baby café (已結業)

原本想點Set，因為唔駛特別去諗食咩好，但朋友見到散叫食物的相好吸引，於是提議叫。最後我哋點咗3碟主菜之餘，仲點咗個甜品。墨西哥辣茄醬茄子墨汁意大利粉，茄子好煮得淋，而墨汁意粉果然夠晒黑，夠辣好香口。鮮茄忌廉梭子蟹意大利粉，真係同張圖一樣，有成隻蟹蓋! 意粉帶有蟹味，侍應好細心比埋蟹鉗，雖然食蟹比較麻煩，不過隻蟹好新鮮。值得推介係菠蘿燒汁西班牙黑豚扒配紫薯，黑豚扒肉好鮮嫩，又啖啖肉大大塊，紫薯就整得好滑，又好有濃郁的蕃薯味，讚!特製朱古力布朗尼，單望賣相已唔錯啦! 布朗尼仲微熱，好鬆軟。值得一提係，原來CREAM入面有舊雲呢拿雪糕，連埋布朗尼一齊食，味道好夾，又可以中和膩感，而且令布朗尼更濕更易入口。整體食物真係唔錯，都好滿意，下次再嚟試吓個Set先。