晴空日本料理

營業中

休息中

今日途經尖海咀，於是喺到搵間餐廳食個lunch~見到呢間「晴空」好似幾得意，就嚟試下~入到去，天花板掛住白雲嘅燈，好可愛！環境都好雅致，令人可以舒舒服服咁食飯~坐低後，一如好多日本餐廳有熱茶供應~侍應仲好周到咁適時幫我添茶~側邊有潔手用品供應Lunch好抵食，雖然有加一，但一個set包沙律、茶碗蒸、麵豉湯同埋甜品。首先嚟飯前小食。和風沙律油配新鮮蔬菜，酸酸甜甜，又充滿口感，認真開胃！至於茶碗蒸，係日本嘅一款小食，其實就係蒸蛋，但用咗鰹魚高湯，因此味道好濃郁，質感超嫩滑，入面又加咗瑤柱、冬菇等配料，非常豐富。麵豉湯入面有啲可愛的彩色丸子。點咗海の幸丼~有三文魚、海膽、三文魚籽、帆立貝同甜蝦喺裏面，見到都極之幸福！！！三文魚超厚身，海膽鮮甜，三文魚籽好滋味，甜蝦入口即溶，帆立貝啖啖肉，食完更加幸福！手機都放低埋，淨係想好好咁咀嚼同享受呢個午餐！跟碟有醃漬物同配料。最尾就係店家自家制的黑糖蕨餅，煙煙韌韌，香甜可口。