katielpy的個人專頁

幾年冇寫過食評，冇諗過會因為太唔滿意一間餐廳而寫返。一行六人，book 左位，所以唔洗等。入左去有幾多board games同Switch，個人都唔多人所以可以玩。晚餐有set，不過唔太吸引所以我地都係散嗌。嗌左３個南瓜奶油醬帶子意粉，點知佢話冇南瓜醬，所以變左白酒汁忌廉蟹肉意粉。３個朋友嘅comments: 好乾好乾好乾。我嗌左個櫻花蝦炭燒雞肉沙律，諗住一定安全，點知... 菜係新鮮，不過我唔知個啲係乜雞囉，麥樂雞？我地叫侍應過來，問有冇攪錯，佢話冇，真係雞。食落都唔係雞，唔知咩肉。個汁可能係照燒汁，好多，鹹到飛起，食到我完全食唔落，加左去個乾到喊意粉俾佢地撈埋食。人生暫時食過咁多沙律，呢個可以話係最難食。環境方面，油煙好大，我對眼成晚都好唔舒服。走左之後全身由頭髮到腳趾都係油煙味，洗幾次都仲有。呢個地方真係好差，我明白Cafe質素比餐廳低可能可以理解，不過呢間野俾錢我都唔會再去。…查看更多

係赤柱想食平啲？呢間應該係最好嘅選擇，而且又唔洗食麥記咁頹。中午十一點去到，大把位坐。侍應係外國人，見佢同前面個客講英文，本身諗住用英文落order，但跟住佢同我講中文，咁好啦，講中文可以睇左啲PIZZA嘅真面目先落ORDER，佢地真係好大好大一塊架！嗌左一塊4 cheese pizza，一個Grilled Caesar salad同一杯奶茶。Grilled Caesar salad ($65)，salad dressing任揀，我揀左黑醋汁。份量唔算好大，不過都夠食，上面有好多芝士，雞肉份量都唔少，不過撕到好幼好碎，所以都幾乾，不過夾埋菜食又OK。麵包粒好香，可以點黑醋汁上面嘅olive oil。舖頭寫明羅馬生菜全部係美國嘅，應該都有品質保證。奶茶 ($10) 真係唔掂，冇奶味冇茶味得個甜字，其實真係唔推薦呢到嘅飲品，因為佢應該都係用粉沖就算，不如出去出面買野飲好過。4 Cheese Pizza ($40)：$40嘅PIZZA已經係最貴。佢會即刻夾一塊擺入大焗爐到焗，出到黎真係熱辣辣！我食到淥親個咀添！上面有好多好多好多芝士，超好食呀！PIZZA邊熱辣辣時好好食，唔會硬，而個PIZZA係薄款，好脆好好食！十萬個推介！下次會再試PAISANO'S 其他分店其他PIZZA！…查看更多

第一次去呢間PRET，開頭擔心冇位坐，因為見到得兩三張檯仔，但原來有上層，仲有好多位添。上層環境幾靚，佈置簡約，座位好闊落，唔會坐到好逼。LUNCH繁忙時間都唔會好爆。買左個HEALTHY SKIPJACK TUNA SALAD ($50)，低卡健康之選！因為日日新鮮日日清，所以PRET嘅沙律永遠都好新鮮，唔會有任何一片菜葉發黃，青瓜好爽脆，車厘茄好多汁，雞蛋有少少黑椒調味，不過我自己就好鍾意黑椒所以另外再加左少少。吞拿魚份量都幾多。我自己就好鍾意呢個沙律，所以幾乎次次去PRET都一定係食呢個。…查看更多

一路都有買開太子個間，第一次黎寶琳呢間，舖頭細好多，麵包款式都好似少啲，而且一多人就好難行，不過好多麵包都有得試食，仲要好大一舊，我都試舊細啲嘅都搵唔到　好多麵包味道都唔錯，我買左一款冇得試食嘅，就普普通通。三角芝士($20)：呢個應該係最平嘅麵包，其他麵包都係二十幾至四五十蚊。呢個麵包中間有一層芝士，不過比起佢其他麵包就唔算好足料，而且麵包幾硬，我覺得鬆軟啲會好啲。不過佢其他麵包真係好食，雖然貴但間唔中買下都唔錯，所以下次都會再去買，不過應該會去返太子個間。…查看更多

宜家係自助形式，要食咩自己攞，食完後擺返好個托盤，呢啲規則都應該要清楚。星期日中午12:30到，唔算勁多人，幾好彩企左一分鐘就有位，去買野食條人龍都唔算長，而且職員都好快手。瑞典肉丸10粒加意粉($19)：我冇點食因為我一向都唔特別鍾意食肉丸，覺得太heavy，不過意粉幾好食，生熟程度幾好，幾彈牙，叫左佢多汁，所以唔會乾。香烤燒羊架配薯蓉($53)：一碟有四五舊，幾抵，不過我覺得今次嘅熟左少少，之前見人地食評話粉紅色有血水，我今次就冇粉紅色，不過食落都唔會老，羊膻味都幾重，唔鍾意嘅人應該食唔到，不過我自己就覺得食羊一定要食佢個膻味。薯蓉正正常常，都有兩大球。粟米($3)：唔係甜粟，不過$3咋，幾抵食呀。蘑菇吞拿魚蛋批($9)：唔知點解我好鍾意佢呢個批，熱熱地，中間有好多吞拿魚，不過我覺得啲吞拿魚太爛，如果有少少吞拿魚絲會更好。個批底都幾脆，抵食好味！芝士波($10)：我冇食過，不過朋友話入面幾多芝士，而且配個個汁好惹味。炒雜菌($7)：正常一碟菇，我覺得淡左少少，如果鹹返少少，同落多少少黑胡椒就完美喇。凍蝦盤($26)：我好鍾意呢個，好清新，都幾多隻蝦，而且點個個茄汁酸酸甜甜好好味，而且好健康，減肥人士都啱食！茶($7)：如果要茶俾錢時佢就會俾你一個茶包，普普通通一杯茶自己去加熱水。總括黎講，野食質素唔差，有啲真係幾好食。點講好呢，宜家嘅野食唔係完美，但又真係有種你無法抗拒之後一定會回頭再食嘅魔力囉。…查看更多

平時成日食呢間嘅煙三文魚田園沙律，唔錯嘅！今日就想試下新野，所以就揀左雜菇田園沙律（$28）。一盒有唔同蔬菜，包括青瓜，普通沙律菜，番茄，車厘茄，紅菜頭。上面就有兩種菇，分別係秀珍菇同埋雞脾菇，再加左香草。蔬果全部都好新鮮，附送嘅油醋汁好香，我好鍾意！不過菇嘅份量比較少，同埋冇乜味道，雖然加左香草。紅菜頭好多汁好甜好好味！總括黎講，我覺得呢個價錢係一間學校黎講係有少少貴，不過如果比起普通賣沙律嘅餐廳就梗係算平啦！而且質素都唔錯嘅，不過一個人食又未必夠飽喎。…查看更多

因為媽媽生日，見到呢間餐廳咁多好評，所以就揀左呢間，諗住同佢食好啲。餐廳環境唔錯，十二點三左右去到，餐廳冇乜人，而我係訂位時就同店員講明想安排卡位，坐到好舒服，所以擺設都幾靚。牆上面晝左畫，雖然冇乜泰國氣氛，不過都幾靚。香芒軟殼蟹米紙卷（$68）一共有8卷，每一卷都包得好實，入面有生菜，米粉同埋軟殼蟹。有兩隻汁可以點。軟殼蟹好香，好好食，加埋生菜同米粉清清地，正好中和返軟殼蟹，所以食落去覺得恰到好處。泰式辣豬肉生菜包（$62），有分大辣小辣同走辣，我叫左小辣因為屋企人唔係好食得辣，我自己就覺得一啲都唔辣。啲豬肉夾雜住少少肥肉，不過主要要係瘦嘅，我覺得肥瘦適中，加左辣椒同埋香茅等香料，用生菜包埋，正正常常一個生菜包。生菜好新鮮大大片，豬肉碎份量都OK。泰式鮮蝦金邊粉（$72），成碟好似得兩隻蝦，而且一碟份量唔算多，不過味道唔錯，甜甜地，唔算好油膩，而且少少濕濕地，因為我唔鍾意食太乾嘅炒粉，所以我覺得呢個唔錯。但份量多返少少會更好。椰青海鮮焗飯（$82）需時25分鐘，因為佢地係即刻開椰青即刻焗，不過食食下其他野呢個就正，所以都唔係真係等左好耐。個椰青係細細個個啲，唔好期望佢好大個，上面有青口同埋蝦，仲有魷魚之類，下面嘅飯就冇乜海鮮。個飯好香椰子味，我覺得好好食！飯嘅濕度同軟硬度都適中，而且我仲用食晒入面嘅椰子肉，好滑好好食！店員會主動幫你收野同埋加水，不過就好似求其左少少，而且冇乜笑容，不過整體服務態度都正常。呢間餐廳嘅食品都唔錯，雖然同九龍城嘅比較，呢個價位係可以有更高嘅質素，不過因為就腳同埋環境，我對呢間都滿意嘅！…查看更多

第一次去坑口呢間八方雲集，一去到見到間舖頭都幾shocked，因為舖頭真係好細，得十幾個位，同埋雖然未到繁忙時間，但都冇乜位淨。我自己一個人就好易搵到，不過想要多個位擺下個大背囊都唔得，唯有攬住佢係大脾上面，所以坐得真係好唔舒服。因為唔想要餐，所以我散叫左餃子同埋再另外叫左一碟菜。田園蔬菜水餃（$3.2一隻），包得幾靚，同埋味道都正常，因為其實八方雲集啲餡其實全部都係由公司送到唔同分店，然後再由分店職員包好，所以間間嘅餡料同味道都應該係一樣嘅。加左少少醋同埋豆瓣醬，幾好味嘅。另叫叫左一碟油菜全走（$12）。我係其他分店叫過，係烚生菜，不過呢間係菜心。一碟都幾大碟，不過全部都勁老，睇下老到中間有個窿。其實真係唔好食，因為真係好難咬好硬。呢間八方雲集係落完order後要即刻俾錢，同其他唔同，同埋上菜嘅時間都幾耐，店員服務唔算好好，要催幾次先上到菜。…查看更多

第一次試Urban Bakery Works嘅Salad！一共好似有六七款左右，Small Salad（$58），可以揀三樣，Large Salad（$78），可以揀五樣。根據之前食呢啲沙律嘅經驗，一個Small Salad都應該夠食，所以就要左個細沙律。去到Salad session揀完再拎到cashier俾錢。今次個侍應唔算friendly，全程都黑住面，所以我好快就點完，冇點到好想食嘅茄子！下次一定要試下！我揀左三樣：Spanish Corn Salad: Roasted corn dressed with anchovy spiced emulsion with paprika, coriander and parmesan cheese. 有少少辣辣地同埋印度咖喱嘅感覺，不會唔會勁濃味，而且同粟米好夾！我自己又幾鍾意芫荽，所以覺得成個配搭好好，不過如果唔鍾意芫荽陣味嘅人就千其唔好揀呀！Roasted spiced cauliflower salad with dried cranberries & Greek yogurt dressing: Spiced cauliflower tossed in olive oil and roasted in hot oven for a nice charred flavour, a perfect match with the Greek yogurt dressing and dried cranberries. 我好鍾意食椰菜花，數量都幾好而且好大棵，生熟程度啱啱好，唔會太腍亦唔會太硬。加埋Greek yogurt係出奇地好味，而且Greek yogurt份量適中，唔會好大一pat。Roasted root vegetable with soy flavoured pumpkin seeds  我認得有紅菜頭，第二隻紅色嘅係咩我就唔係好清楚，不過都係根莖類蔬菜。紅菜頭好大粒幾多汁，紅色個款甜甜地，數量都唔少，上面有香草同埋有南瓜籽，仲有少量烤過嘅腰果。食左都幾飽肚，而且味道幾清新。雖然成個沙律冇令到我有WOW勁好食呀嘅感覺，不過其實全部味道都唔錯，而且係中環呢啲地區價錢都係咁上下。我地呢啲窮學生就冇得成日食架喇，不過有機會我真係好想試下個個茄子呀！！！！我會再食呢一間，如果多啲分店就好喇！…查看更多

特發走上黎試下呢間嘅餃子，因為中午繁忙時間，所以真係好混亂，坐得好唔舒服好逼，而且服務態度不能更差，完全係催你落單，等左好耐都上唔到菜，同埋一擺低筷子口入面啲野未吞落去就趕你走。講真，舖頭入面嘅環境真係差，完全唔明點解可以坐到咁逼，同隔離個個幾乎貼到實一實，而且感覺好唔乾淨咁。一坐低侍應會擺低個碗仔同筷子，之後就落單啦。我嗌左一個碧綠素菜餃（$50）同滷蛋（$7），個滷蛋係催左好多次都未上。咁都預左啦，侍應係好求其咁pat低左個碟碧綠素菜餃就走左，一共有十隻，不過細細粒，食完都唔會覺得好飽。坐得咁唔舒服真係唔敢再有咩期望，燈光又昏暗真係食左咩落肚都唔知。餃子皮係北方厚實個種，餡料唔算多，而且都係好簡單，好似除左青菜同埋粉絲就乜都冇，冇乜味道，不過加埋醋同埋弄瓣醬就唔錯。滷蛋上檯都俾佢嚇親，爛晒咁樣，而且雞蛋好細隻，滷水味唔濃，簡單黎講我完全唔明點解自己要嗌一隻咁嘅野。當我擺完最後一隻餃子入口，侍應即刻衝過來收碟同埋叫我出去俾錢，講真我真係仲未吞落去，我覺得佢地嘅服務態度真係好有問題。佢地嘅野唔係難食，但總括各方面，加上佢嘅價錢又唔係平過人，我唔會再返黎幫襯佢地！一星期後我過左佢地對面個間北方餃子店，覺得對面個間真係優勝好多。佢地門口咁講，即使有經驗大廚，但我完全感覺唔到佢地係烹飪呢方面有熱誠，總之唔會再幫襯。…查看更多

來到PRET A MANGER，我一定會揀Healthy Skipjack Tuna Salad（$50），因為佢只得201個卡路里，而且低脂，同埋有吞拿魚同枝豆，可以有足夠蛋白質。因為天氣凍凍地，今次就買多個湯，PRET每一個星期都有一款指定湯，另外每日再有另外兩款，有素有肉，即使係素食者都可以揀到。是日我揀左Pret Chicken Soup（$35），因為佢冇CREAM冇BUTTER，又係低卡低脂之選。雖然佢每一款湯都低過200個卡路里，但有啲加左CREAM，脂肪含量其實都好多，低卡唔代表飲左唔會肥。Healthy Skipjack Tuna Salad正正常常，PRET嘅菜就每一次都一定好新鮮，絕對唔會發黃。青瓜同埋車厘茄冇咩特別，洋蔥辣辣地幾好食，豆嘅份量就時多時少。吞拿魚份量適中，加埋檸檬汁好食。我一向食沙律都唔會點沙律醬，因為沙律醬係所有脂肪嘅所在地呀！要健康就不如食得清淡少少，而且新鮮嘅菜即使唔點沙律醬都好好食，好FRESH！PRET嘅菜就有呢個品質保證。本來我對佢個湯都冇咩期望，但覺得幾貴囉，細細杯要成$35。打開飲左啖，真係熱辣辣架！天寒地凍飲返杯真係好舒服好舒服！成個身即刻暖晒！不過佢比我想像中多油左少少，大家可以望下湯面嘅油，雖然都唔算好過份。杯湯真係好多料，可以食到好多雞肉同紅蘿蔔，洋蔥之類，但有少少可以改進嘅就係雞肉可以全部去皮先，因為有啲雞肉連皮，可能會唔小心食左，亦會令到杯湯多油左。雞湯味道好好，全部野都好平均，唔會好重黑椒味，如果唔係咁貴我一定日日都買杯！…查看更多

Lunch特登行左成條威靈頓街去呢間試下，繁忙時間見到門口有十個人等緊位，都擔心要等好耐，點知企左一陣就入得。雖然係繁忙時間，但都唔會坐得好逼，正正常常四人座位就四個人坐。侍應服務態度幾好，唔會催你落單，但見到你想落單就會極速行埋黎幫你。餐牌好多選擇，價錢適中，粉麵飯個啲唔算貴。我一個人食唔到咁多，嗌左個花素水餃（$48）同埋時令蔬菜（$22）。碟菜好快就上左檯，我叫佢走油走蠔油。佢話本身冇蠔油，咁冇問題呀。但我見到啲菜反晒光，就叫個老闆娘黎問下，佢話啲菜係冇油嘅。但係好明顯碟底啲水就浮住油。算啦，唔算好多，我都照食。佢有一小碗豉油，上面有啲蔥，我覺得呢個好有心思。豉油唔會太咸，而且有少少蔥好香，撈埋啲菜係幾好食。而且菜冇烚得過腍，熟度啱啱好！扣分就扣在我唔想要油但佢有油。花素水餃一碟十隻，尺寸正常，餡料豐富而且多。本物我冇乜特別期望，但咬開第一隻後發現好有多餡，有青菜，紅蘿蔔，粉絲，冬菇，雲耳，食食下覺得有啲香味，原來仲有油炸鬼碎碎！望落去見到咁多野都覺得開心！油炸鬼碎碎份量適中，太多會覺得HEAVY太少起唔到作用，適中就可以令到清淡嘅素餃帶啲香味，我好欣賞呢一樣！餃子皮係北市個種厚厚地，我覺得好有嚼頭，坐我對面個兩個講普通話嘅女仔都咁講。加埋醋同豆瓣醬，個餃子真係一流呀！食完十隻後飽左好滿足，但又有少少失落，咁就食完喇！唔捨得！我都試過對面個間餃子園，講真，我覺得王府無論係環境服務定味道都比個間好好多！個間我就唔會再幫襯喇，但王府就有機會一定會返來試！仲想叫多啲人黎食多啲唔同野！好想試下佢個番茄蛋餃呢！…查看更多

最近好鍾意食餃子，不停地試香港唔同地方嘅餃子店，今次就試呢一間，不過講明先，其實係有少少失望。地方唔難搵，夜晚七點前去到，有好多位．舖頭幾舊，好中國式嘅設計，牆上面仲掛左有毛澤東嘅畫。好似係家庭式經營，侍應全部講純正普通話，不過佢地都識聽廣東話。佢地嘅態度麻麻，好似愛理不理咁。檯面望落去幾乾淨，但係我用紙巾抹左後，紙巾係黃黃地黑黑地。菜單選擇幾多，有小菜有餃子有麵有甜品。本身想叫一份餃子再加一碟油菜，健康啲呀嘛，點知佢菜單上係完全冇油菜。我問佢地有冇，佢地話可以烚一碟小白菜，不過就盛惠$25，雖然唔特別貴但我覺得唔抵，所以就冇叫到。我叫左一份素菜餃（$38），等左都幾耐。上菜後其實少少失望，因為餃子幾細隻，如果淨係食餃子我唔大食但我都一定食唔飽，但問題係佢菜單上其他野全部都大大碟，我自己一個人都唔知可以叫咩。咁冇計啦，照食。食左兩隻之後，數下，點解得返七隻？我問老細一共有幾多隻，佢話九隻。我有少少唔滿意，因為成日食開一碟都係十隻，而佢又冇注明，咁都冇辦法。其實餃子餡都幾好食，有菜，少少粉絲，其實都幾簡單，加少少醋同豆瓣醬係唔錯，但係就真係好細粒，而且唔多餡，一啖一隻冇難度。食完後好似冇食過野咁，要到對面些粉再買少少野食。而且我覺得佢地服務態度都唔好，做唔做你生意都冇所謂。環境又唔特別好，燈光好昏暗。雖然我好鍾意食餃子，但我一定唔會再返呢間食，我會寧願遠啲到附近嘅北方餃子源或者其他餃子舖頭食。…查看更多

三個人到Italian Tomato食lunch，12點左右到，所以唔洗待位，入面都仲有好多空位。坐低左後，侍應就斟左三杯水，仲要係暖水，溫度適中可以即刻飲，幾舒服。呢個係lunch menu，不過選擇唔多，所以我地都係決定散叫。叫左三樣野食，好快就有得食。第一樣係煙三文魚凱撒沙律，同menu一樣樣，真係咁靚。我叫左佢另上沙律醬，如果唔係會幫你撈埋，不過沙律醬真係好肥，所以我都冇食過，唔知咩味。沙律有番茄，生菜，煙三文魚，火腿同芝士粉。其實成個沙律都好好食，因為番茄同生菜好好好新鮮，番茄又唔會酸，生菜好爽，咬落去有聲，火腿粒粒好香，少少咸咸地。一共有三塊大大嘅煙三文魚，都好新鮮，一啲都冇欺場！隔離塊包雖然唔熱，但係就好脆口，而且少少牛油同蒜蓉香。整體黎講我覺得呢個沙律係抵食同抵讚嘅！第二樣係巴拿馬火腿薄餅，呢個係超好食超好食！巴拿馬火腿幾足料，而且上面有好多好多芝士。批邊好香脆，中間就好鬆軟，加埋芝士有少少濕潤。巴拿馬火腿咸咸地，加埋個批底就啱啱好！好多時候食PIZZA都唔想食批邊，但呢個就真係成個都好正！一定要試！第三樣野食係特製肉醬意粉，有牛肉成份，如果對牛有敏感就要注意下！意粉份量好足夠，我鍾意個汁酸酸地，而且有幾多肉醬。汁醬同意粉比例合適，唔會食到最後得返意粉唔夠醬。意粉煮得啱啱好，al dente。侍應嘅服務態度好好，見到你飲完水會主動幫你加水，而且加得好快手。見到你食晒又會幫你清走碟野食，而且離開餐廳時會笑住同你講拜拜。下面影左少少menu俾大家參考下，不過因為餐廳燈光比較暗，所以可能唔係咁清楚。未試過佢嘅甜品，不過我覺得呢間餐廳嘅主食係好食嘅！會再去！…查看更多

次次經過Le Bon Pain Bakery都會覺得好香，今次入左去隨便買一個好似健康啲嘅多穀麥包，唔記得exactly個名係點。一包有5塊，$13。價錢普普通通，不過其實袋包真係好輕，五塊先得165g。大家可以比較下普通嘉頓個啲方包，一塊大概係50g，但呢隻一塊只係大概33g。佢咁輕嘅原因係因為佢有好多空氣，所以食落係好鬆軟好鬆軟，我幾鍾意佢咁鬆軟，不過就會食極都唔飽咁。望下後面嘅成份，其實糖份都幾多，而且落左Margarine，所以都唔算特別健康。雖然佢叫多穀麥包但我覺得穀類同埋瓜子個啲係非常少，每一啖先得一兩粒瓜子，完全唔見有oat flakes。整體黎講，味道同口感都唔錯，不過我建議可以落多啲cereals。…查看更多