老記粥麵

營業中

休息中

因為屋企人睇錯資料，山長水遠由氹仔嚟到食呢間老記粥麵，嚟到發現係米芝蓮推介餐廳，之後睇下食評有咩餸好食，發現大家推介嘅餸都好唔同，而個menu真係超多嘢食揀，唔知嗌咩食就隨心叫啲鍾意嘅餸試下：水蟹粥，可能係全澳門最好食嘅！粥底夠綿，蟹肉唔削多膏，好鮮甜！我見好多當地嘅街坊都叫咗！魷魚炒麵，有得揀濕炒定乾炒，我哋揀咗乾嘅，澳門啲魷魚真係好肥美，又大條又爽口彈牙，平時最驚啲硬嘅炒麵有油益味，呢度完全唔覺，麵身好爽脆，配埋個好惹味又適量嘅芡汁，真係冇得輸👍🏻生啫黃鱔煲，一上枱滋滋聲，見得到嘅鑊氣！黃鱔好鮮好香，如果大舊肉啲就仲開心～菜乾豬肺湯，呢個真係懷舊味道，菜乾豬肺味邊個都搶唔到對方，豬肺好乾淨一啲腥味都冇，係飲得出嘅心機同誠意！雜薈炒河，係好足料嘅雜薈！有鮮魷、豬雜、雞肉～籠仔膏蟹蒸糯米飯，不得了地多膏，仲要唔係剩係隻蟹好食，個飯底都超好食，個飯充滿住碎嘅薑蔥，啖啖都好惹味👍🏻👍🏻👍🏻終於都明點解啲食評個個都推介唔同嘅嘢食，因為求其嗌每一味餸都好好食🤤呢餐飯真係食得好開心，好有回憶嘅味道，係食得出嘅心機，侍應亦招呼得好好，見到街坊之間嘅交流都好有人情味，下次有機會嚟澳門都要再食！