦！…Read More

住左喺沙田好多年，除咗細個嚟過一次之外，好耐都冇嚟過龍華酒店，今次同屋企人嚟一齊食飯，發現呢度除咗好有特色之外，食物質素亦非常好，仲超大份，好抵食！先講個環境，周圍都充滿中國特色，門口嘅大紅燈籠仲好適合打卡。行入少少仲見到有孔雀園，我哋好好彩見到孔雀開屏添呀，好靚！食物方面，黎呢度應該每台都會必點紅燒乳鴿。皮脆肉嫩四個字絕對啱晒嚟形容佢哋，加小小椒鹽同喼汁，一人一隻絕對冇問題。黎到沙田梗係要食馳名嘅雞粥，呢度有一鍋同一碗選擇，我哋只係要咗一碗，但睇吓個碗係講緊咁大！足底好綿滑，師傅落咗啲腐皮食落更香。d雞大大件，雞味仲好濃。之後仲要左碗超足料既海鮮羹，入面有蝦仁，帶子，竹笙，素翅，蟹肉，啖啖滿足。最後要左芝士龍蝦伊面，同樣地份量驚人！有2大隻爆肉既龍蝦，夠哂鮮甜彈牙。個芝士汁唔會太漏太杰，而且好欣賞師傅會用火灸燒表面，有陣陣焦香。咁既價錢，真材實料，真係好抵食！…Read More

今日同個無辣不歡嘅朋友食晚飯，佢帶咗我嚟聽過好多次，但一直唔敢黎嘅麻辣派對。一見到個Menu雖然樣樣嘢食都好似好吸引，但又好似好辣咁，好在朋友話俾我知原來呢度辣到係有得選擇，佢仲好好全部都就我揀BB辣。我哋首先要咗個麻辣雞煲，一上枱見到個份量真係嘩左一聲，非常非常足料，絕對足半隻雞，而且雞肉相當嫩滑入味。同我一樣唔太食得辣嘅朋友，見到成盤都係辣椒同紅油其實唔使驚，佢哋真係只會帶出BB辣，同好香好香，唔會令你噴火。而我亦都好鍾意佢個股後勁嘅麻，好過癮！朋友堅持餐飯一定要有菜同有肉，所以我哋就要左碟新出嘅干扁杭州花菜炒鹹肉。呢個小炒真係冇得輸，椰菜花炒到非常乾身香口，個辣醬配合鹹肉，兩者非常惹味。然後主食方面，我哋每人都要左一碗小麵。個面湯底好濃郁，好香，少少辣，配合一個好滑嘅小麵真係好好食。朋友要咗五香牛腩小麵，牛腩炆到夠晒淋同入味。以我就要左豆花小麵，個豆花食落比一般嘅滑豆腐更加嫩，得2嚿真係唔夠呀！最後會有兩小杯桂花啫喱送比你清一清，當堂refresh哂！下次要挑戰小辣！…Read More