Kclhil的個人專頁

大大話話都食過香港好多間Cafe，呢一間都算性價比幾高。平時早餐或者午餐都會跟咖啡，甚至可以優惠價加購飲品。今晚同朋友夜晚到訪，人流唔算好多，亦都有一段傾偈嘅空間！當晚叫咗一份青醬雞胸沙律，透過慢煮嘅方法，雞胸肉都保持到肉汁完全唔會好乾好柴，更重要嘅係蛋白質充沛！主食方面揀咗香煎虎蝦配蘆筍辣蕃茄意粉、牛油果碎蛋貝果沙律🥗意粉帶少少辣辣地比較開胃，虎蝦都幾大隻，份量足夠一個女生食用。至於bagel包口感比較實淨，亦都好鍾意牛油果同碎蛋嘅配搭，軟綿綿得來又清新！由於夜晚到訪，所以朋友叫咗一杯咖啡，亦都用一個香蕉蛋糕作為今餐嘅甜品。…查看更多

今日同朋友去宋王臺整野，順路決定食個海鮮餐先返屋企～坐低即刻嗌咗個套餐：包括澳洲青年龍蝦🦞罕有藻食緣膏蟹🦀️台灣九孔鮑魚、台灣花尾龍𧄌片🐠加拿大野生大赤蝦🦐韓國斧山珍珠蠔🦪大西洋野生青口、紐西蘭刀貝蚌、黃金翡翠螺、有機蔬菜🥬玉米🌽白菜。食匀後都分享吓：澳洲青年龍蝦，肉質鮮甜，爽口彈牙。緣膏蟹肥美多膏多肉，膏味非常濃郁，蟹肉鮮甜至極。台灣九孔鮑魚，鮮甜，好有口感。魚片嫩滑。刀貝，入口多汁鮮嫩，好有海水的鹹香味。翡翠螺冇沙，有趙口。食到最後送埋椰汁雪燕，雪燕超多，唔係好甜，真係好滿足！過程中店員會好窩心咁同我哋介紹唔同海鮮嘅蒸煮時間，記住要按每種食物性質來調較鬧鐘蒸煮，由清淡食起。成餐飯食物非常有心又高質，新鮮無比，啖啖都又鮮又甜，最啱中意海鮮嘅我地～偶爾想食海鮮真心推薦大家可以黎呢到，保證原汁原味😋…查看更多

好耐冇去過顯徑，估唔到周圍都唔同晒，見到新開咗好多唔同嘅餐廳，今次決定去一間Cafe試吓。入到去都好滿座，格調有啲輕水泥風同木製裝修，俾人一種好舒服嘅感覺。紅蝦龍蝦汁扁意粉好多人推薦，上檯即刻知原因。雖然係小店，但係擺盤用心，媲美高級餐廳。先要讚意粉口感有嚼頭，而味道唔會死鹹，冇過多嘅醬汁但係鮮味四溢，尤其係龍蝦嘅香氣好突出，相信用料應該好足。另外紅蝦大大隻，色澤潔白，肉質爽彈，抵讚。藏紅花意大利飯配蟲草花及軟殼蟹意大利飯同樣煮得剛剛好，有嚼勁但唔會俾人一種煮唔熟嘅感覺。呢款相對濃味少少，有種南瓜味道，而蟲草花份量好多，提升左咬口嘅層次，至於炸軟殼蟹冇過油嘅感覺，亦夠大嚿，不錯。沙律和餐湯沙律份量適中，配料都唔少，包括：煙三文魚、柑橘、蕃茄仔、生菜等，用上沙律醋，輕盈冇負擔，就算減肥中嘅人士都可以食用。而今次嘅餐湯係南瓜湯，食得出真材實料嘅南瓜蓉，配上好夾嘅粟米味，超級濃郁又稠，飲完都飽咗一半。飲品今次飲品揀咗兩杯，分別係抹茶拿鐵同菠蘿熱情果茶。前者完全係乳糖不耐症人士恩物，雖然轉咗做豆奶，但口感保持好濃厚，抹茶味突出，面層泡沫細密，每一啖都係享受，推薦。至於水果茶，味道清新，唔會過甜，善用咗水果原有嘅甜度，果味芳香怡人，大大杯幾抵飲。…查看更多

難得放假，朋友帶我食好嘢，估唔到距離太和火車站相隔五分鐘左右，一間門面低調嘅餐廳，推開竟然係裝潢簡約時尚又有格調嘅法國餐廳。平日對法國菜嘅認知都係好昂貴，望望呢度嘅餐牌，估唔到都幾平民價，今次就叫咗兩個套餐。季節限定法式前菜-蝶豆花木魚清湯.鯛魚刺身展現咗法國菜嘅精髓，賣相精緻，處處都係細節。檸檬汁另上，客人自行倒入盤中，會令蝶豆花顏色從藍變粉，魚味道清新口感滑嫩偏緊實。季節限定法式濃湯-番茄雜菜湯蔬菜配料好足，茄味濃厚，湯身稠密，略顯有點過鹹。最欣賞係配搭個片法包，焗得好脆唔會過乾，牛油蒜蓉味道恰到好處。季節限定法式多士-魚子醬多士黑魚子醬份量好多，另外面頭仲加上魚籽同金箔，味道十分濃郁，喺奢侈嘅享受。配搭多士，正正可以平衡鮮味，仲帶出一份香口感。季節限定法式輕食-鵝肝蛋撻鵝肝多士食得多，今次融合咗係撻入面，成個撻皮都好鬆軟酥脆，蛋漿細滑，每一口都充斥着鵝肝嘅脂肪同香氣，推薦！主菜-A5飛驒和牛上枱成幅畫咁，旁邊好多唔同嘅伴菜襯托主角，例如、蘆筍、紫薯蓉、南瓜蓉、椰菜花蓉等，可以中和到和牛嘅油膩感。至於牛肉，咬落去肉質極其細膩柔軟，肉汁豐富，今次叫咗三成熟有種入口即化嘅感覺。主菜-海膽扁意粉扁意粉咬口適中，每一條都包裹住滿滿嘅忌廉醬汁，夠晒creamy，最欣賞係面頭兩大塊海膽，口感滑爽鮮味十足，自行撈埋可以令菜式鹹度同鮮味都提升。季節限定甜品今次叫咗兩份，朱古力慕斯同海膽雪糕。前者朱古力味濃，餅底更甚，甜而不過膩，口感軟滑，；後者因為見到餐牌獨特嘅造型而被吸引咗，無令人失望，果然有淡淡海膽味道，最正原來係上枱仲有煙霧效果，打卡一流。…查看更多

觀塘海濱行到傍晚有啲餓，比對面馬路一間掛滿燈籠嘅餐廳吸引咗，入到去發現係間日式居酒屋，橙紅燈光下充斥住好香嘅燒物味。壽司拼盤（七件）由廚師精選，每日都會供應唔同嘅時令海鮮，今次就有帶子、三文魚腩、油甘魚、拖羅、魚子、池魚、炙燒左口魚。上枱見到真係冇得輸，刺身每件厚身飽滿、色澤明亮鮮豔、食落十分鮮甜。有啲魚味濃郁紮實、有啲軟滑細膩、有啲油脂感滿，各有出色之處。蟹肉牛油果沙律面頭滿滿嘅蟹肉，用上唔同款式嘅沙律菜墊底，加入牛油果同埋沙律醬，天衣無縫嘅配搭。口味清新怡人，材料簡單但好食，份量仲一啲都唔少。燒豬腩肉串串燒火候拿捏得剛好，肉唔會太乾，但係又有焦香感，豬味濃，亦幾有咬口。重點係面頭嘅調味食得出唔會好單一，唔係死鹹，淡得來幾有層次，提升到肉味。燒蠔面頭嘅醬汁好多好濃郁，夠晒creamy。原本嘅蠔亦相當出色，好大隻，入口爆汁，鮮味十足，相當邪惡又滋味，推薦。呢到嘅燒物果然出色，下次一定會再試多幾款！鰻魚炒飯看似一小盤，但3人食都夠，值得一讚係主角鰻魚份量好足。不論望落去定係實際食，每口都滿佈鰻魚粒嘅足跡。炒飯配料雖簡單，有蘿蔔粒、紫菜、蔥蒜等，但配上有嚼頭嘅米粒，食得好滿足。…查看更多

偶爾嚟到大埔搵食，同食肉獸朋友行過見到呢間西餐廳好似唔錯，決定試吓佢。入到去嘅裝潢好有格調，全場以藍金啡色為主，長身有啲帶有質感嘅牛頭，襯托高樓底同昏暗燈光，氣氛不錯。坐低發現餐牌上大多都係食牛扒，另外仲有個tasting menu只需$688，包前菜、配菜、主菜、甜品，都幾抵食～不過今次唔太餓，決定自己揀兩款main搭啲小食。前菜-脆炸蘑菇仔上檯見到份量都唔少，絕對對得住個價格。名副其實脆炸，食得出新鮮製作，外面薄薄一層超級酥脆，咬開爆汁，菇味濃郁，正！澳洲M9頂級和牛小排一向都鍾意牛小排嗰種油膩感，今次就叫咗五成熟試一試。切開已經見到好juicy，一口咬落去果然油脂感重，分佈幾平均，牛味唔淡幾濃郁香醇，肉質剛好夠細膩嫩滑，友人大愛，推薦！法式寶雲蘇紐西蘭肉眼牛扒外面成日見嘅寶雲蘇羊架呢度竟然配搭落牛扒，果然創新。肉眼扒面頭鋪滿一層麵包糠，中間夾咗芥末醬，焗得好香脆。切開見火候適中，無過時，依舊粉嫩，食落肉質相對厚實有咬口，牛味實在又直接，加上醬汁同原有調味，份外有層次，值得一試。跟餐會有埋配菜薯條，出奇地好味，炸得香口，薯條面頭本身已經灑了黑松露碎粉，加上黑松露醬，好香濃。另外仲叫咗個心太軟甜品，上枱成幅畫咁靚好精緻，主角唔會太甜，朱古力味都幾濃厚，仲有啲士多啤梨醬、梨肉果凍、兩種口味嘅雪糕，清新怡人，為呢餐寫上完美嘅句號。最後推薦叫埋飲品，食牛扒配紅酒真係冇得輸，今次叫杯HouseRed都唔差，酒體適中，唔會太薄，口感圓潤，係呢個環境下絕對係加倍享受。…查看更多

到咗3點3下午茶時間，朋友介紹去食串燒🤣入到去氣氛都幾好，望望餐牌款式超級多，睇到眼花撩亂，最後不論海鮮、肉類、小食都叫咗啲試吓～例如：安格斯牛肉蔥串、水牛城雞翼、黑毛豬腩串等，特別推薦：肉類：蜜汁燒黑豚肉 - 上檯已經切好一份，好厚身，外層燒得焦香，內裏肉質細嫩，油脂分佈平均，唔鞋口仲好juicy。燒Prime牛小排 - 一份好大片，熟度剛好切開依然粉嫩，牛味適中唔會過膩，配搭簡單香蔥鹽作調味，食曬都唔會覺得over，又飽肚。小食：鵝肝 - 外面裹著薄薄一層粉，內裏咬落好軟滑，完全唔騷，大滿足！明太子玉子燒 - 一件四份，味道甜得來唔乾，幾好食但略嫌明太子份量唔夠，只得面頭薄薄一抹，如果係中間夾心包住相信會更正。海鮮：鹹鮮扇貝/廣島蠔無沙、濃郁滿滿蟹膏甲羅燒、皮脆肉嫩無泥味嘅燒鱔。食串燒咁歎，叫埋酒就最夾，今次試咗Royal Hawaiian。基調係Gin，調配上主要係熱帶水果口味，特別係菠蘿味好濃郁，成件事酸酸甜甜啱晒女士飲～…查看更多

成日出街食，偶爾都想搵餐健康啲嘅調劑下。聽朋友介紹有間位於尖沙咀嘅餐廳，特別多superfood同新鮮食材，仲係唔少健身同減肥人士嘅好去處。入到去餐廳環境俾人一種好熱情活潑嘅感覺，就同餐牌上嘅選項一樣清新，成件事好和諧。以自助落單形式，客人可以按個人喜好揀選配料，製作最合心意又營養豐富嘅Poke bowl，今次分別揀咗兩份主食同小食～加州風味一大碗色彩繽紛，上檯已經令人食慾大增：紅色肥美三文魚、橙色新鮮魚子、黃色滿滿蛋絲、青綠色爽脆青瓜，配搭點點黑芝麻，撈埋芝麻醬，口味好融合。自選慢煮雞胸今次就揀咗海帶芽、豆腐、香菇做配料，每一樣嘅份量都好多，食得相當滿足。豆腐先用醬汁調配過，唔清淡仲好滑；海帶牙爽得來有嚼頭，香菇都有淡淡嘅調味帶出香氣；重點主角雞胸，肉質好細嫩，成件事係健康輕盈嘅感覺。小食友人忍唔住見到雜物就想叫兩份，分別揀咗炸薯蝦同芝士條。前者坊間好少見，外面一圈圈薯仔絲包住入面彈牙嘅蝦肉；後者外脆內軟滿滿拉絲感，重點係製作新鮮脆完全唔油膩，值得一試。…查看更多

久不久都想放肆一次，刷餐勁嘅，今次就俾朋友帶嚟咗一間冇限時嘅台式火鍋店—鍋霸吃到飽台式養生鍋🍲能夠稱霸果然名不虛傳，不論環境、菜式選擇、服務，都俾人好滿意嘅體驗。餐廳內部光鮮闊落，全都係沙發凳；侍應上檯收碟都好快手；食物選擇超多，質素亦相當唔錯👍🏻望望餐牌，套餐有三款：$308，$408，$508，主要都係用肉類等級嘅分別，想享受嘅最極致可以去到極上Prime Grade霜降牛小排、西班牙伊比利亞黑毛豬，友人試過都大讚👍🏻今次我地就決定食最抵個set～湯底眼花撩亂，每款都好吸引😍最讚係配料好足，味道唔會太淡。不論養生、藥膳、田園、麻辣全部有齊，配搭上有辣有唔辣，素食都有得揀。今次決定整個鴛鴦鍋，包括：藥膳椰子雞同麻辣蕃茄牛肉。呢個決定真係冇做錯，一鮮一惹味，配搭唔同嘅食材，各有發揮👍🏻所有嘢食都用QR落單，基本上係要咩有咩，海鮮、肉類、特色火鍋料、蔬菜等，包羅萬有💯今次大部分試勻之後，特別有幾款想推薦：嫩滑沙茶牛肉，有點鮮滑牛感、入味滷水大腸同豬耳、好新鮮嘅精選海鮮，特別係沙白超級大隻又無沙、爽彈手工黑松露墨魚滑，松露味都幾突出、綿滑芋泥貢丸等等。另外餐廳亦會為每檯附上一點主打嘅黃金炸魚皮，配搭四款口味嘅shakeshake粉，等客人食得又玩得，可以因應個人喜好調配口味。飲品方面，除咗有自家製嘅樽裝特色飲品（推薦黑糖冬瓜茶），最抵讚係有埋暖櫃，放咗啲黑糖薑母茶同維他奶等，照顧都唔同客人嘅需要。最後餐廳仲會送上人均甜品，呢間無限時任食，質素有唔錯嘅火鍋店性價比真係數一數二❤️🔥…查看更多

今日晏晝經開大圍，去完朋友屋企，見到呢間越南嘢又心思思入去，確係食過返尋味😋平日成日食牛河，今次決定試新菜式，叫咗一碗順化蕃茄蟹肉扎肉湯檬。味道酸甜，蕃茄味都唔淡，仲有浸鮮香嘅蟹肉味。面頭有唔少拆好嘅蟹肉，一啖湯一啖面再加少許蟹肉，清新之選👍🏻朋友就叫咗河內越式三寶飯，份量十足，有炸得香口嘅雞翼、軟嫩惹味嘅豬扒、再加埋地道風味嘅扎肉，最精華係有甜豉油撈飯，算係大滿足之選。另外小食叫咗兩款，包括成日都售罄嘅蝦餅同埋豬扒，兩者都夠大份。上台同樣熱辣辣，新鮮製作脆卜卜，調味得宜，完全冇急凍感覺，絕對係抵食，值得回購之選👍🏻最後飲品一凍一熱，味道唔會過甜，清甜解膩，當埋糖水都仲得，跟餐叫黎講性價比十足。…查看更多

今日比親戚叫咗去大圍飲茶～記得上次係新強記食晏晝真係又平又選擇多，特別係脆皮燒腩仔，食過都念念不忘。今日決定再叫，一樣熱辣辣脆卜卜，腩仔肥瘦適中，好鬼香口😋😋而今日嘅叉燒有少少少燶邊食落更加滋味，肉質軟淋，唔會柴，帶有蜜糖甜蜜味，配飯無得頂👍🏻點心方面一樣保持水準，鹹水角熱辣辣，煙煙韌韌口感一流；豉汁鳳爪有小小辣夠淋身易食惹味；脆皮紅米腸，夠特色，賣相靚紅噹噹；懷舊糯米包，金黃色三大個，係用燒賣皮包住啲臘味糯米飯，香口飽肚；潮州粉棵，外皮煙靱，餡料爽口。二人賣單$300不用，食到仲可以打包咁多，真係性價比十分高😆抵試！…查看更多

牛川日本和牛專門店天氣開始轉涼，同朋友聚會少不免會諗起圍爐燒肉。今次就嚟到銅鑼灣搵好嘢食，見到呢間新開嘅日本餐廳評價唔錯，決定一戰。入到去成個感覺好fushion，果真集日本燒肉同料理放題於一身。呢度嘅食物選擇多到令人眼花撩亂，今日就試咗個尊貴和牛套餐，當中包括來自岩手同熊本嘅和牛，部位選擇多元，性價比一絕。見到和牛拼盤上檯已經好滿意，以層層木架呈現各款肉類，附上牌仔，方便客人以淡到濃、瘦到肥咁享用。每款肉其實都各有特色，私心推薦：口感爽彈嘅牛冧、肉味濃郁嘅千本筋、油花滿滿入口即化嘅牛五花、肉質軟嫩嘅牛肩梅花。再黎仲有海鮮拼盤船，用料豐富，件件大隻厚肉，色澤靚，最重要係全部都日本直送夠新鮮。不論係日本蠔、帆立貝、甲羅燒、虎蝦等等，全部都鮮味十足夠清甜，無得彈！今次亦試咗好多款小食，只要係你諗得到嘅基本都有。少見嘅燒牛肉他他同飛驒牛刺身、令人食得滋味滿足嘅手工燒鳥串、開胃清新嘅和牛沙律、肥美可口嘅魚類刺身、包羅萬有嘅壽司、最大路種類繁多嘅炸物同熟食等等。呢到所有嘅操作簡單方便，落單用QR code，瘋狂叫都唔會唔好意思。飲品亦同樣自助形式，仲有雪糕提供，真係會食到捧住個肚走，大家記住唔好眼闊肚窄，食幾多叫幾多。今餐真係超級大滿足呀！#牛川 #日本和牛 #牛川燒肉 #牛川日本和牛專門店 #高質和牛 #120分鐘任食 #放題 #銅鑼灣美食…查看更多

今日同朋友約咗去大圍飲茶，貪方便決定去最近火車站嘅新強記，估唔到平日中午人流都幾乎爆滿。坐低後即刻點返隻乳鴿$48兩個人share，一上枱就聞到烤香味，水準唔差，皮脆肉帶汁軟滑，點上喼汁更加惹味。荷香糯米雞$28好鬼大件，配料好豐富，有雞肉、冬菇、蝦米、豬肉、鹹蛋黃，味道啱啱好，唔會過鹹，飽肚又好味。蜜汁叉燒腸$28$28有三條抵食，叉燒份量都唔會太單薄，味道不過不失。鮑汁雞腳$48雞腳炆得啱啱好，有些少趙口，配有好多花生，味道正宗，有濃郁嘅鮑汁味，正！金珠鹹水角$25係我朋友每次飲茶必點嘅點心，佢話呢度嘅鹹水角外皮脆同煙靭，食落鹹甜鹹甜，好味道，推薦！另外仲叫咗份薑汁雞包仔$25，估唔到薑味幾夠濃，水準都不錯。古法千層糕$25入口甜絲絲，充滿鹹蛋香味，糕質軟綿，冇點錯！😋坐咗個幾鐘，食咗咁多嘢，只係二百幾蚊，朋友話真係抵食～見今晚晚飯仔女都唔係到，直接嗌多碗梅菜肉餅飯$28帶返去今晚食，平靚正！…查看更多

聽朋友介紹沙田大喜屋質素唔差，好抵食，每位只係$228。今日決定一試😋講起大喜屋其實都係老牌放題日本料理。坐低一掃code菜牌全部出晒嚟，刺身選擇多，先來個刺身大拼盤：三文魚、油甘魚、希靈魚、赤貝、帶子、北寄貝、象拔蚌、赤蝦、甜蝦、冰鎮花海蜇。一上枱賣相好靚，魚類都係厚切，所有刺身很新鮮，而且用冰鎮住，食得出味道鮮甜。今日主力推介佢個金蒜蓉粉絲蒸扇貝，扇貝大隻厚肉，蒜蓉香味十足，粉絲亦索晒扇貝甜味，非常好食。從來冇諗過放題都可以食到滋補花膠燉鮮奶，大家可以作為甜品，花膠有彈性，味道香甜燉奶入口即化。燒物：分別點左羊架同菠蘿都幾好食。菠蘿又甜又多汁，羊架唔羶，唔肥，燒得啱啱好之餘亦食到肉汁，肉質好淋軟。最後更加叫咗一個一品料理暖下胃：鮮甜蟹粥，一鍋而上，粥水清甜，有蟹味。真係食到個肚非常之撐！真係極度推薦給大家，佢嘅分店好多，尖沙咀、銅鑼灣都有架！😍😍…查看更多

上次朋友帶我嚟食呢間＂麻辣風雲＂覺得好好食，今日就再嚟多次，餐單多到眼花撩亂，決定今次就照我上一次食嘅嗌多次🤩🤩酸菜魚一大盤端上枱，份多到誇張，魚肉起得非常乾淨，真係一條骨都無，啖啖肉（自己屋企真係煮唔到）魚肉食出鮮甜，肉質好幼嫩，果然係必點嘅招牌菜式！而充滿氣勢又噴曬煙嘅木船繼續成為鏡頭下嘅亮點，好岩打卡😍😍上面六舊金黃色嘅饅頭，食落非常鬆軟，又帶點脆口，重點係一啲都唔油，點上邪惡嘅煉奶醬（唔夠可以再添加），真係食完有意猶未盡嘅感覺😝朋友睇完餐單之後，對胡椒豬肚雞情有獨鍾，一於滿足佢，叫咗份小辣。胡椒味好濃郁，雞肉斬件得非常完整，豬肚切得細咗少少，但入口好爽口彈牙，調味非常到位。食咗咁多辣嘢，當然要叫返個黑糖脆炸糍粑作為甜品嚟解辣啦！煙靭嘅口感一流，再淋上清甜嘅黑糖醬汁，趁熱食口感最佳！餐廳座位舒適，食物款式好多，既大份又抵食，大家去開旺角，絕對可以上去試吓！…查看更多