carblue的個人專頁

連續幾日假期梗係要約朋友食飯傾偈, 佢帶我黎呢間新開既日本餐廳, 主打日式料理, 串燒等, 仲有清酒, 生啤, 可以慢慢飲, 邊食邊傾.先要個五點刺身開下胃, 廚師介紹當晚新鮮刺身有呑拿魚, 帶子, 黑立, 金線鯛, 春子鯛. 呑拿魚夠肥美, 魚脂豐富, 帶子好鮮甜彈牙.黑立魚上面加左少少麵豉,咸咸地可以提鮮,肉質彈牙.金線鯛,春子鯛好似未食過,肉質比較爽口,魚味濃郁.食完鮮味既刺身之後,就可以開始食肉類, 呢個煙燻原條牛脷,會上枱果刻先拎起個煙燻罩,所以一開果下真係好濃郁既煙燻味. 牛脷外面燒到微焦,但入面保持住軟嫩同肉汁,如果覺得唔夠味,仲可以點黑海鹽或者芥末醬提味, 呢款係好啱送酒既料理.黎到食串燒, 先要雞肝,表面燒得微焦帶甜甜地,肝唔會燒到乾晒,好嫩好滑,鍾意食肝類既人一定鍾意.燒日本豆腐,外表燒到好似臭豆腐果d 咁香口,但當然係唔臭既, 日本既豆腐好夠豆味,又夠嫩.仲有燒雞翼同燒雞皮, 雞皮燒到好脆好,所以一d 肥膩感都無,送酒一流.…查看更多

而家通左關隨時可以去日本, 但每個星期總係好想食日本野止下條癮.朋友最近睇社交平台見到呢間太子居酒屋好有日本feel, 所以今日黎試下.睇下餐牌, 款式種類好多, 豬牛雞海鮮, 仲有蔬菜, 每個款式都有十幾款.先試下最出名既免治雞肉棒配日本生蛋, 免治雞肉肉質夠嫩, 燒完加D醬汁, 再點埋日本生蛋食, 味道即時更加提升.煙燻五花腩, 燒至金黃色, 外皮帶香口, 肉入面既肉汁仲保留到, 食完D肉汁仲留響口腔.鹽燒雞肉串, 鹽燒唔會好咸, 味道剛剛好, 雞肉嫩滑.雞心唔會燒到過熟, 口感保持軟腍, 無腥味.黑毛豚肉五花腩, 五花腩油脂豐富但唔油膩, 上面加埋少少柚子醬, 感覺清新.另外呢度仲有好多唔同款式既酒, 最正係有細細支既SAKE, 2個人一路食一路飲, 感覺好似去左日本既居酒屋咁.…查看更多

呢輪日日係咁落雨, 又熱又焗, 搞到個人都無晒胃口, 所以諗到食泰國野刺激一下. 又唔想去到九龍城咁遠, 所以去左葵芳呢間平民小店.要開胃梗係食返個柚子沙律啦, 舊舊柚子肉都好大粒, 酸酸甜甜好醒胃, 一D苦澀味都無, 仲有其餘既木瓜絲, 洋蔥絲, 食完個口都清新D.主食要左冬蔭公明爐烏頭, 份量十足, 2個人食剛剛好. 先飲佢地既冬蔭公, 唔算太酸, 好易入口, 而且配菜都好多, 所以帶一點點蔬菜既甜味. 烏頭魚肉質結實, 油脂豐富, 食落甘香, 完全無泥味.仲叫左個菠蘿海鮮炒飯, 雖然唔係原個菠蘿上, 無左儀式感, 但係份量一樣十足.粒粒飯都炒得好分明, 唔會黏住一舊舊, D蝦又大大隻, 好爽口. 仲加埋豬肉鬆鋪面, 個炒飯真係好正.…查看更多

一年四季都鍾意食火鍋, 唔同湯底一年四季都可以配搭. 黎個藥膳醉雞煲, 可以補一補血氣, 等身體血液循環D.雖然係藥膳, 但唔算好中藥味味道, 易入口夠清甜. 雞件肉質滑溜唔鞋口.極上肥牛都係唔少得, 肥牛脂肪分怖平均, 肉質入口軟嫩, 肉味濃郁.鯇魚片好新鮮, 似係即劏即上碟, 所以肉質特別嫩滑, 而且起好晒骨無腥味.牛柏頁淥一淥唔好過熟, 特別爽口彈牙.仲有雲吞韭菜餃, 每粒都包得好大粒, 皮夠薄, 夠足料.…查看更多

疫情開始穩定, 又係時候約朋友出黎食下飯, 傾下偈.朋友響銅鑼灣返工, 好多餐廳佢都幫趁過, 呢晚佢就帶我黎呢間日式小店. 朋友黎過所以好醒目地一早訂位, 坐店內無問題, 環境好舒服, 好啱知己一聚.呢度既菜式以西日式為主, 款式總類選擇多.朋友話呢度既串燒好出色, 選擇困難既我所以直接要左雞串燒Set, 一共4款包括有免治雞肉棒, 雞軟骨, 雞腎, 雞翼.等左一陣好快就上菜, 雖然快但D串燒係熱辣辣, 香味即時撲鼻, 令人食指大動.免治雞肉棒入口夠軟腍, 肉質好嫩, 沒有一丁點肉鞋既感覺.雞軟骨串既骨一D都唔硬, 好易入口, 做到真正既”軟骨”, 食材一流.雞腎串燒得剛剛好, 唔會太乾, 唔韌有口感.雞翼外皮燒得好香脆而入面肉質保持嫩滑, 雞翼控一定唔可以放過.值得一讚係店員介紹佢地既串燒用左日本師傅秘制醬汁黎燒, 唔係坊間現成買既醬料, 所以味道甜甜地又夠濃, 好惹味, 令每條串燒既味道提升.另外我地仲要左個蟹膏甲羅燒日本燴飯, 賣相好靚, 最啱打卡.先試下個蟹膏, 好鮮甜, 一D都唔腥, 上面加D蟹肉同蟹籽, 就咁食已經好好味.而個飯粒粒分明唔會燴得太腍, 太濕, 旁邊仲有D蝦仔乾, 撈埋一齊食更有咬口.飯後仲加左杯Mocha做結尾, 咖啡味香唔會太甜.…查看更多

之前響社交網睇到大鴻輝有間新開既牛大人, 趁而家少人出街食飯, 一於試下.放工六點左右到, 入口先量體溫, 同埋有酒精搓手液搓手, 夠衛生.環境大, 雖然餐廳已經有一半人, 但唔會坐得好近, 而且地方乾淨.有九款台灣湯底選擇, 揀左紅燒牛骨鍋, 夠晒大鍋, 好足料. 祗於吃到飽套餐有三款, 包括既肉質同款式相應不同,最後要左澳洲極上和牛餐, 每位仲贈送澳洲M9和牛牛丸2粒.用手機QR CODE下單, 好快已經有食物上枱.和牛牛肩卷, 安格斯牛板鍵, 上腹牛五花, 一口氣叫左幾款唔同既牛.牛肩卷大片夠口感, 彈牙夠嫩, 有肉鮮味.牛板鍵脂肪較多, 但又唔算太油膩, 口感彈牙.上腹牛五花類似肥牛, 較薄, 所以食左好多片都唔算太飽濟.贈送既M9和牛牛丸, 非常彈牙, 牛味濃郁, 好味.仲有呢度牛滑同墨魚滑, 兩款都好彈牙, 墨魚滑入面有一粒粒墨魚, 好鮮味.牛筋爽薄薄地, 好快熟, 食落唔油好爽口.仲有出面自助配料區, 蔬菜, 菇類, 丸類樣樣都有, 而且好衛生有盒蓋著.除左普通既汽水, 紙包飲品, 呢度仲有自泡烏龍茶, 拎左白桃烏龍, 好香白桃味, 但唔會太甜, 夠解喝.最後每人仲有一盒雪糕, 有三個口味選擇.…查看更多

睇完戲見餓餓地, 響附近搵D野食下, 呢間日本野新開, 平時行過都想試.一入黎已經好有日本居酒屋風味, 感覺好輕鬆舒服, 啱晒傾偈.清酒煮蜆, 蜆肉好鮮甜, 隻隻都開晒口夠新鮮, 肉質唔韌夠彈牙. 而個清酒味聞落好香酒味, 但入口又唔算好濃烈.試埋呢度既串燒, 有燒雞皮夠脆口, 曬D椒鹽已經夠晒味.雞腎爽口唔韌, 牛腸乾淨有嚼頭, 脆卜卜好香口.燒牛舌夠厚身肥美, 肉質唔韌, 牛味濃郁.吉烈豬扒份量十足, 個皮炸得夠金黃又夠脆, 食落唔油膩好香口. 豬扒肉質軟腍, 脂肪唔多但又唔會好乾.呢度比同位置既鋪開得較夜, 所以食耐少少都唔驚.…查看更多

最近旺角都開左D新商場, 趁放假就出黎行下買下野, 行到差唔多晚餐時間, TOP呢度其實都有唔同食肆, 不過我就比呢間任食打邊爐吸引住.價格其分5種, 主要就係牛既品質同埋有無海鮮加配, 同行友人唔好海鮮類, 所以我地要特上牛肉SET.呢度原來係一人一爐, 一爐之中仲可以揀2款唔同湯底, 2個人已經可以揀4款, 超讚.我揀左壽喜燒+豬骨醬油味, 壽喜燒湯底我都食過好多間, 呢度個湯底夠濃, 開首無點醬就咁淥都食到甜豉油既清甜味, 唔會越食越咸. 而豬骨醬油都好香既豬骨味, 唔算太肥膩, 清清地.呢個SET包左兩款牛肉, 係特上同上等, 兩款牛肉既脂肪唔算好多, 入口有油脂但又唔會太肥膩, 肉質又夠嫩.SET仲包豬腩片, 薄身一D, 不過又快熟D, 食落肉質都好軟嫩, 一D都唔韌唔乾. 呢3款肉類都係可以不停order添加.至於其他配料就自行響出面拎, 正常既丸類, 菇類, 蔬菜, 樣樣都新鮮乾淨.另外呢度仲做緊手工甜品放題, 以綠茶類為主, 又係可以任叫, 我要個特製巴菲. 個賣相唔錯, 祗係D雪糕快溶左少少, 綠茶味幾香, 唔會濃到澀, 雪糕好滑. 巴菲里仲有啫哩同丸子, 成杯都唔會好甜.…查看更多

荃新天地開左間好出名既拉麵店, 假日行過都見佢大排長龍, 今晚放工一於去朝聖下先. 地方好闊落, 好光猛, 有卡位坐得舒適.要左招牌既濃豬骨拉麵, 正常蔥份量, 有4片义燒.先試一口湯, 好濃既豬骨味, 唔油, 飲完個口有D膠膠地, 真材實料.拉麵要左普通硬度, 食落真係好爽口, 可以食丁索索聲. 麵既粗度屬於粗與幼之間, 食晒都唔會感覺好濟. D义燒夠腍, 唔會太肥, 浸下D熱湯再食唔錯.追加溏心蛋同粟米, 溏心蛋都夠溏心, 好味.仲要多款小食, 炸軟殼蟹, 真係原隻擺上碟, 好精美..炸得夠脆口, 粉唔算太厚, 亦唔會太油膩, 中間蟹肉部份夠厚實, 唔會剩係得塊皮.每個人一坐底仲有前菜三款, 三款都唔差, 一下子已經清碟.…查看更多

平時最鍾意搵D任食任飲既食肆, 一個價錢可以鍾意食幾多都得.黎開旺角買野, 醒起呢度有任食韓燒, 價錢唔貴, 坐得又舒服.生熟食物自助任拎, 餓得濟先拎左熟食, 除左壽司, 魚生, 前菜果D, 仲有炒蜆, 煎餅, 炸雞翼果D.諗住熟食無咩期望, 出奇地唔錯, 炒蜆果D夠晒味, 又夠熱.至於生肉種類都好多, 牛肉, 豬肉, 雞肉都有.肥牛片脂肪比較多, 但入口唔算太油, 仲好軟嫩. 牛仔骨燒左一輪都唔會韌, 燒到離晒骨, 好易食.五花腩片燒到金黃, 脆卜卜, 都唔錯, 唔會太乾.仲有雞腎唔會太厚, 燒完好爽口易食.食食下先知原來無時限, 不過實在太飽, 下次會再黎.…查看更多

聽朋友提過大角咀有間燒肉好好味, 今晚黎開呢頭就醒起去試下.呢度主要用燒熱左既石板黎燒肉, 而唔係開個火爐比你燒, 石板簡易得黎無咁易燒過火.先揀左主食既肉, 加30蚊就可以變定食餐.要左美國頂級牛小排同和牛牛板腱肉, 兩款肉雪花紋里分明, 厚薄適中.細細片放上石板燒至外表微焦, 一啖入口, 入面仍保持軟腍, 肉質彈牙. 脂肪一面煎一面迫出油份, 但食落又唔覺太油, 仲好香口惹味, 肉味濃香.兩款肉都鍾意, 食極唔覺漏.另外再要多款豬梅肉, 雖然係豬, 燒既時間需要耐少少, 但燒完仍保持到軟嫩, 唔會好乾好韌, 感覺不錯.餐既櫻花蝦麵豉湯都幾得意, 櫻花蝦有咬口, 唔腥, 幾好味, 唔會剩係得昆布既麵豉湯.結尾仲有雲尼拿雪糕配綠茶粉, 夠精緻有日本feel.…查看更多

放工出旺角買野, 諗下晚餐食咩好, 突然醒起鼎爺個仔響白布街開左間新日式燒肉, 一於黎試下先.呢度最特別係立食, 將日本既食肆文化搬黎香港.肉類係每片點選, 可以試多唔同款式, 日本食過都係咁樣叫法.先要左牛胸腹肉既前後上下位置, 呢個部位既脂肪比例較多, 每個都有D唔同, 雪花牛食落油脂豐富, 但唔油膩, 燒起上黎夠晒香, 肉質嫩滑, 肉味濃郁.另外再要左其他部位, 後腿肌, 肩胛呢D位無咁多脂肪, 所以較有咬口, 肉味都好濃. 三角肋肉同前胸部入口夠滑溜,唔肥膩.牛舌同牛胸爽唔會太厚, 食落好爽口, 唔韌. 牛舌既牛味好濃.剩係食果幾片肉又點會夠飽, 所以仲左5片既和牛胸腹肉定食, 定食除左有5片胸腹肉之外, 仲有前菜, 麵豉湯同飯.定食既牛胸腹肉幾厚身, 口感豐富, 一樣脂肪分怖平均, 入口嫩滑.仲有好多牛既部份都未試, 下次會再黎食.…查看更多

日本人亞頭搬左黎荃灣住, 聽佢介紹荃灣有間丼飯好味, 原來係呢間大丼屋, 連日本人都話好當然我都要黎食下.除左主打刺身丼飯, 仲有熟食既牛肉飯, 天婦羅飯等等, 就算唔食生野既人都OK.睇左一輪都係要個刺身丼, 呢款係北海渡海鮮丼定食, 刺身有海膽, 帶子, 甜蝦, 油甘魚, 三文魚同蟹籽等, 每樣都好豐富.先講重點海膽, 夠鮮甜滑溜, 一D都唔腥, 就咁食已經食晒, 齒頻留香.帶子同甜蝦好彈牙, 新鮮. 油甘魚魚脂豐富, 唔會硬實實咁. 整體既刺身都好新鮮.個定食仲有沙律同麵豉湯, 一人分都好夠飽.仲有要左小食既雞骨腸, 剛剛炸起所以熱辣辣夠脆口,以為有雞骨會好硬, 但好軟腍, 真係似食緊雞肉腸, 而且唔會太咸, 呢個好好味, 好香口.蟹籽沙律都係小食, 份量都算OK, 唔會雪到太凍, 好開胃.…查看更多

呢排日日落雨, 放左工都係響商場搵飯食算, 費時四圍行.呢間同仁開左一排都未食過, 晚市原來有打邊爐或小菜, 夏天打邊爐簡直係享受, 所以決定打邊爐.侍應姐姐推介呢度既招牌湯底椰子雞鍋, 見半份雞同其他鍋底都係差幾十蚊, 有半份雞食好似抵D, 所以就叫黎試下.個湯底有D椰子肉, 好清, 要先煲滾, 熄火先再放雞件浸熟佢, 所以時間上係較一般湯底耐少少, 不過傾住偈等又唔算太耐, 全程有侍應姐姐幫手整, 所以唔洗煩.雞肉都幾多, 食落啖啖肉, 好滑溜, 因為個湯夠清, 所以唔會搶左雞既鮮味. 侍應話最合適係先食晒D雞之後先開火再打邊爐, 不過我地太餓, 所以食左一半已急不及待開火.先淥安格斯肥牛, 紋里分明, 唔會太薄, 淥一陣剛剛熟就食得, 牛味非常濃郁, 好軟滑, 一D都唔韌, 呢碟細份都係128蚊好抵食.仲要埋豬豚肉, 薄薄地好快熟, 入口都好嫩滑, 淥得耐左都唔鞋, 整體豬牛雞都好好味.鮮炸響鈴每次打邊爐都要, 呢度炸得夠鬆, 過一過湯, 半脆半林, 索晒D湯都好正.野菌拼盤有4款菇菌, 款款我都好鍾意, 最正係長條型果款, 唔係度度有得叫, 菇菌夠乾淨, 份量唔會太少.到7點幾會有人唱歌, 主要係90年代既金曲, 感覺唔錯, 下次再黎食小菜.…查看更多

約左舊同事出黎聚下, 揀左呢間尖沙咀日式放題, 呢間長期爆, 所以預早訂定位. 差唔多夠鐘樓下已經排滿晒等入坐既食客, 要食好野當然要放點時間.經過一輪安頓好後開始點野食, 最吸睛既仍然係刺身, 呢度有十款. 黎到既刺身唔會切到好薄好細片, 款款厚度適中, 食落特別有口感, 新鮮有光澤. 海蝦, 赤貝, 北寄貝好爽口, 海鮮好濃蝦味, 帶子, 吞拿魚, 油甘魚軟嫩肥美.牛仔粒加埋青紅椒洋蔥炒好惹味, 牛仔粒唔會太韌.另一款牛仲有薄切牛, 類似肥牛既口感, 肥瘦平均, 入口夠軟嫩, 肉味濃香.焗帆立貝, 沙律醬一齊焗完酸酸甜甜夠開胃,帆立貝夠彈牙, 唔韌.即燒串燒, 翠玉瓜同菠蘿外表燒到微微燶,但水份仍保持到響入面, 所以一咬D汁響晒口腔里面, 好juicy.驚唔夠仲可以響自助bar拎前菜或沙律, 前菜都有好幾種, 仲有炸魷魚鬚, 小丸子, 樣樣都好新鮮, 唔會覺得擺左好耐咁.出面仲有海膽手卷排隊拎, 好多人排隊, 不過實在太飽食唔落.…查看更多