炉端金 (已結業)

今日去完尖沙咀shopping，其中一位朋友建議去食中午放題，佢介紹呢間炉端金，係位於金馬倫道行過去十分方便！呢間係日式放題，高檔路線， 除咗有刺身， 卷物， 壽司， 熱食， 天婦羅及串燒之外， 居然紅酒、白酒、柚子酒、梅酒及多款飲品，甜品、小食……仲有多款牌子嘅雪糕！真係比係我之前食過嘅日式放題，有好大分別，餐廳佈局主要係卡座形式，坐得舒服！刺身十分新鮮， 三文魚、拖羅厚切， 夠油脂！北寄貝，好爽口！八爪魚亦十分彈牙！我哋主力都係食串燒，來來回回都點了幾轉燒大蝦，火候剛好，唔會太乾身，保持蝦肉嘅彈力！燒羊架真係五成熟多啲，肉質嫩紅，好有羊味！最正嘅就係牛柳粒，絕對唔係交行貨，牛柳粒 熱辣辣但唔會過火，柔軟有肉味！燒牛舌外層有些少黑椒，十分惹味！燒雞翼外皮很脆，雞肉仲保持嫩滑！天婦羅好夠水準，尤其係紫薯，十分鮮甜！天婦羅海老， 夠曬大隻， 粉漿不算太多！黑松露鵝肝多士係必食推介， 煎鵝肝都不算太細，而且很香口，油脂豐富，入口嫩滑！海膽壽司及八爪魚芥辣壽司，顏色鮮豔，入口新鮮！