Bistronomique

營業中

休息中

今個週末難得天氣咁好，朋友揸車就去咗西環海邊呢間餐廳食午餐，餐廳有兩層，下層樓底高些，景觀開陽D。前菜叫咗個安格斯牛肉他他，牛肉處理得好好，有少少洋蔥粒，中間有隻生鵪鶉蛋，入口非常之滑溜，有少少檸檬汁中和下，食落去非常之清爽。另外叫咗個燒虎蝦沙律，隻蝦出奇地係新鮮製作，非常之香脆，仲有少少炭香味，配埋底嘅牛油果生菜同埋橙色嘅汁，味道都好清新。食西餐都會有餐包，呢度嘅餐包外皮非常香脆，中間又軟熟，上枱嘅時候仲係熱辣辣。主菜叫咗是日精選豬肋條，豬肋骨調味類似BBQ醬汁，所以好香濃，最緊要豬肉處理得非常好，一刀切落去，基本上已經骨肉分離，豬肉軟身，帶少少根位，旁邊嘅椰菜絲有少少柚子醋汁處理過，所以味道好清新，另外兩個焗薯連皮細細粒，出奇地有薯味。朋友主菜叫咗個原隻燒法國春雞，燒春雞上枱份量都幾大份，外皮烤得香脆，咬開肉依然好多汁，食嘅時候點埋碟底嘅肉汁，味道啱啱好，少少鹹味，但係又唔會太濃。之後你仲可以叫茶及咖啡，我叫咗杯凍檸茶，食飽坐喺度望住出面嘅藍天白雲，心情非常之舒服。其實夏天咁熱，見啲人喺出面揸住杯咖啡睇到都覺得熱啊！不如坐低嘆住冷氣飲嘢好過啦！呢度絕對係是中午brunch 首選。