飯後(正)人的個人專頁

最近發現了一間新開日本放題！佐敦，白加士街五十九號地下e個鋪位已經轉手過好多次，今次開左間日本料理放題專門店，所以專登約左兩個朋友去試下佢哋d水準。而家做緊新張期$180優惠價！限時食兩小時！最近日本地震產生的海嘯影響了整個日本，核子發電廠爆炸產生的輻射更加影響了很多日本的食物包括了魚生！我食完今次之後唔知幾時再有日本優質好魚生食到囉！這次幫襯，以刺身的選擇都算得多，總共有十九種，有吞拿魚刺身，油甘魚刺身，魚刺身，八爪魚刺身，赤貝刺身，希靈魚刺身，醋青魚刺身，魷魚刺身，北寄貝刺身，翡翠螺刺身，青口刺身，海蝦刺身，馬刀貝刺身，玻璃蝦刺身，賴尿蝦刺身，甘蝦刺身，鰹魚刺身，三文魚刺身，鮑魚片刺身。都算新鮮架！招呼我哋嘅經理好親切有禮貌！我哋食左三文魚軍艦，蟹籽軍艦，吞拿魚軍艦，芝士蟹籽軍艦，油甘魚軍艦，龍蝦沙律軍艦。火灸吞拿魚壽司，火灸海蝦壽司，火灸三文魚壽司，火灸油甘魚壽司，火灸魚壽司，火灸玻璃蝦壽司。軟殼蟹手卷南蠻沙律，溫室番茄沙律蒜片牛柳粒，金菇牛肉卷，牛肉生薑燒，照燒牛扒芝士年糕，豬肉芝士雞翼串燒帆立貝可惜我最喜歡嘅雪糕就完全欠奉啦！希望下次幫襯會有雪糕啦！…查看更多

星期六突然之間，好想去食日本放題，諗番起又平又正嘅和味館，立即打電話約朋友星期日去食。本來想要約有兩個曾經一齊去食過嘅朋友再去幫襯，點知佢哋話差左喎！真係俾佢哋咁樣一講…真係有影響架！不過到最後，都係決定再去多次，因為我相信有誠意做生意嘅人，只會希望令自己的生意越做越好，絕對唔會為了節省成本而令食物質素下降，咁樣只會令自己嘅生意提早關門大吉！早上11:30去到個度，又見到上次好有禮貌又親切嘅馮小姐，我第一句說話就對佢講：你哋舖頭有好多人向你哋[打毒針]喎！究竟點解呢？我見到網上有其他人不斷攻擊你哋，我真係覺得好奇怪？今日我哋三個人首先叫魚生，樣樣都要，好可惜我最鍾意食嘅赤貝冇貨，不過其他刺身都好新鮮，我哋三個人都覺得好滿意！重有侍應都非常有禮貌，值得一讚！今日食左好多野：我特別推薦，東陰功湯，馬拉盞炒通菜，咸魚炒芥蘭，火焰三文魚壽司，牛肉生薑燒，燒金菇牛肉卷，燒原個開邊番茄，青木瓜絲沙律，甜品就係朱古力簿脆，仲有木糠布甸，我最中意飲就係鹹檸檬七喜食左咁多，先係125咋一定再黎食過…查看更多

三個人本來想去葵芳食廣東小炒，可惜！淨係等位都要等一個鐘，所以放棄！轉乘港鐵去荃灣，諗住好耐無幫襯，不如食返餐日本放題啦！連加一 一百九十八蚊！唔知點解，食物水準每況愈下，同以前比較真係好有分別！唉！連以前我鍾意食嘅雪糕都取消埋！好明顯係為左想要賺多D，所以縮皮啦！唉！E種生意手法！只會令客人有去冇留，雖然表面上好似賺多左錢，其實相對地令自己的客源逐漸萎縮！實在非常可悲的！我可以唯一稱讚，只有係侍應的服務態度！食完之後，心裏便第一句就係…其實一百九十八蚊真係可以有好多其他選擇嘅食野姐！以前我試到好食嘅舖頭一定會通知大家架，食完今次之後！如果有人提議再去幫襯，哎吔！我一定會講：重有無其他選擇呀！…查看更多

今日天寒地凍，三個人專登再一次幫襯蛇王娟！之前係附近幫襯過一間紡織工會搞嘅蛇宴，食完之後覺得真係唔夠喉！覺得好似Ｄ蛇玩失蹤咁！同檯有人特別推介之下，第一次真正食到好多蛇肉嘅蛇羹，蛇肉好彈牙裏面仲有有雞肉，木耳絲架！而且我覺得最重要就係E個價錢$55套餐，咁大碗啖啖蛇肉嘅蛇羹，仲有一大碗香噴噴嘅臘味糯米飯添！仲加上一碗胡椒味嘅驅寒蛇湯。食完之後成個人暖暖笠好滿足！真係物超所值！E個套餐嘅份量真係可以食得飽一個正常食量嘅男人架！招呼我哋嘅哥哥仔非常好人，最後重要送我哋每人多一碗蛇湯添！真係賺哂！食完之後覺得需要介紹比喜歡中意食蛇羹嘅真正食家，所以特別推介！雖然地方唔算大，但係絕對唔會趕客，佢哋服務熱情親切，而家好少有咁樣嘅服務態度羅！讚！…查看更多

有個好朋友生日，五個人去搵食，朋友推薦中環擺花街嘅[和味屋]，最重要就係價錢相當吸引經濟又實惠，每位$138而且重要有八折，嘩！星期日喎！咁著數？不過第一時間就係要上開飯網，睇一睇任何其他人試過之後又乜感受啦！睇左其他人的食評之後，個心真係猶疑左一陣，因為有好多批評喎！而且朋友重講，未試過架，一齊去冒險試下咋！有時候去試下新地方都係個唔錯嘅經驗。[起碼你會知道用咁平嘅價錢食一餐放題，究竟係點樣一回事。]相信自己個囗，定係相信其他人寫嘅文字呢？我選擇前者！一進入[味屋]第一個感覺地方相當唔錯喎！坐位夠闊落，環境都算舒適。最準時大多數都係我哋，趁其他人未到，食住等，順手影下相先。第一時間梗係要試下Ｄ魚生啦！相當唔錯喎！雖然擺放得比較隨意~[即係求其放係隻碟到]完全無美感可咁款，但咁樣價錢有咁樣嘅水準！都算得上新鮮喎！閃光燈…閃…閃…閃之後，我又再叫多次魚生黎食，嘩！完全唔同哂喎！又相為証架！哈哈哈哈哈哈哈~讚！繼續向壽司進攻，赤貝唔係咁多放題嘅地方有得食架！佢竟然有喎！正！可惜馬刀貝缺貨！赤貝都好快缺貨！唉！負責的馮小姐相當有禮貌，及其他人的服務都相當不錯！合格！首先要講一下地點，如果不是門口有人派傳單，我諗我可能會比較困難搵到！蒜蓉牛柳粒、越式香茅雞翼、牛油雞翼、越南蔗蝦都比較鹹有待改善！其他我有食過嘅食物都相當唔錯！而且款式非常多，完全係值回票價，重要有賺~哈哈哈哈哈~讚！甜品木糠布甸，芝士蛋糕，雀巢芝麻雪糕，芒果布甸，桂花糕都唔錯喎！最後我哋叫左火鍋，清湯底，肥牛片，正真係可以媲美出去食Ｄ酒樓打邊爐嘅肥牛呀~讚！…查看更多

食鐵板燒，可以講係正呀！一塊大鐵板，一位大廚，企係你面前好似表演雜技咁，用佢熟練手藝將活生生嘅龍蝦，鮑魚通通都變成佳餚嘅過程…咁都拒絕對唔會係一百幾十喇！首先，第一道菜，龍蝦！師傅用刀叉同埋兩個細鏟同龍蝦煎皮拆骨，而之後用醬汁調味醬汁嘅材料，有龍蝦糕，牛油，白酒同埋日本醬油然後快炒保持蝦肉爽脆話明係表演，最後師傅用猛火燒龍蝦外殼，當時龍蝦頭仲係未完全死架！烹調過程簡直令人食指大動，而且重好精彩添！第二味，仍然係喺殼度嘅好大隻嘅鮑魚！用鐵板燒到剛剛好，然後切片再加入白酒，胡椒，醋喺鐵板上面炒熟！第三味，澳洲巨蟹好大隻！D蟹膏都好正，可惜…唔係我至愛…原因(怕麻煩)！haha第四味，神戶牛肉好大塊呀！果然係最受歡迎嘅主角！牛肉要燒得好味，最重要就係材料夠新鮮，調味要清新，所以師傅用在火山岩嘅鹽做調味，咁樣就可以保留牛肉嘅原味！師傅烹調牛肉嘅時候，用牛肉嘅脂肪部分放喺鐵板面，最靚嘅部分放喺中間咁做法就可以避免高溫破壞牛肉嘅組織，牛肉仍然會保持肉汁同柔軟！神戶牛肉做好之後，脂肪部分就會用黎炒飯！最後就係炒菜！…查看更多

今日係為一個主内朋友提早慶祝生日，祝佢常常喜樂！特登再去幫襯荃灣e間浦和，就係貪佢地方大，坐位寬闊，又有電視睇下，而且食物質素都夠水準。最重要係上次食完之後，覺得可以再黎幫襯haha今次4個人食左有以下 haha今次眼前出現嘅刺身船，感覺精美左好多！不過…四個人分量相對黎講…都太精美喇！而且吞拿魚出現嬌艷嘅紅色…第一個感覺…就係太搶眼喇！心知肚明喇！haha…有待改善喇！ 其他刺身都好好！我習慣有話直說架haha鵝肝多士，鵝肝煎到外邊又香又脆，裡便好軟熟，入口即溶，好正呀！海膽壽司，好新鮮呀，入口好鮮甜~正！ 重有食入口感覺到Ｄ飯，軟硬度好適中呀！北海道燒珍寶蠔，焗到金黃色賣相相當唔錯！可惜唔啱口味！面頭沙律醬太多喇！一口都係沙律醬，唔健康又唔好食！唉！燒鯖魚，燒得啱啱好，入口有油香！正！多春魚，燒得好脆，入口好多春，好好食！清酒煮蜆，有Ｄ沙喎！不過，都幾嫩滑！蒜香三文魚骨腩，有油香，夠野味，送酒一流！鹽燒雞軟骨，咬落去唔會太硬，又係送酒一流！非常可惜的和風蝴蝶蝦又係缺貨！未有正式試過！火炙牛肉壽司，有進步空間，因為食火炙過嘅牛肉，最重要係令人食入口要仍然保持有牛肉香肉又要嫩滑，所以選擇用牛嘅邊部分黎做係好重要架！火炙吞拿魚壽司，用火槍燒過，好容易會過老，失去鮮味！比較容易控制嘅火炙壽司，應該係三文魚腩喇，因為三文魚腩脂肪好豐富，用火槍燒非常合適！會入口即溶！正燒玉子壽司，如果喜歡食甜蛋嘅人應該會ok嘅！翠肉瓜七味燒，諗唔到唔差喎，幾好食喎！吉列芝心魚卷，原來即係炸獅子狗中間加芝士，如果中間芝士夠多，應該會更好食！脆辣三文魚卷，入口第一個感覺，幾啱我口味喎，有Ｄ辣，幾開胃！冬菇天婦羅，外邊炸得好脆，入口好香新鮮冬菇味！香蒜一口牛肉粒，選用西冷牛肉切成丁方小粒，入口非常方便，都幾好味架！金菇肥牛卷，勁野味呀，簡直可以送飯食！大蝦天婦羅反卷，隻大蝦先用天婦羅粉炸過，再用壽司飯卷住，最重要就係真快入口，咁樣隻蝦先會仍然保持鬆脆，同壽司飯嘅軟熟，先可以成為強烈對比！(佢哋算係做得到！)Good汁煮茄子，好味喎！茄子煮得剛剛好，唔會太稔，加上木魚碎，幾日本住家feel！左口魚壽司，原來係去酒店食自助餐食過嘅煙左口魚，用黎做壽司都幾得意喎！食到第一時間嘅初次登塲新出品，真係多謝Erie呀！努力！畀心機！同朋友慶祝生日，生日蛋糕更係唔少得喇！買左個半磅嘅藍莓芝士蛋糕，預先安排叫經理Erie收埋先，到時候比個驚喜壽星仔！真係好意外，一間日本放題可以做得咁細心，經理Cavin真係要記一功！突然間頭頂同附近的燈都熄哂，重要有生日音樂播出黎！眼大大嘅豪仔，送個生日蛋糕上檯，真係好悉心安排呀！值得一讚！真係要多謝，話頭醒尾、眼大大嘅豪仔、高挑身材、又有禮貌嘅Eric、親切精靈、善解人意嘅Cavin，殷勤嘅招待！…查看更多

年初四突然之間好想食甜野路過上海街e間麵包店，睇見佢哋D芝士餅價錢好平喎於是一口氣買左五種，$12 意大利芝士餅，$10 芝士餅，$8.5朱古力慕絲餅，$10 木糠布甸，$5.5 芒果布甸真係諗都冇諗過咁平咁好味架真係唔敢相信呀咁嘅價錢食到超水準嘅西餅相當滿意真係值得推薦…查看更多

星期日同朋友去葵芳行下，到處都人山人海，又突然肚餓…haha以前試過求其搵間舖頭入去食Ｄ野，好多次都失望…唉！記得有個朋友青衣返工，特登打電話問佢有乜好介紹先得，佢介紹左一間叫[紅葉小廚]嘅茶餐廳，去搵黎試下先…haha原來，以前曾經經過附近間音響舖幫襯過，不過，從來無比佢[紅葉]吸引過入去幫襯…真係失覺哂！我哋叫左[泰式海南雞套餐]$36同下午茶[吉列魚柳薯條]$22 平喎！佢哋嘅例湯係[西洋菜南北杏煲燒豬骨]一入口就知道，正喎！完全無落味精，係老火湯黎架！而且夠哂火候，我成碗飲哂…good泰國傳統做海南雞飯都係為食客著想，最近要食得方便。香港而家好多地方都嘅海南雞飯，大多數都係泰式無骨海南雞架喇！最啱好似我Ｄ咁嘅又為食又懶嘅人…haha[泰式海南雞]...完全無骨，啖啖肉，重要無雪味，而且入口重有雞味喎！又嫩又滑，好好食！值得推薦！雖然，我完全唔食雞皮，但睇到Ｄ雞皮一Ｄ都唔肥喎…good喎！點雞嘅醬好泰式呀，酸酸地小小辣，真係好好味呀！good佢哋做油飯方法完全好泰國呀，入口啱啱好，飯唔太軟又唔太硬，又唔會太油，但又有淡淡油香味，good普通價錢，食到咁有心、有水準嘅手勢，真係要多謝朋友[勇記]好介紹！haha[吉列魚柳薯條]炸得好金黃呀！魚柳入口外皮好脆口，裏邊Ｄ魚柳又軟又滑，好好食呀，我入口之後，感覺應該係鯰魚柳，總之就係好食啦…haha薯條就炸過左小小時間，不過都可以，起碼夠脆，唔會係預先炸定，ok兩杯熱奶茶都幾滑喎，幾有水準呀！食完第一個感覺，就係好味得黎又平，絕對可以再幫襯…haha…查看更多

今日約左三個朋友一齊試下，又平又大隻嘅越南大頭蝦，佢地有兩個去過越南無幾耐，所以對越南野食重記憶猶新架！希望今次介紹唔會比佢彈喇！haha先黎飲野係[滴漏咖啡]係就係夠香，不過有人話甜左少少！如果可以自己加鍊奶就更加好喇！[青檸梳打+薄荷葉]勁好飲，同越南做法一樣用沙糖架，飲入口好得意架！佢哋都好喜歡！[焗大頭蝦]佢哋話越南個次食嘅大頭蝦無今日食咁大隻，計起條數E餐大頭蝦仲要平過越南。而且焗得好香，$98咋 勁掂[椒鹽軟殼蟹]外脆内軟，又多膏，而且非常惹味，佢哋都讚…正[越式蝦醬炒通菜]，炒得好夠鑊氣，通菜保持適當爽脆，好惹味。[龍脷魚柳]，炸得好好呀，外皮脆魚肉保持柔軟…重有面頭炸得好鬆化嘅洋蔥圈好正呀！[燒大蝦柚子沙律]佢哋讚Ｄ柚子夠清甜，蝦又夠新鮮爽口！[法式牛油雞翼] 第一眼睇見，咦！好野喎！一碟本來四隻而家變成八隻，一條骨一支雞翼，方便入口，睇得出花過心思喎！再加上陣陣蒜香，完全冇雪味，好惹味呀！值得推薦…正！[脆皮蝦卷撈檬]炸得外皮好脆呀！[扎肉蝦餅撈檬]都好好食！我特別介紹佢哋食嘅[檳榔葉燒牛肉]，佢哋都話又稔又多肉汁又好味！下次要再食[生牛肉湯河粉]大家都讚Ｄ湯底好味，金邊粉好爽滑，生牛肉唔肥得哩又稔！ [牛柳粒紅飯]Ｄ牛柳粒好食喎，但係紅飯就普通Ｄ羅，如果可以炒得香Ｄ又或者搶味Ｄ就更正喇！ [鍋仔牛柳粒]好香酒味，牛柳粒又稔又滑…正[香芒黑糯米]嘅芒果可惜未夠熟，酸左Ｄ…唉！整體黎講，佢哋都相當滿意，下次再約去搵好嘢食 haha…查看更多

今日同埋媽媽，萍姐，呀妹去荃灣，我哋都好耐無一齊食晚飯喇。呀媽話好想食日本野，呀妹又話贊成，萍姐話最怕食生野喎，不過，最終都係少數服從多數，連呀媽咁嘅年紀都試過食日本魚生之後中意左，呀妹係中學生梗係中意食日本野喇，今日萍姐就要試下接受新事物喇，haha一於去我先前幫襯開嘅浦和喇，不過我去開灣仔幫襯，E度應該都唔差卦。地方比灣仔大好多喎！據聞荃灣E間之前出現過好多次有人投訴要等好耐都無得食！ 食限時放題又真係幾人性下喎！如果得兩個鐘限時間放題，食唔返夠本絕大部分人都會覺得唔著數喇！我今日幫襯過之後，可以肯定已經改善，之前(放題有限時間)，而家佢哋已經(不設時限)大把時間任食喎，人就唔會因為要計住時間，可以放鬆心情慢慢歎！而且，落order之後上菜都唔算慢喎，今日都算係人多差唔多成間舖滿哂，見到Ｄ待應加水同收碟都算好快手，而且都有禮貌，會問下Ｄ野食啱唔啱食呀之類。我哋都算食左幾多野呀，萍姐同媽媽都話好食，不過，佢哋食完第一輪就話飽…真係嘥哂！之後重要話走人番屋企追電視劇添…唉！之後有兩個加入繼續食…haha刺身好新鮮，食物質素整體算水準以上不過，特別要提出要改善嘅 (燒羊胺) 雖然有羊味，但真係比較要嘥氣力去咬，而且燒得未夠香，到左最後都係要放棄唔食，希望下次再幫襯已經改善。(香芒焗帆立貝) 好似係食沙律醬咁…而且沙律醬完全覆蓋芒果味，食左兩啖已經放棄…真係需要諗下，有無必要咁樣煮法，要改良下喇！佢哋嘅雪糕，我超喜歡，綠茶味、紅豆味、豆腐味、重有朱古力味，我一個人食左八個球，好滿足呀haha地方咁大，坐得都算舒服，下次再約多幾個喜歡食日本放題嘅朋友幫襯先…查看更多

最近去澳門發現一間實而不華，味道可以媲美酒店水準，一間即叫即燒漢堡包店(Bistro Burger)！相信好多人都會去中區市政廳行下，我都唔例外，不過唔想再食D所謂澳門豬扒飽喇！澳門豬扒飽根本水準非常唔劃一，好多都係呃下遊客！我就比較喜歡發掘Ｄ滄海遺珠，今次推薦比Ｄ喜歡食即燒漢堡包嘅同嗜！去手信街，大三巴一定會路經(大堂巷)！係一條唔太起眼嘅巷，要去就要一定要留心，又或者問下當地人喇！記得一定要行入去呀，裏便有一間完全唔起眼嘅(碳燒漢堡包店)！真係咁都俾我發現到 ~ haha 真係要讚下自己利害呀我叫左個特色燒蘑菇漢堡，(Mushroom Burger) …嘩！漢堡包嘅包好軟熟，番茄好新鮮好大片又多汁，蘑菇好新鮮白雪雪架，漢堡牛肉燒完重保存好多肉汁，而且配合剛剛熟嘅洋蔥嘅甜味，真係完全配合得非常好呀！都係$23咋！加$7就可以得到一杯汽水同又粗又肥嘅薯條 (我最喜歡E種薯條，外便炸到脆トト，裏邊唔會炸到乾哂，重要保存適當水份) 正呀！朋友叫左一個旗艦漢堡，(Double Cheese Burger)$28咋佢都話諗唔到會咁好食，如果淨係睇間舖頭咁嘅樣，真係唔會幫襯！好彩，係我比佢哋炒配菜嘅味道吸引咋！如果係就走寶羅！漢堡包店隔籬間舖頭係賣Ｄ串串小食架，好多人都走哂寶喇！無幫襯間漢堡包店！唉！我問佢老闆，原來佢哋開張只不過幾個月咋！麥噹噹、漢堡包皇E d連鎖式經營嘅漢堡包店嘅水準真係完全比哂落去咧！就算酒店級數同佢比，都絕對無得比啦！(如果酒店食就係價錢咋，已經相差至少4倍)喇！極力推薦！…查看更多

今次去澳門嘅第一餐有一位準新娘個妹外國返黎澳門，特別想食嘅一間舖頭(因為外國無得食，所以勁想回味一下！)屬於非常平民化嘅食店如果，唔要求環境，只在乎曾經擁有入口一刻嘅感受，都ok架！我食左牛丸仔米粉...牛丸彈牙，仔細細隻咁羅，不過...竟然咁細隻仔嘅裙邊都要咁用力咬...唉…查看更多

有一個當地的朋友特別推薦E間近住媽閣嘅(PIZZERIA TOSCANA 比薩薄餅店)據聞意大利菜相當有水準，所以決定一試以下菜式完全由當地朋友發辦送一籃麵包都ok三個人叫左，頭盤意大利風乾火腿，風乾嘅鹹香火腿配合哈密瓜本來應該好好架！可惜…哈密瓜唔夠甜，立即感覺大打折扣！入口就好似食有Ｄ甜嘅冬瓜咁…唉！價值$90重有一個，意大利風乾牛肉芝士卷，風乾牛肉嘅味道，可以講完全比裏邊芝士蓋過哂！芝士嘅咸味變成主角，相對風乾牛肉反而就係大配角，簡直就係角色對換…唉！$95再來一個，意大利風乾火腿薄餅，裏邊有蘑菇及剛好份量嘅意大利蒙薩利亞芝士，可惜因為啱啱先食過風乾火腿，所以覺得有Ｄ重複，心諗…乜又係你呀…風乾火腿 haha而且風乾火腿本身已經夠乾身，再放入焗爐一焗，入口感覺會就變得更加乾…唉！有Ｄ似食高纖維咁羅！如果只係叫簡單嘅番茄，蘑菇，芝士，薄餅相信會更加好！有時候食薄餅，越簡單就係越考廚師功夫，因為用邊種芝士焗出黎夠唔夠香味、咸味、濕度，其實都相當重要，重有薄餅底夠唔夠脆之類。$95再叫左個燜羊脾，因為一定係預先準備，所以ok喎！夠稔有羊味，香草醬汁都唔錯。$85 最後一個，四式芝士意大利粉，四種芝士混合之後嘅味道相當吸引，再加上意大利粉剛剛夠身，唔太硬又唔過稔，真係唔錯，可惜…份量得少少，一人得兩啖！$90一支水$25一支可樂$15埋單$537…查看更多

今日又要去中環做野，順便再試之前話要食又冇食嘅越南咖喱牛腩先得！haha好多時候就係咁，本來諗住食一樣，到最後就係食下多D食下又多D…haha先黎一杯[青檸梳打+薄荷葉] 我最喜歡飲，感覺好清新[越南咖喱牛腩] + [法包] 對我黎講咖喱汁鹹左Ｄ，入口後有淡淡嘅香草味，咖哩汁好滑，牛腩相當容易咬開，夠哂稔，但係又唔會散開，總之入口剛剛好，正！法包，上檯仍然係保持溫熱，就算係涼左，仍然外脆内軟，用黎點咖喱汁，每啖入口都好有滿足感！而且咖喱汁分量足夠，正！[蒜蓉包] 外皮香脆，內心鬆軟呢度既蒜茸包，好脆口好重蒜茸味！就咁淨係食都相都滿足呀！拒絕值得推薦…haha特別推薦[拉椰葉燒牛肉] 睇外表真係好似[香葉燒雞]，當我未打開D葉就已經傳黎陣陣香味，好大舊超稔又多汁嘅牛肉，食入口就知道應該係用果汁醃製過，送飯一流，就算淨食都絕對唔會覺得膩！正再叫一個甜品先…haha[香芒黑糯米] 賣相唔錯喎！如果喜歡食黑糯米嘅人一定會喜歡，一啖食落去D黑糯米稔得黎又有咬口，再加上椰漿入口又香又滑…正！芒果真係要夠熟先夠甜架，所以真係要[合時]先得！最後，佢哋嘅 [蘿蔔絲] 真係唔好忽略呀，酸酸地又爽口，食左立即開胃架！正…查看更多