Marvin Drinks的個人專頁

尖沙咀新開嘅泰菜，喺 OpenRice 見到佢有「特惠」，人頭嗌野過$150就送一隻燒雞 。最後埋單人頭$300，食物質素還好，感覺上佢地唔係做開泰菜（無FC純感覺🪖）。 調味方面比較輕手，燒雞同雞棗都係無乜味，冬陰功係Ok嘅，生蝦刺身放左落shot glass好睇但食用難度大增，條魚上枱仲未熟透🥹，跟住佢同講返，佢係拎返條魚入廚房我估係用火槍炙過拎返出嚟，食魚底果面食到一啖仲係凍嘅😿希望餐廳可以繼續進步，越做越好 。特別一題 負責埋帶位 果位樓面 好好，佢幫餐廳攞返唔少分數👍…查看更多

唔係第一次食瑪寶鮮，亦經常介紹朋友去，但今次嘅經驗實在係不吐不快。訂枱嘅時候留左半隻乳豬，訂枱八點，我地七點五十五分去到，去到櫈都未坐，佢就已經話「咁我幫你上左豬先」，非常急趕。 明白佢係無得整半隻豬，一定係有另一枱同我地share每枱半隻，所以另外果半隻已經上左另一枱，佢想快啲上埋呢半隻，但係安排同談吐上係有好多值得改善嘅地方。寫好菜，一路食飯，每隔三兩分鐘就嚟收碟，就走嚟問呢碟仲要唔要，果碟仲要唔要，「不如食埋佢我收左佢」，等等。 枱唔夠位上菜，叫佢換隻細碟，又唔得喎，係要我地夾晒啲餸佢佢可以成碟拎走，莫名奇妙。最癲係，食食下飯，仲有幾枱客喺度，亦未到收鋪時間，佢熄燈。 在場食緊飯嘅客全部都打左個突，咁咪唯有全部起身走囉，唔係可以點。食物方面，以佢嘅價錢嚟講質素係OK（$400人頭），同佢可以自帶酒，仲要喺尖沙咀，其實係幾好 。 但服務方面無可否認係每下愈況，近年大家都好喜歡比較香港同其他地方嘅食肆，其他不談純講服務的話，香港食肆的確係非常令人擔憂 。…查看更多

超級耐無食過， 睇完戲突然心血來潮想食一於就衝！又因為好耐無食過中式辣，癮起所以點左青花椒辣湯~ 如果鍾意食辣呢個係唔錯，辣係越食越有幾爽嘅， 係唔明點解叫一個湯會上左個鴛鴦鍋出嚟... LOL 616 嘅牛嘅玩法其實係幾好，佢細碟又多唔同部位揀，同埋佢都唔算好貴，今次就覺得 匙柄 最好食，相對地吊龍伴同封門柳 肉味就一般上次嚟係幾年前， 當時佢地賣緊嘅香港手工啤唔係太新鮮，今次呢就明顯好好多，飲下飲下就飲左好幾杯，特別係「一代宗師」有驚喜～ 同牛邊爐好夾。 …查看更多

Associazione Chianti 牛扒出色其實都唔係新聞嚟，襯住高興日子一於去食個靚扒！前菜先揀左 Salumi Misti , 即係 cold cuts 嘅拼盤，佢有三四款唔同嘅肉，都係一啲咸味相對地比較重嘅肉，意料之內。之後就係 Carne Cruda ，托斯卡納風嘅牛扒他他，同法式相比無輪係配料同味道上都有好明顯嘅分別，呢個絕對值得試。重頭戲當然就係牛扒喇 ，今次揀左12-20日熟成Ｔ骨嘅 Bistecca alla Fiorentina 翡冷翠牛扒 ，叫得做 翡冷翠牛扒 必需要符合三個條件，首先要係有一定重量以上嘅Ｔ骨扒，其次起碼要有三指厚 同埋一定要係明火燒，所以技術上同其他牛扒嘅造法唔太一樣，加上佢地特製嘅調味，牛柳同西冷都好好食，西冷果邊直頭係大癲。酒方面就由佢地嘅 ”wine guy” 介紹左枝意大利 Stefano Amerighi Cortona Syrah，香港地去餐廳開枝酒就點都唔會抵喇，但係佢又真係介紹得好好，因為我地食托斯卡納風但又唔想飲 Brunello，佢介紹呢枝 Syrah 同澳洲嘅好唔同得嚟同啲牛都非常之夾。甜品叫左 Meringata 意式蛋白餅，唔好被佢個樣嚇親，負擔係出奇地低，唯獨係如果不好此道嘅朋友應該會覺得超級甜。最後以一 shot Amaro Vecchio Piemonte 作結，一款來自意大利嘅飯後酒（digestif），非常之突出嘅苦味同甘味，店員話就好似人生一樣，時苦時甘，咁話~ …查看更多

想食越發好耐，但每次唔係勁多人排隊就係已經賣晒，今次終於畀我食到喇～ 招牌牛柳牛丸粉： 呢個可能係佢地最受歡迎嘅粉喇，同一時間入座嘅十居其九都係叫呢個，如果以 $100 碗粉嚟計，佢個賣相同份量其實唔算好好，不過，佢個湯頭就真係做得唔錯，比起其他越南粉嘅鋪頭，鍾意佢唔會太過油，亦唔會太濃味，牛柳同牛丸都好好食，佢跟埋個粉仲有啲油炸鬼、青檸同椒絲，先飲一啖原味湯再加青檸同椒絲可以好飲到中間嘅變化，如果肉嘅份量可以多少少其實都近乎完美。招牌越南脆春卷： 佢地嘅小食都係好出色，春卷上枱熱辣辣，外皮非常之脆，用菜包住嚟食加埋入面唔同口感嘅菜料，食得好爽～ 越發牛油雞翼： 呢個亦係出色，佢同坊間食開嘅越式炸牛油雞翼好唔同，佢係雞翼面有蜜糖再喺上面有好多炸蒜粒，又香甜又辛口，好食！越南滴漏咖啡： 本身諗住都係正路野叫杯野食下，點知都有啲驚喜喎～！ 平時飲越南滴漏咖啡 經常都會陣苦澀味，但係佢呢個又無乜，仲有陣甘味，撈埋煉奶再甜的，好飲～！ 唯一嘅問題，就係一坐低就已經話 蕃茄蟹檬 已經賣晒，唯有下次再睇下有冇機會食到喇～。…查看更多

喺尖東噴水池附近嘅 B’hood ，係香港其中一間近年開始興起嘅「朝啡夕酒」餐廳，佢地仲襯住一週年出左幾款特色咖啡飲品，梗係立即去試下先。Kaffeost - 顧名思義，靈感係來自北歐嘅「芝士咖啡」Kaffeost，佢地嘅版本係將 cream cheese 同 masala 做底再加入咖啡，加埋芝士同火腿做 garnish ，係一款重咸香嘅熱咖啡～ 無錯，係咸香！ 記得留返個火腿最後先食，成個感覺得同平時飲啡好唔同～Barrel-Age - 雖然佢用左呢個名，但係其實佢唔係酒嚟～ 佢嘅豆喺冧酒桶發酵再做成 cold brew ，加埋個冧酒提子雪糕喺面，再煙燻～！ 煙燻開盅嘅一刻真係 IGable 到不得了。 Dopamine - 試完有 cocktail 技巧嘅啡，試埋有沖啡技巧嘅酒～ 用 syphon 嚟整 cocktail 真係第一次試，酒有 vodka 、甜酒同蘋果汁，味道偏甜，但係經過虹吸之後酒體明顯厚身左，好飲！ 私心諗如果有 gin base 嘅版本就好了~ Tempus Hourglass - 玩完虹吸，最後一杯試埋手沖，用 switch dripper 將 gin 同 vermouth 加入咖啡粉冷萃一分鐘，佢會畀個沙漏你計時好得意~ 之後再將酒沖落用啡整嘅冰度變成一個 long drink ，呢杯嘅酒感明顯比其他強，慢慢飲唔好要嚟劈呀～！ 好欣賞呢一種 crossover 嘅設計，將咖啡同調酒兩方面嘅技術溝埋嚟玩，好飲得嚟都學到好多新嘅知識， 絕對值得一試。…查看更多

午餐時間，喺旺角突然想食拉麵，經過門口見無食過呢間於是入去試下，一試難忘，以後都一定唔會再食呢間！ 入到去，坐底佢都係寫紙落單，當時鋪頭入面係唔算好多人，諗住叫兩個最豪華嘅麵試下實力，另外佢推緊可樂餅，諗住都叫一份支持下。 寫好晒之後落單佢就話：「你叫嘅野全部都無」我就問佢：「你咁多野無我地坐低嘅時候你唔講聲嘅？」佢嘅回答係：「我好忙，唔得閒講」然後轉頭隔離枱落單，亦係落單先知咩都無。 （不過公平啲，走嘅時候發現其實佢門口有張好細張嘅手寫紙有寫住有啲野係無，只係入去嘅時候完全睇唔到）其實果下已經想起身走，不過真係餓，算喇，叫左「人氣拉麵」（加芽菜）同「基本拉麵」試下。 我地隔離兩枱都係遲過我地落單，佢地兩枱都係先過我地上菜，同埋呢兩碗嘅質素，應該係我近年食過最低之一，上枱嘅時候已經係唔熱，叫左鹽味湯底但係湯係無味亦無質感，叉燒係薄到好似 打邊爐啲肉咁，最癲係係佢隻匙羹，係完全「畢」唔到野嘅，最後成碗食剩啲粟米根本係食唔到，最好食係枱面可以畀你加嘅蒜蓉，成件事係好伏。仲要佢坐位度有塊板寫住「我們唯一做不到的事，就係令你失望」，呢種 Roland式金句 嘅標語，無Roland級嘅實力backup住，實在係尷尬到不能。…查看更多

成日聽人講 灃味館 幾正幾正，終於有機會試下，結論係： 真係正嘅～！！ 先講下啲員工，個個都係好好禮貌有講有笑，絕對係令用餐經驗有加分。 食物方面，溏心皮蛋伴陳醋舟山海蜇頭：爽口嘅海蜇頭 配 黃金皮蛋，作為前菜呢個無得輸，醋味亦無搶晒其他野嘅味。濃湯雞煲翅： 呢個不得了，一大煲翅，濃厚雞湯，入面嘅雞肉都仲係滑嘅～新鮮菠蘿拔絲咕嚕肉：呢個係食過最好嘅咕嚕肉之一，肉實淨，炸得好，少少拔絲，啲糖慢慢就變得硬左脆左，高質！雞油花雕蛋白蒸蟶子配陳村粉： 呢個大癲，鮮味油香酒香口感所有野係配合得好好，直頭係叫白飯撈落去喇。大海蝦鍋巴： 呢個係我全晚唯一無咁鍾意，啲汁搞到啲鍋巴好癡口，蝦好食但汁有色蝦有殼食嘅時候都要份外小心。花膠扒配粗麵：呢個又係大癲，又係被秒殺之後再叫飯落去撈埋個汁。脆皮蔥油雞： 直接將 蔥油 淋喺雞面，雖然有少少影響到脆皮，但係雞就滑左同香左好多薑蔥肉蟹煲煎腸粉底：呢個又係相機食先喇，腸粉係重點，好好食。全哥炒飯： 有蝦有菜有鑊氣炒飯~ 為成餐飯劃上完美句號。…查看更多

好日都無機會去下將軍澳，咁啱有朋友搬左入去，梗係立即捉佢同佢隻狗 去GoNuts. 飲下手工啤食下野啦，今次揀左一啲之前未食過嘅野又試下。首先， 梗係飲返杯先，揀左本地嘅 OnceYouGoCraft House IPA。野食先嚟個 黑啤煙燻豬腩肉意大利飯：上枱個 pan 係熱嘅要小心手，見到佢咁水，本身都怕伏，唔會喎～ 好味，豬腩肉 唔會太膩，飯吸收晒啲湯汁無「生骨」。酥炸口水雞配四川醬： 如果可以食少少辣嘅話真心推介呢個，辣味喺入面滲出嚟，加埋個四川醬成單野食得過癮！經典凱撒沙律： 好鍾意帶咸味嘅凱撒沙律，上面塊芝士係重點，如果加啲啲 鳀魚 應該會仲正。招牌炸比目魚配薯條：個賣相加左分先，蒸籠上好好笑，味道方面如果大家有食過好嘅 F&C 就都係類似高質，F&C 呢樣野本身要昇華都唔容易紫薯麻糬窩夫配紫薯忌廉及雲呢拿雪糕：呢個幾有驚喜，窩夫入面係麻糬食得好開心。梳乎厘班㦸配伯爵茶醬：梳乎厘班㦸 好軟身 有空氣感，加埋伯爵茶醬 都唔會好腬…查看更多

朋友 carry 一齊去呢間新開嘅「私房菜」訂左一圍菜酒聚。 餐廳係地鋪嚟，招牌都好顯眼，唔難搵。 入去到店員非常有禮貌，坐好等齊人就開飯喇～ 酥炸墨魚餅拼黃金炸魚皮：魚皮夠咸蛋味但唔會好油膩，墨魚餅面一粒粒好鬆化好有口感同魚皮有好強烈對比。蒜蓉粉絲蒸扇貝：夠晒大隻，開左邊望落更大但削弱左口感，蒜蓉粉絲都無「手緊」值得一讚。羊肚菌姬松茸燉水鴨：一大煲湯枱面放晒酒無位於是就喺外面分晒，湯火喉夠，隻鴨已經燉到散晒，鴨肉都仲有啲味可以食下。砂窩焗大海斑：汁味道偏濃，上台時薑葱味好濃烈，魚係斬晒件，容易成舊夾但就變左食到好多骨。當紅炸子雞：香口有水準，但無乜野伴碟影響賣相。蟹粉扒豆苗：蟹粉無「手緊」，呢個菜只要唔手緊就一定唔會輸客家紅燒肉：出色！ 係無諗過大家係會搶肥豬肉食。紅燒牛肋骨：大大舊骨賣相好，牛嘅味道基本上已被汁完全蓋過生炒臘味糯米飯： 大家對呢個飯讚不絕口呢個質素呢個價錢絕對可以再戰~！…查看更多

一月份嘅期間限定係「とろ祭り」拖羅盛宴，有唔同食材嘅拖羅食。 今次揀左去旺角店，旺角即係旺角，完全係爆炸地多人，下次都係去返另外果啲店。其實拖羅就唔係剩係吞拿魚嘅～ 不過第一件事都係食左 厚切天然藍鰭大呑拿魚腩 同埋 極上厚切長鰭大呑拿魚腩 先～ lol 以佢呢個價其實真係無投訴，特別係藍鰭 真係抵食。 大盛天然黑鮪蔥花吞拿魚海苔包， 我一向都麻麻地佢地嘅海苔包，但係呢個算係幾好。大切日本產油甘魚腩，呢個都好食，好肉地油感都夠。梳乎里海鰻，呢個就有點兒太油，啲油多到滴落隻碟度。炸水牛芝士， 一貫壽司郎炸物嘅有水準，但係好少細份左啲明太子忌廉烏冬，有驚喜。 濃厚湯底，微辣紫蘇香熱辣辣食得過癮～今個月 MVP 反而係 焙茶和風芭菲，佢地甜品一向出色都係，呢個真係令人更加掛住日本。…查看更多

咩都唔講，講下訂枱先，佢地係每個月嘅一號，準時喺門口排隊訂下一個月嘅枱，即係例如 2月1號去排隊，就訂3月1至31號嘅枱，咁嘅。 其他時間基本上係無咩辦法可以訂到枱，呢樣要留意返。 講返食物，其實訂枱果陣要揀埋喇～ 嚟到主要係揀牛定係豬，我地揀左牛，係有4個唔同部位嘅A4和牛，另再加左 $100 有四片薄切牛舌。 跟餐仲有一個前菜、茶碗蒸、一盤菜，一隻蛋同一碗飯，飯係可以任添，但係最後係仲會有一個炒蛋飯（留意：唔係蛋炒飯），如果自問唔係「飯桶」嘅朋友要留意，我自已係無添過白飯，成晒全餐飯係非常飽嘅～壽喜燒 係關西式，佢落嘅糖係遠比我想像中多，如果唔係肉本身嘅質素比較高，我估成餐飯嘅體驗會好唔同。味道方面， 無論係牛定係菜都幾好，我個人就比較鍾意啲牛唔蘸蛋食，可以食到多啲唔同部位嘅分別。 不過整餐飯嘅感覺有啲急趕，一嚟上菜嘅速度都頗快，二嚟我地仲坐喺度食緊野，佢地已經喺度洗緊地洗緊鋅盤。 加上師傅愁雲慘霧嘅氛圍以及機械人式嘅介紹，其實都幾突兀。…查看更多

上次試左 The Dinning Room by BluHouse，今次試埋外面嘅 BluHouse，雖然係同一間餐廳亦同時係意大利菜，但裝潢格調風格上有好明顯嘅分別，BluHouse嘅風格相對地比較在地，價格亦係相對地比較相宜，熱潮稍為減退而家訂坐都比之前容易，可惜係對比之下，似乎畀多少少再訪 The Dinning Room 先係明智嘅選擇。先係一位應該係比較高級嘅男同事，坐低問我「想飲咩水？」，我答佢「要Tap可以喇，唔該」，其實去十間九間都係咁講喇～ 點知換嚟嘅係一句非常倔強嘅「我地無tap water」，我係真心唔知佢無 serve tap水嘅，之後我諗起上次 The Dinning Room 有得 order 有氣水 free flow，於是問返佢係咪都可以有一樣安排，唔肯定係咪因為我地畀錢飲水嘅關係，呢位店員態度係立即 180度轉變，認真我係有啲出奇無諗過佢會有咁嘅反應。講返食物，格局好似 food court 咁，大家係可以佢地啲 counter 度睇到啲食物嘅「真身」，佢地食物份量係偏細，如果男士們想要食飽可能唔係咁容易。Panzerotto Napoletano ，即係可樂餅，入面係薯仔、芝士同埋火腿，好食嘅，入面夠熱夠creamy，外面亦好鬆脆。Diavola Pizza，羅馬式薄餅，最大分別係製作餅底嘅時候會加入橄欖油。 揀左一個有意大利辣肉腸、芝士以及燈籠椒。 味道OＫ，但個人都係偏好拿破里式多啲。Rotisserie Chicken，成日見到有人吹奏佢個燒雞好，叫半隻試下，佢有 Diavola或者 Salt & Rosemary兩款揀，但因為Pizza揀左Diavola，所以燒雞就揀 Salt & Rosemary，味道中規中矩，無聽返嚟咁神，同埋以半隻 $398 嚟講，其實有啲失望。Sicilian Cannoli ，一款傳統嘅意大利甜品，BluHouse 嘅甜品質素其實一般，試下呢啲傳統野還好。另外飲左杯野 埋單人均同 The Dinning Room 其實只係相差三幾百，但係The Dinning Room 嘅服務、份量同味道都係完勝，再揀的話我諗我都係去返 The Dinning Room by BluHouse。…查看更多

經常聽到友人講豪記出色， 終於有機會試下，豪記係一間地鋪小店，唔算起眼，未去過有機會經過左都唔知，多謝友人carry 訂枱嘅時候已經寫埋菜，齊人等左一陣就有飯開了～黃酒雞煲，呢個係真心正，先飲啖湯、再食滑雞、再淥肥牛，成件事好perfect ，湯頭具酒香但唔會膩，個牛質素都幾高，真心推介。蒜蓉粉絲蒸蟶子皇，呢個基本上就係食食材本身嘅質素，亦係非常之好，厚肉彈牙，正呀～墨魚餅，老實本身對呢樣野無乜期望，但係有驚喜，口感好好又好香口，送酒一流～ 薯仔牛柳粒，佢個牛唔係一般炒咁簡單，好似有拖過油咁，個面有啲香脆，好好味~！！炭燒豬頸肉， 呢個都係同平時果啲好唔同，佢係好似椒鹽咁，好香口不過有啲咸椒鹽鮑魚，呢個上枱嘅時候有一下諗緊佢係咪上漏左鮑魚，實情係佢丁晒先做椒鹽，加埋腰果同蒜粒，又係不得了～ 食物質素以及性價比方面 其實都幾高，絕對可以再戰～ 唯一小意見就只係上菜嘅速度有啲慢，我地一路飲住酒等就還好，始終係小店小團隊經營真係做到踢晒腳。 …查看更多

話說上次食見到隔離幾枱都叫羊腩煲好似好正，咁梗係快手約fd子再戰啦，今次一行六人叫左十三個菜，真係夠晒爽～！ 秘製羊腩煲，先講下個佢個煲，好巨型 賣相就贏晒喇，味道都吾錯，唯一係以一個$498嘅 羊腩煲 嚟講佢肉個份量唔算係多。今餐驚喜之一，一定係「黃金茄子」，紅伶嘅「黃金」一向都係幾好食，係無諗過黃金同茄子呢兩樣係咁夾。酥炸脆皮大腸，同平時食開嘅好唔同，係咪好啲就真係見仁見智，我自己就鍾意食平時果款多啲，但同行友人們就對呢個紅伶版本讚口不絕。已經好飽但最後都忍唔住叫埋個反沙芋，上次食左焦糖今次食返「傳統推沙」，係真係幾正，呢類傳統手工菜可以有多啲餐廳做係好事。其他叫左嘅都係一啲比較大路嘅野，紅伶嘅質素好穩定，地點又就腳，唔怪得真係日日都咁爆場~ 另外鍾意嚟紅伶嘅另一個位，就係佢開瓶收費都好合理。…查看更多