Day and Nite by Master Kama (已結業)

記得上一次食呢間餐廳已經係兩年前同朋友慶祝生日，今次又同同一個朋友一齊黎食，充滿回憶。呢一間係專食龍蝦🦞，一入到去同之前既裝修都冇咩大分別，有一隻大龍蝦嘅公仔，一入去就見到。坐低見到個Menu，依然有好多龍蝦食品嘅選擇。我哋2個人好想食龍蝦包，但見到呢一個又有龍蝦包食又有蒜蓉牛油龍蝦，就叫咗龍蝦匯，感覺上有多啲嘢食。龍蝦包龍蝦包入面見到有好多既龍蝦肉，仲有個腳鉗，食落肉質滑嫩，配上個甜包，甜包厚身有牛油香，出面脆脆地入面軟身，感覺鬆軟。呢個包仲配有檸檬牛油醬，點落去牛油味濃，有少少檸檬味。不過我覺得唔使點醬，都夠味。蒜蓉牛油龍蝦🦞有半隻開邊龍蝦🦞，蒜蓉味唔算好濃郁，個龍蝦肉容易夾，用叉一攞起就已經有一大舊龍蝦肉，龍蝦肉質滑。薯條🍟薯條粗身，炸得香口，仲有幾條番薯味，食得出成條都係番薯🍠龍蝦雜錦海鮮湯烏冬有青口、蟹柳、魷魚同龍蝦殼。天氣凍凍地，食呢個湯烏冬就好適合，最欣賞嘅係個烏冬湯底好濃郁，係海鮮嘅鮮味。