carol 2019的個人專頁

天氣悶熱，食辣野開胃d，今次來到天水圍一間正宗川菜餐廳試試。餐廳乾淨寬闊，坐得舒服！ 川菜的特色是麻和辣。近年酸菜魚係香港大行其道，所以先點左餐廳招牌菜-酸菜魚，可以選擇辣度。乾煸四季豆為蔬菜和另一主食孜然牛肉。因為怕川菜過辣，點左招牌紅豆冰來中和一下。最後朋友建議點蔥油雞。 等左陣，香氣四溢的主角酸菜魚送到。雖然係例牌，但份量十足。用料也是滿滿的，有豆芽、豆卜、薯粉、酸菜和鮮魚塊。荳芽同薯粉吸收了湯既精華，配合魚塊食，辣中帶點甜，甜中帶點麻。魚塊嫩滑。雖然辣，但越食越想食多塊。多得紅豆冰相助，完全征服了辣味。 乾煸四季豆雖然用紅辣椒炒，但不算太辣，有炸肉碎拌住來食，送飯一流。 蒽油雞不過不失，雞肉嫩滑，而朋友喜歡蒽油汁送飯，齒夾留香。 孜然牛肉最後上枱，牛肉用不同種類的辣椒一齊炒，味道偏辣，十分惹味，咬落去肉汁滿瀉，喜歡辣既人, 絶對要挑戰一下！ 最後我們還是清枱，因為真係好開胃，下次會再來encore。…查看更多

今日入屯門揾朋友，發現一間好chill，佈置有點像Soho區既酒吧餐廳。可以選擇坐高枱座椅或普通座椅，每張枱都有燭光，份外有格調！ 主菜可以加錢轉餐湯及飲品，我同朋友點了個避風塘軟殼蟹意粉和頂級安格斯肉眼扒配薯角，配了餐湯飲品。 餐湯先上配蒜蓉包，磨菇湯有細蓉，足料，有口感！ 飲完湯後，好快就上避風塘軟殼蟹意粉，軟殼蟹可口美味, 脆得來不會油，香口而不辣，意粉墊着，滿有避風塘風味，我食完一啖又一啖！ 頂級安格斯肉眼扒配薯角份點了medium well，份量也挺大，牛扒質素堅係高，雖然厚身，但非常軟淋，肉味香濃。切開後可以看到外烤熟內裏小紅，好juicy。感到意外嘅係呢塊厚扒熟度平均，唔會有啲生啲，有啲熟啲，我同朋友都好滿意，值得推薦比大家。 最後飲返杯冰凍嘅檸茶作結，真係大滿足！ P.S. 雖然呢間小店自成一閣，但六點幾已陸續有預約左的客人入黎，連外國人都識得黎光顧！如果喜歡飲酒傾計，約埋三五知已，是不錯的選擇。…查看更多

今日同朋友行街，見到呢間裝修好夢幻、好少女嘅餐廳，於是吸引左我地入去食晚餐。 首先個餐湯係營養價值高嘅南瓜湯，啖啖都有好幼細南瓜蓉！ 主菜係龍蝦汁芝士焗海鮮飯，上面鋪滿海鮮：蝦、蜆等，份量都唔少。飯粒硬度適中，唔會太硬，亦唔會太淋。 烤美國安格斯肉眼牛扒，雖然唔厚身，但都好juicy，牛味重，表面有烤香嘅味道，肉質嫩。同香脆嘅薯條簡直係絕配！ 特飲都有好多選擇，我最後揀咗宇治抹茶士多啤梨鮮奶，呢個配搭好夾，飲倒少少酸酸甜甜嘅士多啤梨味，幾特別！我朋友揀咗蜜桃茶，佢話既有甘醇嘅茶香，又有甜甜嘅果香，味道清新！ 最後點了個原味梳乎厘班戟，賣相好吸引，淋上蜜糖、好好味，蛋味濃郁，甜度適中，好鬆軟！ 我哋都覺得呢間餐廳唔係「虛有其表」，食物方面有質素、有驚喜，款式很多，下次一定要再來試試其他！ 提外話，侍應好細心，會主動拎個鈎比我地鈎住個袋，讓我們坐得更舒服！…查看更多

同朋友食飯傾計，西餐係最佳選擇。行完街，便到呢間氣氛好好既扒房，適合知己談心地方。我哋六點就去到！ 餐廳安排左座位坐係bar枱，可以一邊坐住傾計，一邊睇住廚房大廚煮野食。 頭盤叫左個新鮮黑松露巴馬火腿配露筍温泉蛋沙津，第一次食新鮮的黑松露，味道清新，但有好濃郁的香氣，露筍爽甜。火腿夾着流心既温泉蛋，口感突出，可以再試。 主菜就order左個16oz 既燒安格斯肉眼扒配黑松露薯蓉，因為朋友唔想食太生，所以點左medium well。牛扒表面有烤煮過網紋，有好重既肉香味。切開後，中心部份小紅，每刀切下去。肉汁都會流出來，好juicy。係表面加點sea salt，大大提升牛肉味，下次一定會再點。黑松露薯蓉不過不失。 主食點左香草紅酒燴牛面肉扁意粉，牛面肉煮到非常淋，加上紅酒汁，味道提升。容易入口，意粉約有1.5人份量，同朋友share食都有多。 最後要比個讚餐廳職員，食完一道菜，會主動過來收碟後，才上下道菜。P.S.如果經 sevenrooms book枱, 仲可享有折扣優惠，超抵食！ …查看更多

寒冷的天氣，最好去食燒物同窩物！放工就選擇呢間近鐵路站既日本餐廳，餐廳佈置好有居酒屋feel，座位之間寬敞，坐得比較舒服。職員見我有個背包，還特意給我一個箱收納，要比個讚! 食日本野當然要試試手卷及壽司，甜蝦壽司不過不失，鰻魚甜味濃郁，巨型帶子爽口鮮甜，可以encore。呢度啲生野都好新鮮，食得放心！ 天氣凍，食串燒真係一流。叫左黑椒豬頸肉串、鹽燒豚肉菠蘿串、七味墨魚仔、汁燒安格斯牛肉串。豬頸肉燒剛好，保持肉汁。豚肉菠蘿串咬落去，酸酸甜甜，係寒冷天氣下，開開個胃。墨魚仔算彈牙，撒上七味粉，辣得過癮！加埋個吉列紫蕃薯栗餅，堅係外脆內熱，表面脆pop pop，裏面就有甜味既紫蕃薯，鍾意蕃薯既朋友，值得一試！ 朋友食左個蒸蛋，佢話又滑又軟，好味！ 最後order左皇帝蟹炒飯和安格期牛小排壽喜燒，簡直係大滿足！其實皇帝蟹炒飯夠3人份量，飯粒炒得乾身，蟹肉飯粒分明。職員好細心，上左個飯就拎個gas爐，加熱壽喜燒，還給我們提示，不要滾太耐，免得牛小排過熟！小牛排肉質嫩滑，應該是上品肉！食完飲了少少熱湯，整個人暖昱昱。…查看更多

天氣又開始熱番, 想食下啲開胃的辣野，在元朗，一定是想起有正宗泰國菜的公車，餐廳門外佈置好有泰國特色，裏面座位寬闊，坐得舒服。 前菜先來個燒豬及雞串，叫左個兩人份量既冬蔭海鮮湯，泰式青咖喱牛肉同馬拉盞炒通菜。當然要試下d特式泰飲，我叫左杯椰汁冰，朋友叫左杯菠蘿冰。 等左陣，燒肉串上桌，一陣陣燒肉的香氣，無論係豬肉還是雞肉串，都沾上香濃既沙嗲醬，肉串燒得剛剛好，鎖住肉汁，唔會太乾，配埋沙嗲醬食一流。 好快開胃湯冬蔭海鮮湯送到，依舊非常足料，有青口、大蝦、魷魚等食材。第一口會飲到鮮甜味帶點微辣，後面越飲會越辣，越辣就越想飲。好彩叫左杯椰汁冰可以解辣，椰汁冰的甜味剛好可中和海鮮湯既辣味。朋友的菠蘿冰飲落去，會飲到碎菠蘿肉，酸酸甜甜。我個人建議食泰國菜,叫杯特飲係必須的。 泰式青咖喱牛肉和馬拉盞炒通菜同時上菜，有咖喱緊係要叫碗白飯來撈下。青咖喱有好濃郁既椰奶甜味，牛肉好淋，撈白飯來食，食指大動。湯或前面叫的餸係正宗泰式辣度，而呢碟馬拉盞炒通菜係我叫既菜式中算係無咩辣味，反而食到馬拉盞的咸味。 最後飲埋特飲，整餐食完都不會感到膩，下次會再來試試其他菜式。 …查看更多

天氣凍就好想打邊爐，於是又去咗高質嘅火鍋放題，勝在食物款式多，仲有自家製飲品添，最鐘意洛神茶，酸酸地，唔會太甜，而我的朋友拎咗一支蝶豆花茶，亦覺得好飲！ 原來呢度仲多咗火鍋外賣送貨及外賣自取的服務，自取仲有九折添，啱晒我呢啲有時想屋企打邊爐，但又唔想去買餸嘅人，好方便！ 除咗用手機落單，出面仲有好多自取嘅丸類、蔬菜、飲品等，我地先夾左d泡菜、麻辣雞腎食，好開胃！ 蔬菜種類好多，連羽衣甘藍都有。 肉類依舊保持水準，無論係安格斯牛肉、封門柳，定係肥牛，都好有牛味，令我地食唔停，就算涮耐左，都唔會韌！ 好欣賞佢雖然係便價火鍋放題，但食材一d都唔求其，好多自家製食物，我就最中意食呢度各種手打丸、雲吞、魚骨、蝦滑！ 當然唔少得食海鮮啦！蝦夠新鮮彈牙！沙白無沙！估唔到仲有帆立貝！ 呢度性價比極高，難怪每次黎都坐滿晒人。 …查看更多

近一兩年，石板燒店鋪越開越多，可見這種由日本傳入的食法很受香港人歡迎。剛好元朗新開左一間石板燒專門店,，今日就潮聖一下，看看石板燒的魔力。 餐廳地方寬趟，有多人座，也有單人座，適合不同群組既人來食。我地點左個日本A5佐賀和牛肉眼二人前。套餐包了鹿兒島A5和牛肉眼(約100g)，美國極級黑安格斯牛隔肌(約200g)，美國極黑毛豬(約200g)，美洲厚切牛舌(約120g)。北海道珍寶帶子兩粒和一份日式炸蕃薯條。以兩人來說, 分量絶對足夠食飽肚，另外, 餐廳有沙律吧，沙津、白飯、湯都是自助任食，啱哂喜歡食前菜既朋友。 等食物上枱個陣，去左拎沙律，湯同埋白飯。有沙律菜和薯仔沙律，兩樣都有蓋蓋住，十分衛生！沙律菜可以選胡麻汁、千島、柚子醋同黑醋汁，自己習慣加胡麻汁，少少酸比較開胃！白飯可以自己加點紫菜，自制紫菜飯，正! 有泡菜牛肉湯，味道像是羅未湯，少少辣，飲了一碗，也是開胃之選！ 到上主菜，店員同我地講帶子和黑毛豬已預先煎過，只要稍為加熱就可以食，好細心哦！石板會預燒到好熱，然後可以因應自己喜好，決定牛肉幾熟。放上肉前，先將牛油放係石板上加熱，咁樣就會令肉更快熟，同時令肉又香又唔易痴底！首先，當然要食左A5和牛先，相信香港人對日本佐賀牛應該唔會陌生，和牛雪花分布均勻，係石板上咋咋聲，食落去油脂滿溢，入口即溶，果然係A5級數。 仲有我至愛嘅番薯條，好粗身好甜😋！ 食完和牛，再食下雪白帶子，雖然唔算係jumbo size，但鮮甜爽滑。 到牛隔肌上場，牛肉放上石板，兩面先煎，鎖住肉汁，用刀砌成小塊，唔會有血水，牛肉相對A5和牛，牛味比較濃郁，肉汁嫩滑。 食完牛，石板已經不夠熱，跟店員說，店員細心咁換了另一塊石板比我地，服務一流！因為黑毛豬係預煎過，放上石板，好快就熟。豬肉唔會靭，分量十足。 然後到牛舌，厚身到不得了，好味道！喜歡牛舌既朋友，一定要來試試！因為之前食左好多，已經好飽，最後沒有食哂牛舌。…查看更多

香港人一年四季都喜歡打邊爐，我都唔例外，今日繼續幫襯非一般高質既「打邊爐」。 好鍾意幫襯呢度，除咗因為裝修古色古香，仲因為枱與枱之間有十足的防疫距離，一啲壓逼感都冇！ 點完餐後，店員再奉上一盤大大小小的調味料，按自己喜好調醬。用完後店員會拿走，非常衛生！前菜先上一碟冷盤帶微辣的雲耳，等我地開下個胃先，咁後面就可以食多d。 湯底我地選擇鮮椰青雞鍋，店員先把大概半隻生雞配放入鍋，係我地面前加熱炒，再加花雕酒點火，雞吸收花雕酒既香味，然後加入新鮮椰子水及清湯，店員把剩下的椰子拿入廚房起肉，再加入火煱裏。加熱多10分鐘。打開蓋，濃郁既椰子香味，散發四周，令我地食指帶動。既然咁足料，當然先飲兩碗湯再起筷，奶白色既濃湯，飲完後感覺好暖胃，雞肉有花雕酒既甜味，嫩滑不韌，堅真材實料！ 這間「打邊爐」感覺主打自家制及創新，我地叫左一支自家制檸檬意米水又朋友就叫左支竹蔗茅根，清熱下火，唔會太甜！油炸鬼就食得多，小食-墨魚滑油炸鬼配蟹籽就真係新奇，外皮炸得很脆，應該係即叫即炸，裏面就爽口彈牙，口感好特別, 值得一試！另一味自家制芹菜帶子餃，裏面原粒帶子，夾雜在芹菜的新香，餡料十足。咸蛋黃蝦滑相信是另一味創新菜，咬開蝦滑，咸蛋黃汁流出口腔，蝦肉啖啖咸蛋黃味，正斗！平時打邊爐都會叫墨魚丸，今次叫左個黑松露墨魚滑，黑松露均勻分佈，每口都有黑松露，以上所有絶對可見廚師嘅用心！ 我地還叫了廣島蠔，好鮮甜而且冇腥味，滚完無咩縮水，口感豐滿！最後加左個花雕滑牛，新鮮牛肉配上花雕酒杞子，肉質鮮嫩，香而滑，我食左勁多塊，之前一早放入的淮山吸收了湯和餸既精華，比我朋友清埋。總括而言，這間餐廳服務周道，服務員會細心地幫我地隔走啲油，而且用料十足，值得推薦！ …查看更多

每次想食西餐，一定會諗起呢度，覺得呢度啲菜式色香味俱全，加上慶祝好朋友生日，一定要帶佢黎食好嘢！呢度裝修簡約而富有自己的特色，有晒隔板，防疫措施做足！ 三文魚他他：三文魚切碎，加上乳酪汁、香草、溫泉蛋、青瓜粒及明亮晶瑩的三文魚子，味道鮮甜，用匙羹攪拌，再放在香脆的麵包上食，作為前菜，挺開胃！ 必點「皇牌」菜式：燒安格斯肉眼扒配黑松露薯蓉，塊扒又厚又大塊，肉質鮮嫩，有炭燒味，點唔點汁都咁好味！有16oz咁多，完全可以滿足我哋兩個「食肉獸」，簡直食過番尋味！ 另外，我哋都好鍾意個滑溜溜的薯蓉，有好香嘅牛油鮮奶味之餘，仲有黑松露那股獨特味道！ 北海道帶子龍蝦汁扁意粉配三文魚子：大大粒帶子煎至少許金黃，扁意粉的軟硬度適中，配上香濃的龍蝦汁，十分夾味！ 總括嚟講，呢度嘅嘢食好高質，坐得又舒服，好適合與朋友聚會！…查看更多

今日約左朋友去尖沙咀行街，順便去一間靚景、氣氛好既高質扒房，好適合情侣或知己談心嘅地方。 餐廳非常寬敞，位與位之間有足夠距離。另外，餐廳位於高樓層，透過大玻璃窗，可以遠望灣仔會展，可惜今晚有雨，未能看到維港最靚一面。 我地叫左個兩個dinner set ，共五道菜。 前菜係鮮蝦沙律，大大隻蝦爽口彈牙，沙律汁配埋蕃茄同沙律菜食，先開個胃, 為後面主菜作準備。 我同朋友一樣都係叫左是日餐湯-西蘭花蟹肉湯。食得出細細粒既西蘭花蓉，好幼細，相反蟹肉份量唔少，蟹肉味濃，互相配合，絶對係用心之作，值得比like！ 然後再來的是蟹肉日本年糕，年糕好軟Q, 因為年糕本身係無味，伴着濃郁既醬汁食，恰到好處，口感味道都一流！ 主菜就點左牛肉眼扒同埋澳洲羊鞍，肉眼扒同平時一樣，點左medium well。塊板熟度平均，看到廚師功力！牛扒牛味重，肉汁多，好juice，再淋上紅酒汁，大大提升牛肉味。因為習慣食全熟羊，所以羊鞍就叫左well done，羊鞍厚肉扎實，但燒到剛剛好，唔會太乾身。食落去完全冇膻味，想食羊而又怕羊膻味既朋友，必定要試！每個主菜都伴有超甜的粟米、營養價值高的紫薯、新鮮的蘆筍，看得出廚師的用心，一點也不馬虎！ 最後甜點係tiramisu及芒果慕斯蛋糕作結尾，擺碟精緻，好似一幅畫，Tiramisu平時既差唔多，反而個芒果慕斯蛋糕有驚喜，有淡淡既芒果味，口感軟綿，好適合作為一個豐盛晚餐後的甜品！ PS. 餐廳門口擺放着好多廚師獲個既奬，真係名副其實！ …查看更多

今日放工遇着打風，在尖沙咀揾到一間高質的扒房。餐廳座位可以透過透明玻璃窗看到廚房，睇住食物上碟。餐廳的裝修很有格調，令人好relax！ 來得扒房，必定要試牛扒，我地叫左個16oz 既燒安格斯肉眼扒配黑松露薯蓉，三文魚他他配香草乳酪汁和香煎帶子龍蝦汁意粉配三文魚子share食。先講三文魚他他配多士，一冷一熱，放入口，突出三文魚既味道和口感。因為份量多，食完了多士，單獨食也可以當冷盤食，好開胃！ 燒肉眼扒：一見到呢塊又厚又大塊的扒，即刻流晒口水！因為我唔想食太生，所以叫左medium well。牛扒兩面表面有燒烤網印，燒得非常香。切開牛扒，牛肉中心部份係紅紅地, 應該差不多8成熟。每刀切開，都有大量肉汁流出，好juice！牛肉配上燒汁，提升牛肉的味道，肉淋味濃！用黑松露薯蓉來配食，非常值得推薦！ 香煎帶子龍蝦汁意粉：帶子新鮮，肉質爽口，味道鮮美，意粉拌上龍蝦汁和魚子，增加食慾，食落去不會感到膩！ 最後叫左杯特色飲品，Virgin Berry Mojito，什莓果汁soda, 中和食完肉後的肥膩感覺, 簡宜完美！呢度仲有好多特色飲品，期待下次黎可以試吓其他！ …查看更多

天氣熱，冇乜胃口，想食下泰國嘢添，於是黎左我同事介紹嘅泰國餐廳。去到餐廳門口，見到充滿泰國風情的裝修，感覺自己好似去左泰國咁。食得泰國嘢，一定要點返個冬蔭公大頭蝦湯，裏面加左香茅、檸檬葉、天椒、芫荽等香料，集合了甜、酸、辣的味道，十分惹味！大頭蝦的蝦膏多，蝦肉腍。泰式咖喱炒牛肉：牛肉份量都幾多，很嫩滑，仲要一d都唔辣，散發出好香的咖喱和椰香味，連小朋友都好鍾意用啲咖喱汁撈飯食。海南雞半隻：帶咗小朋友黎食飯，都擔心d雞會唔太熟，上枱見到好彩d雞肉夠熟，而且一d都唔「鞋」，有雞味。碟邊有蘿蔔絲，酸酸的，好開胃！椰青：椰子水清甜而且解热，果肉具奶香，口感一流！飲完透心涼！總括而言，呢度係好啱一家大細黎開餐，份量足。食中西餐食到悶悶地，呢度絕對係好選擇！…查看更多

每一次帶朋友嚟呢度食飯，佢哋都有讚冇彈，今次都唔例外。呢度裝修都幾有特色，我哋都坐得幾舒服。呢度食物款式都唔少，我個朋友都揀咗一陣先決定倒。我哋叫咗個美國西冷牛扒：本身塊扒靚，牛味濃郁，肉香撲鼻，上面只係加少少黑椒、香草、蒜蓉已經好夠。甜蕃薯條：平時西餐食薯條食得多，但蕃薯條真係少見，我哋都係蕃薯愛好者，只係$28就有咁多，蕃薯炸得金黃燦爛，香甜可口，外脆內軟。羊架：絕對係必點，我朋友話以為好細件，估唔到份量咁多，又厚身，咬落去好多汁，一d羊騷味都冇。芝士流心蛋大啡菇：超大的大啡菇上鋪上一塊完整的芝士，切開後，流心蛋的蛋汁流出來，睇倒都流晒口水！不需太多調味料便能帶出濃郁的菇味和蛋香。滿蜆肉蝴蝶粉：我個朋友見到不禁驚嘆，d蜆鋪到滿晒，好鐘意個醬汁清清地，唔會好濃味，唔會遮蓋左蜆肉嘅鮮味，食多幾啖都唔會膩。香茅蜜桃茶：甜度適中，飲完透心涼。總括而言，呢度食物味道唔錯，而且抵食，仲要唔收加一服務費！難怪我哋平日六點左右黎到，裏面已經坐咗好幾枱客人啦！…查看更多

今日放工，同朋友又去左呢間傳統既日本居酒屋食飯。餐廳內外面嘅佈置令我覺得置身於日本咁，令人心情放鬆，座位寬敞，坐得很舒服。 每次食日本菜，燒物、壽司同埋鍋物都係必食，咁樣先夠喉。 我地先叫個蟹籽沙律，上面鋪滿滿的蟹籽，加上沙律醬一齊食，味道好夾！ 然後到手卷及壽司，叫左鰻魚同帶子手卷。鰻魚比較甜，夾住紫菜卷恰到好處。大大粒帶子爽口，新鮮，值得一試！因為我比較鍾意食蟹籽, 所以叫左個加州反卷，口感十足！ 呢間餐廳最出名既應該係各式各樣嘅串燒，我地叫左豚肉荔枝串、菠蘿串、冬菇串、燒蕃薯仔。豚肉荔枝串堅多汁，咬落去荔枝汁充滿成個口腔，令到肉味更加突出，一啲都唔膩，正! 菠蘿同冬菇串燒得剛好，不會太乾，蕃薯仔夠哂甜！ 最後食埋個皇帝蟹炒飯和牛小排壽喜燒，堅滿足！皇帝蟹炒飯分量適中，飯粒乾身不油膩，加埋蟹肉，簡直一流。壽喜燒同其他日式餐廳一樣，先放個gas爐, 再整鍋上加熱，鍋裏面有包心菜等配料，牛肉嫩滑高質！ P.S. 呢間餐廳估唔到有我小時候喜歡喝的波子汽水, 爽!…查看更多