新匯聚餐廳小廚

營業中

休息中

開完OT, 一行4人去咗公司附近間新匯聚餐廳小厨食飯。之前都食過lunch。同事話不如試吓小菜!熱辣辣，叫杯凍飲先，老板介紹"蜂蜜檸檬梳打水" 又真係好清甜，飲完好舒服。見老板咁熱情，就叫佢介紹有咩好食! 首先叫咗杏汁豬肺雞湯。杏汁味唔太濃，又好有雞味。個湯冇咩油好好飲。我飲咗3碗 。小菜就叫咗沙律芝心蝦丸，蝦膠裡面放入芝士一齊炸。蝦丸彈牙，只係芝士唔係太流心。四川手撕雞，厨師用料有指天椒，青瓜絲，西芹，青檸，芝麻。味道有少少辣，雞炒得好嫩，唔鞋，好開胃!鮑汁豆腐卷，用咗一層薄薄嘅腐皮包住豆腐及蝦膠，再用蠔油及鮑魚汁蒸。味道唔會太濃，好有口感最後當然要叫返一個蔬菜啦！老板話蝦湯浸翠肉瓜。蝦湯清甜，有什菇，翠肉瓜好爽脆。食完之後，老板仲送湯水。西米綠豆沙。好少食綠豆沙加西米的。煮得唔係太甜。唔錯!今晚做得咁辛苦，但係食咗一餐美味小菜。咩都忘記晒。第日要同屋企人嚟再食過。