火赤

營業中

休息中

呢間餐廳我喺佢開業嘅時期已經嚟過一次，當時已經被驚艷到，其實一直都想返嚟再食，但係呢度真係要預早book位，因為真係實在太搶手。香港冇乜邊間餐廳係專食雞嘅稀有部位嘅串燒，難得今日約到朋友walkin嚟食都有位，味道同質素依然保持好好，食材都係好新鮮，加上師傅每條串燒都係自己慢慢穿，火候亦都剛剛好，真係勁好食。燒鱈魚乾係前菜，上枱已經暖暖d，有誠意！第一樣一定要講個六色調味粉，分別係柚子鹽、咖喱鹽、抹茶鹽、山葵粉、七味粉、一味粉。我自己就最鍾意有子賢，因為可以解滯，不過咖喱味都好香！第一set上來嘅係雞頸、雞上脾、雞尾同雞下心。雞頸都好厚肉感，上脾燒得好好，超多汁，雞尾個口感偏肥，食落去有少少似食緊肥美嘅toro，雞下心有別於一般食開雞心粥嘅質地，因為比較軟身，但都有d口嚼口。之後上我最鐘意嘅糯米雞肉棒，糯米燒得脆脆地，比普通雞肉棒更加昇華。福岡秋葵同唐辛子都保持到水潤，加埋木魚絲喺上面一齊食更加好味。水牛芝士煙肉卷有d西班牙tapas感覺，芝士燒到半融，配埋厚厚嘅煙肉好正。醬油燒飯糰燒到外面酥脆，加埋個醬甜甜地，熱辣辣食一流。最後甜品就係抹茶厥餅，又軟又chewy，qq口感好滿足！