源記甜品專家 (已結業)

喺西環食完飯，男友話同我去食甜品，話甜品店好岀名，就喺正街。睇門面同埋收銀個老闆年紀就知依間甜品店應該真係有返咁上下歷史，通常老員工多嘅餐廳，都係老店。不過裝修新淨，門口落地玻璃可以以一眼睇晒店內環境。九點幾去到，全店坐滿，老闆叫我地入去同人一齊坐四人卡位。我唔係好好傳統中式糖水，所以揀左燉蛋。一邊等，一邊睇枱上嘅剪報，先知原來源記有160年歷史！真係歷史悠久！好佩服依間店可以經營左咁耐！原來由開店至今已經轉過幾次地址，依家老闆係第三代傳人。燉蛋到喇！有隻銀碟墊住個碗。燉蛋淡黄色，好平滑，郁下個碗，蛋就一齊郁，彈彈下，好有動感！食落口感好滑溜，有蛋香，燉得啱啱好，又唔會太甜。簡簡單單嘅甜品，做得好食，自然就有捧場客。好欣賞老店甜品嘅質素，下次再試下佢岀名嘅桑寄生同蛋糕。