雪山冰廳

營業中

休息中

特色香港茶餐廳！茶餐廳由細食到大，間間大同小異，無諗過原來比少少新意，搖身一變，就可以成為咁有特色既餐廳！深水埗出名美食多，比d心機搵，你會發現比連鎖店更好的食物！我地叫左經典芝蛋牛肉漢堡包，日本櫻花蝦炒蛋配香酥丹麥多士，招牌海南雞飯，港式茶走紅豆冰，樽仔奶茶，飽到傻左。漢堡包令人難以忘懷，麵包好香脆，唔會比d醬浸到淋哂，牛肉好juicy，煎岩岩好唔會overcooked，芝士比得好足，同牛肉勁夾。炒蛋超香滑，櫻花蝦既存在提升左成個炒蛋既味道。多士如其名，又香又酥，面頭查左牛油，烘一烘，超好食！海南雞飯d雞勁滑，份量又多，食完碟飯真係飽到無朋友。最後兩杯野飲都十分出色，樽仔奶茶夠哂香滑，甜得黎又帶點澀。茶走紅豆冰相當有創意，無左平時椰汁紅豆冰個種膩。食完之後超滿，每碟野都好賞心悅目，令人食指大動。平時出街食飯，一般食完既印象就係：食得飽，唔難食。呢間餐廳正正相反，佢成功地係我個心留下深刻既印象，唔單單係個味道，更多既係每碟菜式背後所投放既心思。I will be back！